.jpg)
មន្ត្រីល្បាតបង្ហាញអន្ទាក់ដែលដោះចេញពីព្រៃអភិរក្ស។ រូបថត ក្រសួង
ភ្នំពេញៈ ក្រសួងបរិស្ថានសហការជាមួយក្រសួងពាក់ព័ន្ធ និងអង្គការដៃគូបានបើកយុទ្ធនាការ «អន្ទាក់សូន្យនៅក្នុងតំបន់ការពារធម្មជាតិកម្ពុជា» តាមបណ្ដាខេត្តចំនួន ៦ ខាងកើតទន្លេមេគង្គចាប់ពីខែមីនាដល់ខែតុលា ឆ្នាំ ២០២២ នេះ ដើម្បីផ្សព្វផ្សាយឱ្យបានទូលំទូលាយពីផលប៉ះពាល់នៃអន្ទាក់ និងផ្លាស់ប្ដូរឥរិយាបថប្រជាពលរដ្ឋចំពោះសត្វព្រៃ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានថ្លែងក្នុងសន្និសីទសារព័ត៌មានលើដំណើរការឆ្ពោះទៅបើកយុទ្ធនាការ «អន្ទាក់សូន្យនៅក្នុងតំបន់ការពារធម្មជាតិកម្ពុជា» កាលពីថ្ងៃទី ២ ខែមីនានេះនៅទីស្ដីការក្រសួងបរិស្ថានថា ការបើកយុទ្ធនាការអន្ទាក់សូន្យនៅថ្ងៃទី ៣ ខែមីនាស្របពេលដែលពិភពលោកប្រារព្ធទិវាសត្វព្រៃពិភពលោកផងដែរ និងមានគោលបំណងសំខាន់ដើម្បីផ្សព្វផ្សាយអប់រំអំពីផលប៉ះពាល់ដោយសារអន្ទាក់ទៅលើជីវិតសត្វ និងជីវិតមនុស្ស ពង្រឹងការអនុវត្តច្បាប់ ការផ្លាស់ប្តូរឥរិយាបថពលរដ្ឋឱ្យបង្កើនការប្រតិបត្តិមេត្រីបរិស្ថាន ស្រឡាញ់សត្វព្រៃជីវចម្រុះ និងការលុបបំបាត់ការបរបាញ់សត្វ ការដាក់អន្ទាក់ខុសច្បាប់ និងការលុបបំបាត់ការជួញដូរសាច់សត្វព្រៃ ក៏ដូចជាបង្កើនសុវត្ថិភាពដល់សត្វព្រៃគ្រប់ប្រភេទ។ ស្ថានភាពនៃការការពារ និងអភិរក្សធនធានធម្មជាតិដែលជាទីជម្រករបស់សត្វព្រៃនៅកម្ពុជាមានភាពល្អប្រសើរ ដែលបានផ្តល់ជាជម្រក សម្រាប់សត្វព្រៃ និងជាប្រភពទឹក និងចំណីរបស់សត្វព្រៃ តែអ្វីដែលទាំងអស់គ្នាត្រូវគិតគូរបន្ថែមទៀត គឺធ្វើឱ្យតំបន់ការពារធម្មជាតិ កាន់តែមានសុវត្ថិភាពសម្រាប់សត្វព្រៃ និងជីវចម្រុះផ្សេងទៀត។ លោកបានបន្តថា អន្ទាក់គឺកត្តាដែលគំរាមកំហែងខ្លាំងចំពោះសត្វព្រៃ។ ខណៈបរិមាណអន្ទាក់ដែលបានដោះនៅឆ្នាំ ២០២១ មានចំនួន ៦១ ៦១១ អន្ទាក់ កើនឡើងប្រមាណជាង ២០% បើប្រៀបធៀបនឹងបរិមាណអន្ទាក់ដោះបាននៅឆ្នាំ ២០២០ ដែលមានចំនួន ៤៣ ២៧០ អន្ទាក់។
លោកថ្លែងថា៖ «អន្ទាក់ដែលត្រូវបានដោះចេញ អន្ទាក់ជាឃាតករលាក់មុខដែលបន្តសម្លាប់សត្វព្រៃនៅក្នុងតំបន់ការពារធម្មជាតិនៅកម្ពុជា ព្រោះមានប្រភេទអន្ទាក់ឆក់ខ្សែភ្លើង អន្ទាក់វាយបំបាក់ស្មងជើង និងប្រភេទគ្រោះថ្នាក់ផ្សេងៗទៀត។ ហើយយុទ្ធនាការ អន្ទាក់សូន្យនឹងជាផ្នែកមួយនៃការជួយបញ្ជ្រាបការយល់ដឹងរបស់ប្រជាពលរដ្ឋ និងចូលរួមកាត់បន្ថយចំនួនអន្ទាក់នៅក្នុងតំបន់ការពារធម្មជាតិ»។
លោក គឹម ណុង អគ្គនាយកនៃអគ្គនាយកដ្ឋានតំបន់ការពារធម្មជាតិនៃក្រសួងបរិស្ថានបានថ្លែងក្នុងសន្និសីទនេះដែរថា ក្នុងយុទ្ធនាការនេះសំដៅធ្វើយ៉ាងណាឱ្យប្រជាពលរដ្ឋតាមមូលដ្ឋាន ដែលមានទម្លាប់ដាក់អន្ទាក់ចាប់សត្វព្រៃឱ្យងាកមកគោរពច្បាប់ និងឱ្យពួកគាត់យល់ពីតម្លៃសត្វព្រៃ ហើយរួមគ្នាមកចូលរួមអភិរក្សសត្វព្រៃដែលជាសត្វមានតម្លៃមហាសាលមិនអាចកាត់ថ្លៃបានជាសកល។
លោកថ្លែងថា កម្ពុជាមានច្បាប់សម្រាប់ដាក់ទោសវិន័យហើយ និងសម្រាប់បទល្មើសដាក់អន្ទាក់គឺជាច្បាប់ល្មើសធនធានធម្មជាតិថ្នាក់លេខ ៣ ដែលក្នុងនេះមានទាំងការផាកពិន័យ និងទោសទណ្ឌ ដោយក្នុងនេះអាចប្រឈមនឹងជាប់ពន្ធនាគារពី ១-៥ ឆ្នាំ និងពិន័យជាប្រាក់ពី ១៥ លានដល់ ១៥០ លានរៀល។
លោកបញ្ជាក់ថា៖ «ក្នុងយុទ្ធនាការនេះ គឺយើងនឹងរួមគ្នាធ្វើឡើងរយៈពេល ៦ ខែ ហើយក្នុងអំឡុងពេលនេះយើងនឹងឱ្យអាជ្ញាធរមូលដ្ឋាន និងសហគមន៍រួមគ្នាទប់ស្កាត់ក៏ដូចជាអប់រំផ្សព្វផ្សាយឱ្យពួកគាត់យល់ច្បាស់ពីច្បាប់ពីទោសទណ្ឌ និងរួមទាំងតម្លៃរបស់សត្វព្រៃ»។
លោក សេង ទៀក ប្រធានអង្គការ WWF បានឱ្យដឹងថា បច្ចុប្បន្នអន្ទាក់ដែលត្រូវបានគេដោះនៅតាមតំបន់ការពារធម្មជាតិបានត្រឹមតែ ២០ ភាគរយប៉ុណ្ណោះហើយចំនួន ៨០ ភាគរយទៀតមិនទាន់បានដោះ ដែលជនល្មើសបានដាក់នៅតាមតំបន់ធនធានធម្មជាតិនានានៅប្រទេសកម្ពុជា។ ផ្អែកតាមរបាយការណ៍ឆ្នាំ ២០២០ នៅតំបន់អាស៊ីអាគ្នេយ៍មានអន្ទាក់ប្រមាណ ១២ លានអន្ទាក់ ដូចជាប្រទេសឥណ្ឌូនេស៊ី ម៉ាឡេស៊ី វៀតណាម ឡាវ ថៃ និងកម្ពុជាដែលកំពុងគំរាមកំហែងសត្វព្រៃ។
លោកថា៖ «អន្ទាក់ទាំងនេះគឺជាដើមចមធ្វើឱ្យបាត់បង់នូវសត្វកម្រៗក្នុងលោកដូចជា ខ្លា ខ្លារខិន ខ្លាពពកស ឆ្កែព្រៃ ខ្លាឃ្មុំជាដើម។ ដូច្នេះអង្គការ WWF ស្នើឱ្យស្ថាប័នពាក់ព័ន្ធអនុវត្តច្បាប់ចំពោះជនល្មើសសម្លាប់សត្វព្រៃកម្រ ក៏ដូចជាភោជនីយដ្ឋានឬតំបន់នានាដែលបានជួញដូរសត្វព្រៃ ដែលទាំងនេះសំដៅធ្វើយ៉ាងណាការពារសត្វព្រៃកម្ពុជាមិនឱ្យបាត់បង់ពូជនៅថ្ងៃខាងមុខ»។
លោក ឈិត សំអាត តំណាងគម្រោង USAID ព្រៃឡង់បៃតងបានលើកឡើងក្នុងសន្និសីទ នេះដែរថា បើពុំមានវិធានការណាមួយឱ្យជាក់លាក់ទៅលើបញ្ហាអន្ទាក់ដែលត្រូវបានជនល្មើសកំពុងប្រព្រឹត្តរៀងរាល់ថ្ងៃទេគឺ ពិតជាទទួលរងផលលំបាកនិងសត្វព្រៃនឹងបាត់បង់បន្តបន្ទាប់ទៀតជាក់ជាពុំខាន។
លោកថា៖ «ត្រូវអនុវត្តច្បាប់ និងការផ្សព្វផ្សាយក៏ជាការមួយចាំបាច់ដែលត្រូវធ្វើឡើងដល់សហគមន៍មូលដ្ឋានផងដែរ»។
លោក ប៊ូវ រក្សសក្ស ប្រធានអង្គការ Birdlife in Cambodia លើកឡើងថា អន្ទាក់ក្រៅពីបានសម្លាប់សត្វជើងចម្ពាម សត្វព្រៃដទៃទៀតវាក៏បានសម្លាប់សត្វស្លាបជាបន្តបន្ទាប់ផងដែរ។ ពួកគេក្រៅពីដាក់អន្ទាក់ នៅរាយមង និងដាក់ឧបករណ៍ដទៃទៀតសម្រាប់សម្លាប់សត្វដ៏កម្រថែមទៀត។ លោកថា ជាក់ស្តែងក្នុងឆ្នាំ ២០២១ កន្លងមកសត្វត្រយងយក្ស ៣ ក្បាលត្រូវបានជាប់អន្ទាក់ ប៉ុន្តែត្រូវបានក្រុមសង្ក្រោះជួយដោះលែងវាវិញបានទាន់ពេលវេលា។ ការបើកយុទ្ធនាការអន្ទាក់សូន្យនៅថ្ងៃទី ៣ ខែមីនា ឆ្នាំ ២០២២ នឹងប្រព្រឹត្តទៅតាមប្រព័ន្ធអនឡាញដោយមានការចូលរួមពីអន្តរក្រសួង រដ្ឋបាលខេត្តពាក់ព័ន្ធនឹងអង្គការដៃគូនានាដែលសហការជាមួយក្រសួងបរិស្ថានក្នុងយុទ្ធនាការអន្ទាក់សូន្យនេះ៕
