.jpg)
លោក ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ ថ្លែងក្នុងកម្មវិធីមួយនាពេលកន្លងមក។ រូបថត ហ្វេសប៊ុកលោក ស ខេង
ភ្នំពេញៈ លោក ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ ប្រាប់ទៅមន្រ្ដីរាជការក្រោមឱវាទចាត់វិធានការចំពោះមន្ត្រីរាជការដែលមានវិសមិតភាពក្នុងការបំពេញមុខងារសាធារណៈ និងការប្រកបវិជ្ជាជីវៈជាមេធាវីឱ្យប្រញាប់រួសរាន់សម្រេចជ្រើសរើសយកវិជ្ជាជីវៈតែមួយដោយទុករយៈពេល ៣ ខែ គិតពីថ្ងៃចេញសេចក្តីណែនាំនេះរួចរាយការណ៍មកក្រសួង ដើម្បីលុបឈ្មោះចេញពីក្របខ័ណ្ឌក្រសួងបើមិនអនុវត្ដតាម។
យោងតាមសេចក្ដីណែនាំរបស់លោក ស ខេង ចុះហត្ថលេខា កាលពីថ្ងៃទី២៨ ខែកុម្ភៈ បានបញ្ជាក់ថា កន្លងមក ក្រសួងមហាផ្ទៃបានចេញសេចក្ដីណែនាំលេខ ០២៧ សណន ចុះថ្ងៃទី៥ ខែសីហា ឆ្នាំ២០២០ ស្ដីពីវិសមិតភាពក្នុងការបំពេញមុខងារសាធារណៈ និងការប្រកបវិជ្ជាជីវៈជាមេធាវីរបស់មន្រ្ដីរាជការក្រសួង មហាផ្ទៃ ដល់មន្ត្រីរាជការចំណុះក្រសួង មហាផ្ទៃ ឱ្យជ្រើសរើសយកការបំពេញមុខងារជាអ្នករាជការសាធារណៈ ឬប្រកបវិជ្ជាជីវៈជាមេធាវី និងតម្រូវឱ្យសាមីខ្លួនធ្វើការជ្រើសរើសយកវិជ្ជាជីវៈតែមួយដោយត្រូវរៀបចំនីតិវិធី ដើម្បីស្ថិតក្នុងស្ថានភាពសុំមិនប្រកបវិជ្ជាជីវៈណាមួយឬ សុំនៅក្រៅបញ្ជីនៃគណៈមេធាវី។
ក្នុងន័យនេះ ដើម្បីឱ្យការអនុវត្តសេចក្ដីណែនាំខាងលើមានប្រសិទ្ធភាពខ្ពស់សំដៅពង្រឹងការអនុវត្តច្បាប់ ពង្រឹងការអនុវត្តតួនាទី ភារកិច្ចរបស់មន្ត្រីក្រោមឱវាទក្រសួងមហាផ្ទៃ និងចៀសវាងមន្ដ្រីរាជការមានវិសមិតភាពក្នុងការបំពេញមុខងារសាធារណៈ និងការប្រកបវិជ្ជាជីវៈជាមេធាវីក្រសួងមហាផ្ទៃ សូមធ្វើការណែនាំបន្ថែមនិងមានវិធានការចំពោះមន្ត្រីរាជការក្រោមឱវាទក្រសួងមហាផ្ទៃឱ្យបញ្ជូនបញ្ជីឈ្មោះមេធាវី ដែលស្ថិតក្នុងស្ថានភាពសុំមិនប្រកបវិជ្ជាជីវៈ ឬសុំនៅក្រៅបញ្ជីនៃគណៈមេធាវីជូនគ្រប់អង្គភាពនៅថ្នាក់ជាតិ និងថ្នាក់ក្រោមជាតិចំណុះក្រសួងមហាផ្ទៃដើម្បីធ្វើជាមូលដ្ឋានក្នុងការពិនិត្យផ្ទៀងផ្ទាត់ឈ្មោះមន្ត្រីរាជការដែលប្រកបវិជ្ជាជីវៈជាមេធាវី ខណៈពេលកំពុងបំពេញមុខងារសាធារណៈ។
សេចក្ដីណែនាំបញ្ជាក់ថា៖ «ក្នុងករណីដែលមន្ត្រីរាជការចំណុះអង្គភាពរបស់ខ្លួនប្រកបវិជ្ជាជីវៈជាមេធាវី និងពុំមានឈ្មោះ ក្នុងបញ្ជីឈ្មោះមេធាវីដែលស្ថិតក្នុងស្ថានភាពសុំមិនប្រកបវិជ្ជាជីវៈ ឬសុំនៅក្រៅបញ្ជីនៃគណៈមេធាវី ប្រធានអង្គភាពត្រូវណែនាំសាមីខ្លួនឱ្យប្រញាប់រួសរាន់សម្រេចជ្រើសរើសយកវិជ្ជាជីវៈតែមួយដោយទុករយៈពេល ៣ ខែ គិតពីថ្ងៃចេញសេចក្តីណែនាំនេះ។ បើសាមីខ្លួននៅតែពុំជ្រើសរើសយកវិជ្ជាជីវៈតែមួយនោះទេ ប្រធានអង្គភាព ត្រូវរាយការណ៍ជាលាយលក្ខណ៍អក្សរមកក្រសួងមហាផ្ទៃ ដើម្បីក្រសួងចាត់វិធានការដោយលុបឈ្មោះចេញពីក្របខ័ណ្ឌ ក្រសួងមហាផ្ទៃ»។
លោក ស ខេង បានណែនាំដល់ អគ្គលេខាធិការនៃអគ្គលេខាធិការដ្ឋានអគ្គនាយក នៃអគ្គនាយកដ្ឋានរដ្ឋបាល អគ្គស្នងការ នៃអគ្គស្នងការដ្ឋាននគរបាលជាតិ អគ្គាធិការ នៃអគ្គាធិការដ្ឋាន អគ្គនាយក នៃអគ្គនាយកដ្ឋានពន្ធនាគារ អគ្គនាយក នៃអគ្គនាយកដ្ឋានអន្តោប្រវេសន៍ អគ្គនាយក នៃអគ្គនាយកដ្ឋានអត្តសញ្ញាណកម្ម អគ្គនាយកនៃអគ្គនាយកដ្ឋានភ័ស្តុភារ និងហិរញ្ញវត្ថុ ប្រធានបណ្ឌិត្យសភានគរបាលកម្ពុជា អគ្គនាយក នៃអគ្គនាយកដ្ឋាន សវនកម្មផ្ទៃក្នុង ប្រធានក្រុមប្រឹក្សានីតិកម្ម ប្រធានក្រុមប្រឹក្សារាជធានី ខេត្ត អភិបាល នៃគណៈអភិបាល រាជធានី ខេត្ត ប្រធានក្រុមប្រឹក្សាក្រុង ស្រុក ខណ្ឌ អភិបាល នៃគណៈអភិបាលក្រុង ស្រុក ខណ្ឌ និងអង្គភាព ពាក់ព័ន្ធចំណុះក្រសួងមហាផ្ទៃ ត្រូវអនុវត្តតាមសេចក្តីណែនាំខាងលើឱ្យមានប្រសិទ្ធភាពខ្ពស់ ចាប់ពីថ្ងៃចុះហត្ថលេខា តទៅ៕
