.jpg)
ភ្នំពេញៈ មន្រ្តីជំនាញសាខា អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តកំពង់ធំ ខេត្តកំពត ខេត្តកំពង់ឆ្នាំង ខេត្តសៀមរាប និងរាជធានីភ្នំពេញ បានចុះប្រតិបត្តិការត្រួតពិនិត្យនៅតាមស្ថានីយ/ដេប៉ូប្រេងឥន្ធនៈចំនួន ៣៧ ទីតាំងបន្ថែមទៀតកាលពីថ្ងៃទី៣ និងទី៤ ខែមីនានេះ តាមលទ្ធផលនៃការត្រួតពិនិត្យដេប៉ូប្រេងឥន្ធនៈចំនួន ១១ទីតាំងមិនមានអនុលោមភាពត្រូវបានចាត់វិធានការច្បាប់លើម្ចាស់ដេប៉ូប្រេងឥន្ធនៈតាមនីតិវិធីច្បាប់។
បើតាមអគ្គនាយកដ្ឋាន ក.ប.ប.៖«គោលបំណងរបស់មន្រ្តីជំនាញសាខារាជធានី ខេត្ដ ចុះប្រតិបត្តិការត្រួតពិនិត្យនៅតាមស្ថានីយ/ដេប៉ូប្រេងឥន្ធនៈនេះ គឺដើម្បីស្វែករកនូវភាពមិនអនុលោមតាមរយៈការកេងប្រវ័ញ្ចរបស់ម្ចាស់ស្ថានីយ/ដេប៉ូប្រេងឥន្ធនៈទៅលើអ្នកប្រើប្រាស់ ដែលប៉ះពាល់ដល់សេដ្ឋកិច្ចរបស់អ្នកប្រើប្រាស់ និងទប់ស្កាត់អំពើមិនសុចរិតក្នុងវិស័យជំនួញ និងធុរកិច្ចប្រេងឥន្ធនៈផងដែរ»។
អគ្គនាយកដ្ឋាន ក.ប.ប. បានឱ្យដឹងថា ក្រោយមន្រ្តីជំនាញសាខា ក.ប.ប. ខេត្តកំពង់ធំ ខេត្តកំពត ខេត្តកំពង់ឆ្នាំង ខេត្តសៀមរាប និងរាជធានីភ្នំពេញបានចុះប្រតិបត្តិការត្រួតពិនិត្យនៅតាមស្ថានីយ/ដេប៉ូប្រេងឥន្ធនៈចំនួន ៣៧ ទីតាំង កាលពីថ្ងៃទី៣ និងទី៤ ខែមីនានេះ តាមលទ្ធផលនៃការត្រួតពិនិត្យមន្រ្តីជំនាញរកឃើញដេប៉ូប្រេងឥន្ធនៈចំនួន ១១ ទីតាំងមិនមានអនុលោមភាព និងពិន័យទៅតាមនីតិវិធីចំពោះម្ចាស់អាជីវកម្មប្រេងឥន្ធនៈទាំងនេះ។
អគ្គនាយកដ្ឋាន ក.ប.ប. កាលពីថ្ងៃទី១ និងទី២ ខែមីនា ឆ្នាំ ២០២២ នេះ ក៏បានរកឃើញដេប៉ូប្រេងឥន្ធនៈចំនួន ១១ ទីតាំងដែរ ដោយម្ចាស់រកស៊ីមិនមានភាពអនុលោម។ អគ្គនាយកដ្ឋាន ក.ប.ប.បានឱ្យដឹងថា ក្រោយមន្រ្តី ក.ប.ប. បានចុះត្រួតពិនិត្យស្ថានីយ និងដេប៉ូប្រេងឥន្ធនៈចំនួន ៣៤ ទីតាំងស្ថិតក្នុងខេត្តសៀមរាប ខេត្តកំពង់ឆ្នាំង ខេត្តកំពត ខេត្តកំពង់ធំ និងខេត្តកណ្ដាល។ ក្នុងចំណោម ៣៤ទីតាំងដែលបានត្រួតពិនិត្យខាងលើ មន្ត្រីជំនាញបានរកឃើញដេប៉ូចំនួន ១១ ទីតាំងមិនមានភាពអនុលោម។
ក្រោយពីបានរកឃើញដូចនេះ មន្ត្រី ក.ប.ប. បានធ្វើការពិន័យអន្តរការណ៍ និងណែនាំឱ្យម្ចាស់ដេប៉ូធ្វើការកែតម្រូវ និងឈប់ប្រព្រឹត្តល្មើសនឹងច្បាប់ស្ដីពីកិច្ចការពារអ្នកប្រើប្រាស់៕
វីដេអូ៖
