មណ្ឌលគិរីៈ អភិបាលខេត្ដមណ្ឌលគិរី លោក ថង សាវុន ប្រាប់ទៅ អភិបាលក្រុង ស្រុក មេឃុំ និងចៅសង្កាត់ ក្នុងខេត្តឱ្យចុះទប់ស្កាត់ និងបញ្ឈប់រាល់សកម្មភាពពុះដីឡូតិ៍លក់ដោយអនាធិបតេយ្យ និងការសាងសង់ដែលមិនមានច្បាប់អនុញ្ញាតត្រឹមត្រូវ។
យោងតាមលិខិតរបស់លោក ថង សាវុន កាលពីថ្ងៃទី៣ ខែមីនានេះបានបញ្ជាក់ថា៖ «ខ្ញុំសូមជម្រាបជូនលោកអភិបាលក្រុង ស្រុក មេឃុំ និងចៅសង្កាត់ទាំងអស់ដែលស្ថិតក្នុងភូមិសាស្ត្រខេត្តមណ្ឌលគីរីជ្រាបថា បច្ចុប្បន្នខេត្តមណ្ឌលគិរី បាននិងកំពុងមានការអភិវឌ្ឍនិងរីកចម្រើនខ្លាំងលើផ្នែកសេដ្ឋកិច្ច ជាពិសេស លើវិស័យដីធ្លី និងសំណង់។ ជាមួយគ្នានៃដំណើរការ អភិវឌ្ឍយ៉ាងល្អប្រសើរនេះ ក៏មានបញ្ហាប្រឈមយ៉ាងធ្ងន់ធ្ងរ ជុំវិញការធ្វើអាជីវកម្មលើដីធ្លី ដោយពុះឡូតិ៍លក់ ឬសាងសង់សំណង់ ដែលមិនមានច្បាប់អនុញ្ញាតត្រឹមត្រូវ»។
លោកអភិបាលខេត្ដបានឱ្យដឹងថា អាជីវកម្មលើដីធ្លី ដោយពុះឡូតិ៍លក់ ឬសាងសង់សំណង់ ដែលមិនមានច្បាប់អនុញ្ញាតត្រឹមត្រូវទាំងនោះរួមមាន ពុះដីឡូតិ៍លក់ដោយមិនបានផ្ទេរសិទ្ធិ និងមិនបានធ្វើប្លង់បំបែកក្បាលដីជូនអ្នកទិញឱ្យបានស្របច្បាប់។ ពុះដីឡូតិ៍លក់ដោយមិនមានប្លង់កម្មសិទ្ធិខ្លួនឯងត្រឹមត្រូវ និងលក់ដីឡូត៍ដែលមិនស្របច្បាប់ទៅឱ្យអ្នកទិញ។ ពុះដីឡូតិ៍លក់ឬសាងសង់ដោយគ្មានច្បាប់អនុញ្ញាតពីអាជ្ញាធរ និងអង្គភាពពាក់ព័ន្ធត្រឹមត្រូវ ពុះដីឡូតិ៍លក់ ឬសាងសង់ដោយអនាធិបតេយ្យ ដែលមិនគោរពតាមប្លង់គោល ផែនការប្រើប្រាស់ដី និងបទប្បញ្ញត្តិនគរូបនីយកម្មឱ្យបានត្រឹមត្រូវ ជាដើម។
លោក ថង សាវុន បញ្ជាក់ថា ដើម្បីពង្រឹងគុណភាពនៃការប្រើប្រាស់ដី ការគ្រប់គ្រងដីធ្លី និងសំណង់ ប្រកបដោយប្រសិទ្ធភាព និងសុវត្ថិភាពខ្ពស់ សូមអាជ្ញាធរពាក់ព័ន្ធខាងលើ ត្រូវចាត់វិធានការណ៍ទប់ស្កាត់ និងរាយការណ៍ឱ្យបានទាន់ពេលវេលាចាប់ពីពេលនេះតទៅ ព្រមទាំងត្រូវធ្វើការផ្សព្វផ្សាយ ជូនដំណឹង និងណែនាំឱ្យបានច្បាស់លាស់ ដល់អ្នកដែលមាន បំណងពុះដីឡូតិ៍លក់ ឬសាងសង់ដើម្បីលក់ ជួល ឬសម្រាប់រស់នៅដោយខ្លួនឯង នៅក្នុងមូលដ្ឋានរបស់ខ្លួន។
ក្នុងនោះមានដូចជា ត្រូវសុំច្បាប់អនុញ្ញាត មុននឹងសាងសង់ ឬធ្វើការពុះដីឡូត៍របស់ខ្លួនដើម្បីលក់ ឬដោះដូរ។ ចំពោះនិតិវិធី ឬ បែបបទនៃការស្នើសុំច្បាប់អនុញ្ញាតម្ចាស់សំណើត្រូវមកទំនាក់ទំនងជាមួយការិយាល័យច្រកចេញចូល តែមួយរដ្ឋបាលខេត្ត ឬមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ឬចំពោះអង្គភាពស្ថិតក្នុងដែនសមត្ថកិច្ចក្រសួង ខេត្ត ក្រុង ស្រុក ដោយយោងទៅតាមសណ្ឋាននៃករណីដីធ្លីទាំងនោះជាក់ស្ដែង ដើម្បីរៀបចំការស្នើសុំអនុញ្ញាតច្បាប់។
ត្រូវដាក់តាំងបង្ហាញឱ្យបានច្បាស់ អំពីឯកសារស្របច្បាប់ដែលបានអនុញ្ញាតឱ្យពុះដីឡូតិ៍លក់ ឬសាងសង់ នៅទីតាំងដីផ្ទះជាក់ស្តែង និងការដ្ឋានសំណង់នោះតែម្តង។
ត្រូវប្រគល់ជូនអថិតិជននូវឯកសារបញ្ជាក់ចម្លងពីច្បាប់ដើម នូវលិខិតស្របច្បាប់នៃការអនុញ្ញាតឱ្យពុះដីឡូតិ៍លក់ ឬការសាងសង់នៅលើដី រួមមានៈ អាជ្ញាប័ណ្ណ ឬលិខិតស្របច្បាប់ដែលបានអនុញ្ញាតពីអាជ្ញាធរ និងអង្គភាពពាក់ព័ន្ធលើការសាងសង់ ឬការពុះដីឡូតិ៍លក់ ព្រមជាមួយនឹងវិញ្ញាបនប័ត្រសម្គាល់ម្ចាស់អចលនវត្ថុ, ប័ណ្ណកម្មសិទ្ធិ និងឯកសារពាក់ព័ន្ធសំខាន់ៗផ្សេងទៀត។
លោកបញ្ជាក់ថា៖ «ចំពោះករណីអ្នកអភិវឌ្ឍន៍ដី និងសំណង់ប្រព្រឹត្តបទល្មើសដូចខាងលើឬការឱ្យដៃរបស់អាជ្ញាធរ ឬអង្គភាពពាក់ព័ន្ធណាមួយ ក្នុងការឃុបឃិតត្រូវមានវិធានការផាកពិន័យ ឬ និងទទួលទោសតាមច្បាប់ជាធរមាន»៕