.jpg)
ទិដ្ឋភាពផ្ទះពលរដ្ ឋដែលរបើកដំបូលដោយសារភ្លៀងលាយខ្យល់កន្ត្រាក់នៅឧត្ដរមានជ័យពីថ្ងៃ ៥ មីនា ។ រូបថត ក្រសួងធនធានទឹក
ឧត្តរមានជ័យៈក្រុមការងារគណៈកម្មការគ្រប់គ្រងគ្រោះមហន្តរាយខេត្តឧត្តរមានជ័យបានឲ្យដឹងនៅថ្ងៃអាទិត្យថាមានពលរដ្ឋម្នាក់បានរងរបួស និងផ្ទះពលរដ្ឋចំនួន៨០ខ្នងរងការខូចខាតព្រមទាំងមានខូច
ដំបូលអគារសាលារៀនចំនួន១ផងដែរ ដោយសារភ្លៀងលាយឡំខ្យល់កន្ត្រាក់ពីល្ងាចថ្ងៃទី ៥ ខែមីនានៅក្រុងសំរោង និងស្រុកអន្លងវែង។
លោក ជា ពិសិដ្ឋ ប្រធានគណៈកម្មការគ្រប់គ្រងគ្រោះមហន្តរាយខេត្តឧត្តរមានជ័យ បានប្រាប់ភ្នំពេញប៉ុស្តិ៍ថា មកទល់ពេលនេះក្រុមការងារឆ្លើយតបគ្រោះមហន្តរាយដែលមានការចូលរួមពីក្រុមបញ្ជាការកងឯកភាពខេត្ត បានចុះអន្តរាគមន៍ជួសជុលជូនផ្ទះប្រជាពលរដ្ឋរងគ្រោះឡើងវិញ ជាពិសេសសាលារៀនដែលរងការខូចខាតដោយសារភ្លៀងលាយឡំខ្យល់កន្ត្រាក់។
លោកថ្លែងថា៖ «នៅពេលនេះក្រុមការងារយើងកំពុងចុះអន្តរាគមន៍ជួសជុលផ្ទះជូនប្រជាពលរដ្ឋនិងសាលារៀន ដែលរងការខូចខាត ដើម្បីឲ្យប្រជាពលរដ្ឋមានលំនៅស្នាក់អាស្រ័យនិងសិស្សានុសិស្សបានចូលរៀនឡើងវិញប្រកបដោយសុវត្ថិភាព»។
បើតាមលោក ជា ពិសិដ្ឋ ក្រៅពីការជួយជួសជុលផ្ទះ និងសាលារៀន ក្រុមការងារក៏បាននាំយកគ្រឿងបរិភោគ និងឧបភោគមួយចំនួនចែកជូនដល់គ្រួសាររងគ្រោះផងដែរដោយក្នុង ១ គ្រួសារទទួលបានអង្ករ ២៥ គីឡូក្រាម
មី១កេស ទឹកត្រីនិងទឹកស៊ីអ៊ីវ១យួរ ដើម្បីជួយសម្រាលបន្ទុកជីវភាពរស់នៅក្នុងគ្រាអាសន្ន។
លោកលឿង ណុច ចៅសង្កាត់កូនក្រៀល ក្រុងសំរោង បានប្រាប់ភ្នំពេញប៉ុស្តិ៍ថា ករណីភ្លៀងលាយឡំខ្យល់កន្ត្រាក់កាលពីល្ងាចថ្ងៃទី ៥ ខែមីនា បានបង្កការខូចខាតផ្ទះប្រជាពលរដ្ឋចំនួន៧៧ខ្នងនៅក្នុងភូមិរំដួលជើងភ្នំ ភូមិគិរីវ័ន និងភូមិសំរោងសែនជ័យ ។
លោកបានបញ្ជាក់ថា៖ «ផ្ទះ ២ ខ្នងបានបាក់ដួលរលំខូចខាតទាំងស្រុង និង ៧៥ ខ្នងទៀតបានប៉ើងរបើកដំបូល។ ប៉ុន្តែមិនបង្កឲ្យមានពលរដ្ឋណាម្នាក់រងរបួសឬស្លាប់នោះឡើយ»។
យោងតាមផែនការបស់ក្រុមការងារចុះពង្រឹងថ្នាក់មូលដ្ឋាន ផ្ទះចំនួន ៤៥ ខ្នងនឹងត្រូវជួសជុលឲ្យរួចរាល់នៅត្រឹមថ្ងៃទី ៦ មីនា ចំណែកខ្នងផ្ទះដែលនៅសល់ នឹងត្រូវជួសជុលបន្តឲ្យរួចរាល់នៅត្រឹមល្ងាចថ្ងៃទី ៧ ខែមីនា នេះ។
ដោយឡែកលោក ផេង ហួត នាយនគរបាលប៉ុស្តិ៍រដ្ឋបាលឃុំត្រពាំងតាវ ស្រុកអន្លង់វែង បានប្រាប់ភ្នំពេញប៉ុស្តិ៍ថា គិតត្រឹមម៉ោង ១១:២០ នាទីព្រឹកថ្ងៃទី ៦ ខែមីនាក្រុមសមត្ថកិច្ចក្នុងមូលដ្ឋានរបស់លោក និងក្រោមការជួយជ្រោម
ជ្រែងពីកម្លាំងអធិការដ្ឋាននគរបាលស្រុកបានចុះជួយជួសជុលសាលារៀន និងផ្ទះប្រជាពលរដ្ឋរងគ្រោះដោយករណីភ្លៀងលាយឡំខ្យល់កន្ត្រាក់បានរួចរាល់ជាស្ថាពរហើយ។
លោកថ្លែងថា៖ «នៅក្នុងមូលដ្ឋានយើងខ្ញុំមានការខូចខាតតិចតួច គឺបាក់ដួលរលំទាំងស្រុងចំនួន ១ ខ្នងផ្ទះ ខណៈ ២ ខ្នងផ្ទះទៀត និងអគារសាលារៀនចំនួន ១ ប៉ើងរបើកដំបូល។ ប៉ុន្តែឥឡូវនេះ សមត្ថកិច្ចយើងបានជួយជួសជុលរួចរាល់ឡើងវិញអស់ហើយ»។
លោកបានបន្ថែមថា៖ «ក្រៅពីខូចខាតផ្ទះ និងសាលារៀន គ្រោះមហន្តរាយពីធម្មជាតិនេះក៏បានបង្កឲ្យបុរសម្នាក់ឈ្មោះ ចេង អ៊ាម អាយុ ៦៥ ឆ្នាំ រងរបួសក្បាលដេរចំនួន ៤ ថ្នេរផងដែរ »៕
វីដេអូ៖
