ភ្នំពេញៈ លោកនាយករដ្ឋមន្ត្រី ហ៊ុន សែន បានឯកភាពឱ្យគណៈកម្មការប្រយុទ្ធនឹងជំងឺកូវីដ ១៩ ប្រធានមន្ទីរពេទ្យជាតិ និងប្រធានមណ្ឌលព្យាបាលជំងឺកូវីដ ១៩ ថ្នាក់រាជធានី-ខេត្ត ផ្តល់ឱសថព្យាបាលជំងឺកូវីដ ១៩ Molnupiravir200mg ជូនដល់មន្ត្រីសុខាភិបាល និងមន្ត្រីប្រយុទ្ធនឹងជំងឺកូវីដ ១៩ ជួរមុខដែលបានឆ្លងវីរុសកូវីដដោយមិនគិតថ្លៃ ក្រោយពីមន្ត្រីមួយចំនួនបានឆ្លងវីរុសកូវីដ ១៩ ហើយធ្វើការព្យាបាលនៅផ្ទះ។
នេះបើយោងតាមលិខិតរបស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ ជម្រាបជូនទៅប្រធានគណៈកម្មការប្រយុទ្ធនឹងជំងឺកូវីដ ១៩ ប្រធានមន្ទីរពេទ្យជាតិ និងប្រធានមណ្ឌលព្យាបាលជំងឺកូវីដ ១៩ រាជធានី ខេត្តទាំងអស់កាលពីថ្ងៃទី ៤ ខែមីនា។
លោកថ្លែងថា៖ «ខ្ញុំសូមជម្រាបជូន ឯកឧត្តម លោកជំទាវ ប្រធានគណៈកម្មការប្រយុទ្ធនឹងជំងឺកូវីដ ១៩ ថ្នាក់រាជធានី-ខេត្ត ឯកឧត្តម លោកជំទាវ លោក លោកស្រីប្រធានមន្ទីរពេទ្យជាតិ និងប្រធានមណ្ឌលព្យាបាលជំងឺកូវីដ ១៩ រាជធានី-ខេត្តទាំងអស់ មេត្តាជ្រាបថា ក្នុងពេលបច្ចុប្បន្នមានមន្ត្រីសុខាភិបាលជួរមុខ និងមន្ត្រីប្រយុទ្ធនឹងជំងឺកូវីដ ១៩ មួយចំនួនបានឆ្លងវីរុសកូវីដ ១៩ ហើយធ្វើការព្យាបាលនៅផ្ទះ»។
លោកបន្តថាដើម្បីជួយសម្រាលបន្ទុកចំណាយរបស់មន្ត្រីទាំងនោះក្នុងការទិញឱសថព្យាបាលគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ បានទទួលការយល់ព្រមជាគោលការណ៍ «ដ៏ខ្ពង់ខ្ពស់ពីសម្តេចអគ្គមហារសនាបតីតេជោ ហ៊ុន សែន ក្នុងការផ្តល់ឱសថ Molnupiravir200mg ដោយមិនគិតថ្លៃជូនដល់មន្ត្រីសុខាភិបាលជួរមុខ និងមន្ត្រីប្រយុទ្ធនឹងជំងឺកូវីដ ១៩ ដែលបានឆ្លងវីរុសកូវីដ ១៩ និងបានបញ្ជាក់ដោយតេស្ដ PCR ហើយធ្វើការព្យាបាលនៅផ្ទះ។ ឱសថ Molnupiravir200mg នឹងត្រូវធ្វើការផ្តល់ជូនដោយអង្គភាពសាមី»។
បើតាមលោក ប៊ុនហេង ដើម្បីគ្រប់គ្រង និងអនុវត្តការផ្ដល់ជូនឱសថ Molnupiravir200-mg ចំនួន ៤០ គ្រាប់ (១ ប្រអប់) ក្នុងម្នាក់ជូនបានទាន់ពេលវេលា ក្រសួងសុខាភិបាលបានណែនាំថា បន្ទាប់ពីបានធ្វើតេស្តរហ័សរកអង់ទីហ្ស៊ែនកូវីដ ១៩ បានលទ្ធផលវិជ្ជមាន អង្គភាពសាមីត្រូវសម្របសម្រួលឱ្យអ្នកបច្ចេកទេសយកសំណាកបញ្ជូនមកមន្ទីរពិសោធន៍ដែលមានការអនុញ្ញាតពីក្រសួងសុខាភិបាល ដើម្បីធ្វើតេស្ត PCR។ មន្ទីរពិសោធន៍ដែលមានការអនុញ្ញាតពីក្រសួងសុខាភិបាលធ្វើតេស្ត PCR ត្រូវសម្របសម្រួលធ្វើតេស្តជូនដោយមិនគិតថ្លៃ និងបញ្ជាក់តាមទម្រង់របាយការណ៍មន្ទីរពិសោធន៍ជូន។
ចំណែកសាមីខ្លួន ដែលត្រូវបានបញ្ជាក់លទ្ធផលវិជ្ជមានកូវីដ ១៩ ដោយតេស្ត PCR ហើយគ្មានរោគសញ្ញាធ្ងន់ធ្ងរត្រូវអនុវត្តតាមនីតិវិធីប្រតិបត្តិស្តង់ដាសម្រាប់គ្រប់គ្រងថែទាំ និងព្យាបាលអ្នកជំងឺកូវីដ ១៩ នៅតាមផ្ទះ និងត្រូវរាយការណ៍ជូនអាជ្ញាធរមូលដ្ឋាន និងត្រូវប្រើឱសថ Molnupiravir200mg ឱ្យបានត្រឹមត្រូវតាមការណែនាំ។
លិខិតដដែលបញ្ជាក់ថា អង្គភាពសាមីត្រូវស្នើសុំឱសថ Molnupiravir200mg មកអនុគណៈកម្មការផ្គត់ផ្គង់ និងហិរញ្ញវត្ថុ និងត្រូវធ្វើរបាយការណ៍ត្រឡប់មកអនុគណៈកម្មការបច្ចេកទេស និងព្យាបាល និងអនុគណៈកម្មការផ្គត់ផ្គង់ និងហិរញ្ញវត្ថុនៃគណៈកម្មការអន្តរក្រសួង ដើម្បីប្រយុទ្ធប្រឆាំងនឹងជំងឺកូវីដ ១៩។
ចំណែកសាមីខ្លួនដែលត្រូវបានបញ្ជាក់លទ្ធផលវិជ្ជមានកូវីដដោយតេស្ត PCR ហើយគ្មានរោគសញ្ញាធ្ងន់ធ្ងរត្រូវអនុវត្តតាមនីតិវិធីប្រតិបត្តិស្តង់ដាសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ ១៩ នៅតាមផ្ទះ និងត្រូវរាយការណ៍ជូនអាជ្ញាធរមូលដ្ឋាន និងត្រូវប្រើឱសថ Molnupiravir-200mg ឱ្យបានត្រឹមត្រូវតាមការណែនាំ។ លោក ប៊ុនហេង បញ្ជាក់ថា អង្គភាពសាមីត្រូវស្នើសុំឱសថ Molnupiravir200mg មកអនុគណៈកម្មការផ្គត់ផ្គង់ និងហិរញ្ញវត្ថុ និងត្រូវធ្វើរបាយការណ៍ត្រឡប់មកអនុគណៈកម្មការបច្ចេកទេស និងព្យាបាល និងអនុគណៈកម្មការផ្គត់ផ្គង់ និងហិរញ្ញវត្ថុ នៃ គ.អ.ក។
លោក សេង ណុង ប្រធានមន្ទីរពេទ្យបង្អែកខេត្ដព្រះសីហនុថ្លែងនៅថ្ងៃទី ៦ មីនា ថា មន្ទីរពេទ្យបង្អែកខេត្ដនឹងគោរពតាមអនុសាសន៍របស់លោកនាយករដ្ឋមន្ត្រី និងគណៈកម្មការប្រយុទ្ធនឹងជំងឺកូវីដ ១៩ ក្នុងការមើលថែចំពោះគ្រូពេទ្យជួរមុខ ក្នុងករណីមានឆ្លងកូវីដ តាមរយៈការផ្ដល់ឱសថ Molnupiravir 200mg នេះ និងផ្ដល់ថ្នាំសម្រាប់ព្យាបាលតាមអាការជំងឺផ្សេងទៀតដោយមិនគិតថ្លៃ។
លោកថ្លែងថា៖ «ក្រុមគ្រូពេទ្យជួរមុខរបស់យើងក៏ធ្លាប់មានអ្នកឆ្លងជំងឺកូវីដ ១៩ ដែរ ប៉ុន្តែយើងបានយកចិត្ដទុកដាក់ព្យាបាលពួកគាត់បានជាសះស្បើយអស់ហើយ»៕