.jpg)
លោក ស ខេង រដ្ឋមន្ត្រីក្រសួងមហាផ្ទៃ។ រូបថត ក្រសួងមហាផ្ទៃ
ភ្នំពេញៈ លោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃបានប្រាប់ទៅមន្ដ្រីរាជការក្រោមឱវាទក្រសួងមហាផ្ទៃត្រូវចាត់វិធានការចំពោះមន្ត្រីរាជការដែលមានវិសមិតភាពក្នុងការបំពេញមុខងារសាធារណៈ និងការប្រកបវិជ្ជាជីវៈជាមេធាវីឱ្យប្រញាប់រួសរាន់សម្រេចជ្រើសរើសយកវិជ្ជាជីវៈតែមួយដោយទុករយៈពេល ៣ ខែគិតពីថ្ងៃចេញសេចក្តីណែនាំនេះរួចរាយការណ៍មកក្រសួង ដើម្បីសម្រេចលុបឈ្មោះចេញពីក្របខ័ណ្ឌបើមិនអនុវត្ដតាម។
យោងតាមសេចក្ដីណែនាំរបស់លោក ស ខេង ចុះហត្ថលេខាកាលពីថ្ងៃទី ២៨ ខែកុម្ភៈ បានបញ្ជាក់ថា កន្លងមកក្រសួងមហាផ្ទៃបានចេញសេចក្ដីណែនាំលេខ ០២៧ សណន ចុះថ្ងៃទី ៥ ខែសីហា ឆ្នាំ ២០២០ ស្ដីពីវិសមិតភាពក្នុងការបំពេញមុខងារសាធារណៈ និងការប្រកបវិជ្ជាជីវៈជាមេធាវីរបស់មន្ដ្រីរាជការក្រសួងមហាផ្ទៃដល់មន្ត្រីរាជការចំណុះក្រសួងមហាផ្ទៃឱ្យជ្រើសរើសយកការបំពេញមុខងារជាអ្នករាជការសាធារណៈ ឬប្រកបវិជ្ជាជីវៈជាមេធាវី និងតម្រូវឱ្យសាមីខ្លួនធ្វើការជ្រើសរើសយកវិជ្ជាជីវៈតែមួយដោយត្រូវរៀបចំនីតិវិធីដើម្បីស្ថិតក្នុងស្ថានភាពសុំមិនប្រកបវិជ្ជាជីវៈណាមួយ ឬសុំនៅក្រៅបញ្ជីនៃគណៈមេធាវី។
ក្នុងន័យនេះ ដើម្បីឱ្យការអនុវត្តសេចក្ដីណែនាំខាងលើមានប្រសិទ្ធភាពខ្ពស់សំដៅពង្រឹងការអនុវត្តច្បាប់ ពង្រឹងការអនុវត្តតួនាទី ភារកិច្ចរបស់មន្ត្រីក្រោមឱវាទក្រសួងមហាផ្ទៃ និងចៀសវាងមន្ដ្រីរាជការមានវិសមិតភាពក្នុងការបំពេញមុខងារសាធារណៈ និងការប្រកបវិជ្ជាជីវៈជាមេធាវី ក្រសួងមហាផ្ទៃ សូមធ្វើការណែនាំបន្ថែម និងមានវិធានការចំពោះមន្ត្រីរាជការក្រោមឱវាទក្រសួងមហាផ្ទៃឱ្យបញ្ជូនបញ្ជីឈ្មោះមេធាវីដែលស្ថិតក្នុងស្ថានភាពសុំមិនប្រកបវិជ្ជាជីវៈ ឬសុំនៅក្រៅបញ្ជីនៃគណៈមេធាវីជូនគ្រប់អង្គភាពនៅថ្នាក់ជាតិ និងថ្នាក់ក្រោមជាតិចំណុះក្រសួងមហាផ្ទៃ ដើម្បីធ្វើជាមូលដ្ឋានក្នុងការពិនិត្យផ្ទៀងផ្ទាត់ឈ្មោះមន្ត្រីរាជការដែលប្រកបវិជ្ជាជីវៈជាមេធាវី ខណៈពេលកំពុងបំពេញមុខងារសាធារណៈ។ នេះបើតាមសេចក្ដីណែនាំ។
លោក ស ខេង បញ្ជាក់ថា៖ «ក្នុងករណីដែលមន្ត្រីរាជការចំណុះអង្គភាពរបស់ខ្លួនប្រកបវិជ្ជាជីវៈជាមេធាវី និងពុំមានឈ្មោះ ក្នុងបញ្ជីឈ្មោះមេធាវីដែលស្ថិតក្នុងស្ថានភាពសុំមិនប្រកបវិជ្ជាជីវៈ ឬសុំនៅក្រៅបញ្ជីនៃគណៈមេធាវី ប្រធានអង្គភាពត្រូវណែនាំសាមីខ្លួនឱ្យប្រញាប់រួសរាន់សម្រេចជ្រើសរើសយកវិជ្ជាជីវៈតែមួយដោយទុករយៈពេល ៣ ខែ គិតពីថ្ងៃចេញសេចក្តីណែនាំនេះ»។
លោករដ្ឋមន្ត្រីបន្តថា៖ «បើសាមីខ្លួននៅតែពុំជ្រើសរើសយកវិជ្ជាជីវៈតែមួយនោះទេប្រធានអង្គភាពត្រូវរាយការណ៍ជាលាយលក្ខណ៍អក្សរមកក្រសួងមហាផ្ទៃ ដើម្បីក្រសួងចាត់វិធានការដោយលុបឈ្មោះចេញពីក្របខ័ណ្ឌក្រសួងមហាផ្ទៃ»។
លោក ស ខេង បានណែនាំដល់អគ្គលេខាធិការនៃអគ្គលេខាធិការដ្ឋានអគ្គនាយកនៃអគ្គនាយកដ្ឋានរដ្ឋបាល អគ្គស្នងការនៃអគ្គស្នងការដ្ឋាននគរបាលជាតិ អគ្គាធិការនៃអគ្គាធិការដ្ឋាន អគ្គនាយកនៃអគ្គនាយកដ្ឋានពន្ធនាគារ អគ្គនាយកនៃអគ្គនាយកដ្ឋានអន្តោប្រវេសន៍ អគ្គនាយក នៃអគ្គនាយកដ្ឋានអត្តសញ្ញាណកម្ម អគ្គនាយកនៃអគ្គនាយកដ្ឋានភ័ស្តុភារ និងហិរញ្ញវត្ថុ ប្រធានបណ្ឌិត្យសភានគរបាលកម្ពុជា អគ្គនាយក នៃអគ្គនាយកដ្ឋាន សវនកម្មផ្ទៃក្នុងប្រធានក្រុមប្រឹក្សានីតិកម្ម ប្រធានក្រុមប្រឹក្សារាជធានី ខេត្ត អភិបាលនៃគណៈអភិបាល រាជធានី ខេត្ត ប្រធានក្រុមប្រឹក្សាក្រុង ស្រុក ខណ្ឌ អភិបាលនៃគណៈអភិបាលក្រុង ស្រុក ខណ្ឌ និងអង្គភាព ពាក់ព័ន្ធចំណុះក្រសួងមហាផ្ទៃត្រូវអនុវត្តតាមសេចក្តីណែនាំខាងលើឱ្យមានប្រសិទ្ធភាពខ្ពស់ចាប់ពីថ្ងៃចុះហត្ថលេខាតទៅ។
លោក លីវ សុវណ្ណា អគ្គលេខាធិការ គណៈមេធាវីបានថ្លែងដោយបញ្ជាក់ជំហរគណៈមេធាវី ដោយគាំទ្រ សេចក្ដីណែនាំនេះរបស់រដ្ឋមន្ត្រីក្រសួងមហាផ្ទៃ ដែលនេះជាការពញ្ញាក់ស្មារតីដល់មន្ដ្រី ដែលជាអ្នកមានតួនាទីជាមេធាវីផង និងជាមន្ដ្រីសាធារណៈក្រោមឱវាទក្រសួងផង។
លោកបានថ្លែងថា៖ «សេចក្ដីណែនាំរបស់សម្ដេចក្រឡាហោម ស ខេង នេះ គឺស្របទៅនឹងលក្ខន្តិកៈជាមួយគ្នាមេធាវីយើង ក្នុងការជំរុញឱ្យមានការអនុវត្ដច្បាប់។ គណៈមេធាវីសូមគាំទ្រ និងសូមថ្លែងអំណរគុណ សម្ដេចក្រឡាហោម ដែលបានបញ្ជាក់នូវជំហរច្បាស់លាស់ទាក់ទងនឹងវិសមិតភាពក្នុងការបំពេញមុខងារសាធារណៈ និងការប្រកបវិជ្ជាជីវៈជាមេធាវីនេះ»។ លោក ថា សិទ្ធិ របស់មេធាវីម្នាក់ បើសិនជាមានករណីវិសមិតភាព ដើម្បីឱ្យត្រូវច្បាប់មេធាវីរូបនេះអាចស្នើសុំព្យួរ នៅស្ថាប័នដែលមានលក្ខណៈជាវិសមិតភាពនោះ ឬក៏ស្នើសុំព្យួរវិជ្ជាជីវៈមេធាវីដែលអាចព្យួរម្ដងបានរយៈពេល ២ ឆ្នាំ ហើយអាចទៅបំពេញមុខងារក្នុងមុខងារសាធារណៈ។ លោកថា៖ «គណៈមេធាវី ក៏លើកទឹកចិត្ដដល់សាធារណជន និងក្រសួង ស្ថាប័នផ្សេងៗបើបានដឹងថា មេធាវីរូបណាដែលមានវិសមិតភាព ខុសវិជ្ជាជីវៈ គឺអាចជួយផ្ដល់ព័ត៌មានមកគណៈមេធាវីក្នុងការចាត់វិធានការវិន័យ»៕
វីដេអូ៖
