.jpg)
មន្ត្រីនគរបាលជាន់ខ្ពស់ពីប្រទេសអាស៊ានក្នុងសន្និសីទអាស៊ានណាប៉ូល។ រូបថត ក្រសួងមហាផ្ទៃ
ភ្នំពេញៈ សន្និសីទអាស៊ានណាប៉ូលលើកទី ៤០ រយៈពេល ៥ ថ្ងៃដែលកម្ពុជាធ្វើជាម្ចាស់ផ្ទះ បានបញ្ចប់ទៅដោយជោគជ័យ ដោយបានបង្ហាញពីស្មារតីសហប្រតិបត្តិការរវាងប្រទេសនៃអាស៊ានណាប៉ូល ក៏ដូចជាប្រទេសដៃគូសន្ទនា និងអ្នកសង្កេតការណ៍ដើម្បីពង្រឹងការងាររក្សាស្ថិរភាពសន្តិភាពសង្គមតាមរយៈការផ្លាស់ប្តូរបទពិសោធផ្តល់អនុសាសន៍ជាយុទ្ធសាស្ដ្រគ្រប់ជ្រុងជ្រោយក្នុងប្រតិ្តបត្តិការប្រយុទ្ធប្រឆាំងបទល្មើសឆ្លងដែនគ្រប់ទម្រង់។
ប្រទេសកម្ពុជា កាលពីថ្ងៃទី ៤ ខែមីនា ឆ្នាំ ២០២២ បានធ្វើជាម្ចាស់ផ្ទះរៀបចំពិធីបិទសន្និសីទអាស៊ានណាប៉ូលលើកទី ៤០ ដែលបានប្រារព្ធធ្វើឡើងរយៈពេល ៥ ថ្ងៃលើប្រធានបទ «លើកកម្ពស់សុខដុមនីយកម្ម តំបន់មានសន្តិភាព និងស្ថិរភាពជានិរន្តរ៍»។
ពិធីបិទសន្និសីទនេះធ្វើឡើងក្រោមអធិបតីភាពលោក នេត សាវឿន អគ្គស្នងការនៃអគ្គស្នងការដ្ឋាននគរបាលជាតិកម្ពុជា និងជាប្រធានសន្និសីទអាស៊ានណាប៉ូលលើកទី ៤០ ឆ្នាំ ២០២២ និងមានការចូលរួមពីប្រធានគណៈប្រតិភូ អាស៊ាន ដៃគូពិភាក្សា និងមន្ត្រីសង្កេតការណ៍ ឯកអគ្គរាជទូត នៃបណ្ដាប្រទេសសមាជិកអាស៊ាន ព្រមទាំង ឯកអគ្គរាជទូត ឯកអគ្គរដ្ឋទូតនៃដៃគូពិភាក្សាប្រចាំកម្ពុជាថ្នាក់ដឹកនាំជាន់ខ្ពស់របស់កម្ពុជា និងភ្ញៀវកិត្តិយសជាតិ-អន្ដរជាតិជាច្រើនរូបទៀត។ សន្និសីទនេះបានធ្វើនៅសណ្ឋាគាររ៉េស៊ីដង់សុខាភ្នំពេញ។
សន្និសីទនេះក៏បានរៀបចំពិធីចុះហត្ថលេខារួមគ្នាព្រមទាំងបានប្រគល់ជូននិមិត្តសញ្ញាអាស៊ានណាប៉ូលលើកទី ៤១ ពីលោក នេត សាវឿន ដែលជាប្រធានសន្និសីទអាស៊ានណាប៉ូលលើកទី ៤០ ជូនដល់លោក Kham King Phauilamonyvong អគ្គស្នងការនៃអគ្គស្នងការដ្ឋាននគរបាលជាតិឡាវ ដើម្បីធ្វើជាម្ចាស់ផ្ទះរៀបចំសន្និសីទអាស៊ានណាប៉ូលលើកទី ៤១ ជាអ្នកបន្តវេន។
លោក នេត សាវឿន ថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ ចំពោះការខិតខំប្រឹងប្រែងរបស់គណៈកម្មការរៀបចំដែលបានរួមចំណែកធ្វើឱ្យសន្និសីទនេះដំណើរការបានយ៉ាងជោគជ័យ។ លោកថ្លែងថា ក្នុងរយៈពេល ៥ ថ្ងៃកន្លងទៅនេះ ដោយមានការផ្លាស់ប្តូរបទពិសោធ ព្រមទាំងផ្តល់អនុសាសន៍យ៉ាងផុសផុល មានលក្ខណៈជាយុទ្ធសាស្ត្រក្នុងប្រតិ្តបត្តិការប្រយុទ្ធប្រឆាំងបទល្មើសឆ្លងដែនគ្រប់ទម្រង់នឹងគ្រប់ប្រភេទជាពិសេសបទល្មើសថ្មីៗអាចទទួលបានលទ្ធផលប្រកបដោយផ្លែផ្កា។
លោកបន្តថា៖ «តាមរយៈយុទ្ធសាស្ត្រ និងសេចក្តីថ្លែងការណ៍រួមដែលបានចុះហត្ថលេខារួមគ្នាកាលពីពេលកន្លងទៅ យើងបានដាក់ចេញផែនការសកម្មភាពគួបផ្សំជាមួយផែនការទំនាក់ទំនងកិច្ចសហប្រតិបត្តិការយ៉ាងជិតស្និទ្ធប្រកបដោយទស្សនៈសុទិដ្ឋិនិយមរវាងសមាជិកអាស៊ានណាប៉ូល និងបណ្តាប្រទេសជាដៃគូ»។
លោកសង្ឃឹមថា កងកម្លាំងអាស៊ាននឹងបង្កើតស្នាដៃដ៏ធំធេង បង្កើតសមិទ្ធផលថ្មីៗបន្ថែមទៀត ជាពិសេសការបង្កើតបរិយាកាសសុខដុមនីយកម្មធ្វើឱ្យអាស៊ានធ្វើដំណើរឆ្ពោះទៅរកសន្តិភាព ស្ថិរភាព សុវត្ថិភាព និងឯកភាពបានយ៉ាងល្អប្រសើរថែមទៀត។
លោក Kham King Phauilamonyvong ដែលនឹងធ្វើជាម្ចាស់ផ្ទះរៀបចំសន្និសីទអាស៊ានណាប៉ូលលើកទី ៤១ បានមានចំណាប់អារម្មណ៍រីករាយដែលបានធ្វើជាម្ចាស់ផ្ទះរៀបចំសន្និសីទអាស៊ានណាប៉ូលលើកទី ៤១ បន្តពីកម្ពុជា។
លោកក៏បានវាយតម្លៃខ្ពស់ ចំពោះនគរបាលជាតិកម្ពុជា ដែលបានរៀបចំសន្និសីទអាស៊ានណាប៉ូលលើកទី ៤០ នេះប្រកបដោយជោគជ័យ។
លោកបានថ្លែងថា សម្រាប់ការបដិសណ្ឋារកិច្ចដ៏កក់ក្តៅរបស់នគរបាលជាតិកម្ពុជា បានធ្វើឱ្យប្រទេសដែលជាសមាជិកអាស៊ានណាប៉ូល មានសេចក្តីរីករាយ ហើយការរៀបចំសន្និសីទនេះទទួលបានជោគជ័យដ៏ត្រចះត្រចង់ព្រមទាំងបានសម្រេចនូវជោគជ័យមួយចំនួន ដើម្បីធ្វើឱ្យកិច្ចសហប្រតិបត្តិការរវាងនគរបាលជាតិអាស៊ាន កាន់តែរឹងមាំថែមទៀត រួមបញ្ចូលទាំងការពិភាក្សា និងការអនុម័តលើប្រធានបទសំខាន់ៗដែលបានពិភាក្សាគឺមានបំណងពង្រឹងកិច្ច- សហប្រតិបត្តិការព្រមទាំងចែករំលែកចំណេះដឹងបទពិសោធក្នុងចំណោមដៃគូ និងប្រទេសជុំវិញពិភពលោកដើម្បីប្រឆាំងនឹងបទល្មើសឆ្លងដែន។
លោក Kham King Phauilamonyvong បានថ្លែងបន្តថា សន្និសីទអាស៊ានណាប៉ូលលើកទី ៤០ នេះបានបង្ហាញពីស្មារតីនៃកិច្ចសហប្រតិបត្តិការរវាងប្រទេសនៃអាស៊ានណាប៉ូល ក៏ដូចជាប្រទេសដៃគូសន្ទនា និងអ្នកសង្កេតការណ៍ដើម្បីពង្រឹងការងាររក្សាស្ថិរភាពសន្តិភាពសង្គម។
លោកបន្ថែមថា ក្នុងការរៀបចំសន្និសីទអាស៊ានណាប៉ូលលើកទី ៤១ នៅក្នុងប្រទេសឡាវ នគរបាលជាតិឡាវទន្ទឹងរង់ចាំស្វាគមន៍យ៉ាងកក់ក្តៅ ទទួលសមាជិកអាស៊ានណាប៉ូល ដើម្បីចូលរួមប្រជុំ និងធ្វើការពិភាក្សាពង្រឹងនូវកិច្ចសហប្រតិបត្តិការនានា នៅក្នុងពេលខាងមុខ៕
