មណ្ឌលគិរីៈ លោក ថង សាវុន អភិបាលខេត្តមណ្ឌលគិរីបានណែនាំទៅដល់មន្ត្រីក្រោមឱវាទក្នុងខេត្ត ធ្វើការទប់ស្កាត់ និងបញ្ឈប់រាល់សកម្មភាពពុះដីឡូត៍លក់ និងសកម្មភាពសាងសង់គ្មានច្បាប់អនុញ្ញាតត្រឹមត្រូវ។ នេះបើយោងតាមលិខិតរបស់លោកកាលពីថ្ងៃទី ៣ ខែមីនា នេះ។
លោកបញ្ជាក់ថា៖ «ខ្ញុំសូមជម្រាបជូនលោកអភិបាលក្រុង ស្រុក មេឃុំ និងចៅសង្កាត់ទាំងអស់ដែលស្ថិតក្នុងភូមិសាស្ត្រខេត្តមណ្ឌលគិរីជ្រាបថា បច្ចុប្បន្នខេត្តមណ្ឌលគិរីបាននិងកំពុងមានការអភិវឌ្ឍ និងរីកចម្រើនខ្លាំងលើផ្នែកសេដ្ឋកិច្ច ជាពិសេសលើវិស័យដីធ្លី និងសំណង់។ ជាមួយគ្នានៃដំណើរការអភិវឌ្ឍយ៉ាងល្អប្រសើរនេះ ក៏មានបញ្ហាប្រឈមយ៉ាងធ្ងន់ធ្ងរ ជុំវិញការធ្វើអាជីវកម្មលើដីធ្លីដោយពុះឡូត៍លក់ ឬសាងសង់សំណង់ ដែលមិនមានច្បាប់អនុញ្ញាតត្រឹមត្រូវ»។
លោកបានឱ្យដឹងថា អាជីវកម្ម លើដីធ្លី ដោយពុះឡូត៍លក់ ឬសាងសង់សំណង់ ដែលមិនមានច្បាប់អនុញ្ញាតត្រឹមត្រូវទាំងនោះរួមមាន ការពុះដីឡូត៍លក់ដោយមិនបានផ្ទេរសិទ្ធិ និងមិនបានធ្វើប្លង់បំបែកក្បាលដីជូនអ្នកទិញឱ្យបានស្របច្បាប់។ ការពុះដីឡូត៍លក់ដោយមិនមានប្លង់កម្មសិទ្ធិខ្លួនឯងត្រឹមត្រូវ និងលក់ដីឡូត៍ដែលមិនស្របច្បាប់ទៅឱ្យអ្នកទិញ។ ការពុះដីឡូត៍លក់ ឬសាងសង់ដោយគ្មានច្បាប់អនុញ្ញាតពីអាជ្ញាធរ និងអង្គភាពពាក់ព័ន្ធត្រឹមត្រូវ និងពុះដីឡូត៍លក់ ឬសាងសង់ដោយអនាធិបតេយ្យ ដែលមិនគោរពតាមប្លង់គោល ផែនការប្រើប្រាស់ដី និងបទប្បញ្ញត្តិនគរូបនីយកម្មឱ្យបានត្រឹមត្រូវជាដើម។
លោក ថង សាវុន បញ្ជាក់ថា៖ «ដើម្បីពង្រឹងគុណភាពនៃការប្រើប្រាស់ដី ការគ្រប់គ្រងដីធ្លី និងសំណង់ ប្រកបដោយប្រសិទ្ធភាព និងសុវត្ថិភាពខ្ពស់ សូមអាជ្ញាធរពាក់ព័ន្ធខាងលើត្រូវចាត់វិធានការទប់ស្កាត់ និងរាយការណ៍ឱ្យបានទាន់ពេលវេលាចាប់ពីពេលនេះតទៅ ព្រមទាំងត្រូវធ្វើការផ្សព្វផ្សាយ ជូនដំណឹង និងណែនាំឱ្យបានច្បាស់លាស់ ដល់អ្នកដែលមានបំណងពុះដីឡូត៍លក់ ឬសាងសង់ដើម្បីលក់ ជួល ឬសម្រាប់រស់នៅដោយខ្លួនឯង នៅក្នុងមូលដ្ឋានរបស់ខ្លួន»។
លោកថ្លែងថា ត្រូវសុំច្បាប់អនុញ្ញាត មុននឹងសាងសង់ ឬធ្វើការពុះដីឡូត៍របស់ខ្លួនដើម្បីលក់ ឬដោះដូរ។ ចំពោះនីតិវិធី ឬ បែបបទនៃការស្នើសុំច្បាប់អនុញ្ញាតម្ចាស់សំណើត្រូវមកទំនាក់ទំនងជាមួយការិយាល័យច្រកចេញចូលតែមួយរដ្ឋបាលខេត្ត ឬមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ឬចំណុះអង្គភាពស្ថិតក្នុងដែនសមត្ថកិច្ចក្រសួង ខេត្ត ក្រុង ស្រុក ដោយយោងទៅតាមសណ្ឋាននៃករណីដីធ្លីទាំងនោះជាក់ស្ដែង ដើម្បីរៀបចំការស្នើសុំអនុញ្ញាតច្បាប់។
ត្រូវដាក់តាំងបង្ហាញឱ្យបានច្បាស់ អំពីឯកសារស្របច្បាប់ដែលបានអនុញ្ញាតឱ្យពុះដីឡូត៍លក់ ឬសាងសង់នៅទីតាំងដីផ្ទះជាក់ស្តែង និងការដ្ឋានសំណង់នោះតែម្តង។ ត្រូវប្រគល់ជូនអតិថិជននូវឯកសារបញ្ជាក់ចម្លងពីច្បាប់ដើមនូវលិខិតស្របច្បាប់នៃការអនុញ្ញាត ឱ្យពុះដីឡូត៍លក់ ឬការសាងសង់នៅលើដី រួមមាន អាជ្ញាប័ណ្ណ ឬលិខិតស្របច្បាប់ដែលបានអនុញ្ញាតពីអាជ្ញាធរ និងអង្គភាពពាក់ព័ន្ធលើការសាងសង់ ឬការពុះដីឡូត៍លក់ ព្រមជាមួយនឹងវិញ្ញាបនបត្រសម្គាល់ម្ចាស់អចលនវត្ថុ បណ្ណកម្មសិទ្ធិ និងឯកសារពាក់ព័ន្ធសំខាន់ៗផ្សេងទៀត។
លោកបញ្ជាក់ថា៖ «ចំពោះករណីអ្នកអភិវឌ្ឍន៍ដី និងសំណង់ប្រព្រឹត្តបទល្មើសដូចខាងលើ ឬការឱ្យដៃរបស់អាជ្ញាធរ ឬអង្គភាពពាក់ព័ន្ធណាមួយក្នុងការឃុបឃិតត្រូវមានវិធានការផាកពិន័យ ឬ និងទទួលទោសតាមច្បាប់ជាធរមាន»។
តំណាងសហគមន៍ជនជាតិដើមភាគតិចខេត្តមណ្ឌលគិរី លោក គ្រើង តុលា បានគាំទ្រចំពោះការដាក់ចេញបទបញ្ជានេះ ដើម្បីជាការថែរក្សា ការពារចំណូល និងទ្រព្យសម្បត្ដិរបស់រដ្ឋ។
លោកបានឱ្យដឹងថា នៅក្នុងភូមិសាស្ដ្រខេត្ដមណ្ឌលគិរីបច្ចុប្បន្ន គឺពិតជាមានកំណើន សកម្មភាពពុះដីឡូត៍លក់ច្រើន ប៉ុន្ដែលោកបញ្ជាក់ថាលោកមិនអាចដឹងថា អ្នកលក់ដីឡូត៍ទាំងនោះស្របច្បាប់ឬអត់នោះទេ ដោយសារស្ថិតិនៅក្រោមសមត្ថកិច្ចគ្រប់គ្រងរបស់អាជ្ញាធរ។
លោកបញ្ជាក់ថា៖ «ចំពោះសកម្មភាពពុះដីឡូត៍លក់ដោយអនាធិបតេយ្យ និងការសាងសង់ដែលមិនមានច្បាប់ វាពាក់ព័ន្ធគ្នាជាប្រព័ន្ធមួយ ដូចពាក្យចាស់ថា កន្ទេលធំបន្លំដេក។ មានន័យថា អ្នកដែលហ៊ានធ្វើសកម្មភាពល្មើសច្បាប់នេះ បើសិនជាមិនមានអ្នកមានលុយ មានអំណាចជួយគាំទ្រ មិនមានអាជ្ញាធរភូមិ ឃុំ ចុះហត្ថលេខា ទទួលដឹងឮ គឺមិនមានអ្នកណាហ៊ានទៅទិញដីឡូត៍អនាធិបតេយ្យនោះទេ»៕
វីដេអូ៖