ភ្នំពេញៈ ប្រជាពលរដ្ឋជាច្រើនគ្រួសារក្នុងសង្កាត់ផ្សារដើមគរបាននាំគ្នាផ្ទុះការតវ៉ាទាំងយប់ ក្រោយពីអាជ្ញាធរខណ្ឌទួលគោក បានចុះបង្ក្រាបចាប់យកផ្លែឈើរបស់ពួកគេ កាលពីយប់ថ្ងៃទី ០៦ ខែ មីនា ឆ្នាំ ២០២២។ នៅក្នុងការតវ៉ានោះ ក្រុមប្រជាពលរដ្ឋ បានធ្វើការបិទកំណាត់ផ្លូវម៉ៅសេទុងមួយចំហៀងទាំងយប់ ត្រង់ចំណុចកែងផ្លូវ ២៤៥ ចូលទៅក្នុងផ្សារនាគមាស ដើម្បីទាមទារដំណោះស្រាយ។
អ្នកស្រី លី ទីណា អាយុ ៤២ ឆ្នាំ ដែលបានចូលរួមនៅក្នុងការតវ៉ានោះ បានប្រាប់ ភ្នំពេញ ប៉ុស្តិ៍ថា កន្លងមកអាជ្ញាធរខណ្ឌទួលគោក បានចុះធ្វើសណ្ដាប់ធ្នាប់សាធារណៈ ដោយហាមប្រាមប្រជាពលរដ្ឋលក់ដូរបន្លែ ផ្លែឈើនៅតាមចិញ្ចើមផ្លូវ ដែលប៉ះពាល់ដល់ផ្លូវថ្មើរជើងសាធារណៈ និងបង្កការកកស្ទះចរាចរណ៍។
អ្នកស្រី ទីណា បានបញ្ជាក់ថា៖«ក្រៅពីការចុះធ្វើសណ្ដាប់ធ្នាប់ ក្រុមអាជ្ញាធរក៏បានបាញ់គំនូសថ្នាំព័ណ៌ក្រហម ដើម្បីកំណត់ទីតាំងឲ្យប្រជាពលរដ្ឋធ្វើការលក់ដូរ ដែលមិនបង្កផលប៉ះពាល់ដល់សណ្ដាប់ធ្នាប់សាធារណៈ ហើយខ្ញុំទាំងអស់គ្នាជាប្រជាពលរដ្ឋក៏បានគាំទ្រនិងអនុវត្តតាមការណែនាំរបស់អាជ្ញាធរផងដែរ»។
អ្នកស្រីបានបន្តថា ប៉ុន្តែនៅថ្ងៃទី ០៤ ខែ មីនា ឆ្នាំ ២០២២ ស្រាប់តែលោកអភិបាលខណ្ឌទួលគោក ជា ពិសី បានចេញលិខិតជូនដំណឹងមួយ ដោយបានហាមឃាត់ពួកគាត់ជាប្រជាពលរដ្ឋ ដែលមានផ្ទះនៅសងខាងផ្លូវម៉ៅសេទុង ចាប់ពីស្តប់ផ្លូវ ២៣០ ដល់ផ្លូវ ៣៣៦ លក់ដូរបន្លែ និងផ្លែឈើ និងបានព្រមានចាត់វិធានការរដ្ឋបាលមកលើពួកគាត់ផងដែរ ប្រសិនបើពួកគាត់មិនអនុវត្តតាមសេចក្ដីជូនដំណឹងនោះ។
អ្នកស្រី ទីណា បាននិយាយទៀតថា៖«សេចក្ដីជូនដំណឹងនោះ បានបង្កប់នូវភាពរើសអើង និងរឹតត្បិតការប្រកបមុខរបរស្របច្បាប់សម្រាប់ចិញ្ចឹមជីវិតរបស់យើងខ្ញុំជាប្រជាពលរដ្ឋក្រីក្រនៅក្នុងតំបន់នេះ»។
អ្នកស្រីបានចោទជាសំណួរថា បើមិនឲ្យពួកគាត់លក់បន្លែ ផ្លែឈើ តើឲ្យពួកគាត់ទៅប្រកបមុខរបរអ្វី ខណៈដែលមុនរបរនេះ ពួកគាត់ខ្ចីបុលធនាគារមកធ្វើជាដើមទន់ មិនទាន់ទាំងសងធនាគេរួចផងនោះ? តើមុខរបរលក់បន្លែ ផ្លែឈើនេះ វាជាមុខរបរខុសច្បាប់ដែរឬយ៉ាងណា?
អ្នកស្រីបានបន្តថា៖«អាជ្ញាធរមិនទាន់ទាំងបានផ្ដល់ការពន្យល់អំពីករណីនេះឲ្យបានច្បាស់លាស់ដល់យើងខ្ញុំផង ស្រាប់តែកាលពីយប់ [ថ្ងៃទី ០៦ ខែ មីនា ឆ្នាំ ២០២២] បានដាក់កម្លាំងចុះមកចាប់រឹបអូសនូវផ្លែឈើរបស់ខ្ញុំជាច្រើនមុខ គិតជាប្រាក់សរុបជិត ២ លានរៀល។ មិនតែប៉ុណ្ណោះបានចូលចាប់រឹបអូសយក បន្លែ ផ្លែឈើ និងសម្ភារៈប្រើប្រាស់នៅក្នុងផ្ទះរបស់ប្រជាពលរដ្ឋជាអាជីវករក្នុងតំបន់នេះ មួយចំនួនទៀត»។
ស្រដៀងគ្នានេះ អ្នកចូលរួមការតវ៉ាម្នាក់ទៀត គឺ លោក ឡេវ ប៊ុន្នី អាយុ ៦០ ឆ្នាំ បានប្រាប់ ភ្នំពេញ ប៉ុស្តិ៍ថា ក្រុមអាជ្ញាធរ បានចូលមកអូសយកបន្លែ ផ្លែឈើ រួមមាន ម្នាស់ ម៉ាក់ប្រេងម៉ាក់ប្រាំង ពុទ្រា និង ប៉ិះគក់ ដល់ខាងក្នុងផ្ទះរបស់គាត់សរុបជិត១០០គីឡូក្រាម។
លោកថ្លែងថា៖«ខ្ញុំយល់ថា សកម្មភាពរបស់អាជ្ញាធរកាលពីយប់មិញ គឺសាហាវដូចសម័យប៉ុលពតចឹង»។
បើតាមលោកប៊ុន្នី ក្រុមសមត្ថកិច្ច បានយកលេសរឿងប្រជាពលរដ្ឋ ដែលបានដឹកបន្លែផ្លែឈើពីតាមបណ្ដាខេត្តនានា តាមរឺម៉កមកលក់លើចិញ្ចើមផ្លូវ កាលពីគ្រាមុនបង្កការកកស្ទះចរាចរណ៍លើកំណាត់ផ្លូវម៉ៅសេទុង ចាប់ពីចំណុចភ្លើងស្តប់កែងផ្លូវ ២៣០ ដល់ចំណុចភ្លើងស្ដប់កែវផ្លូវ៣៣៦ មកដាក់សម្ពាធមកលើពួកគាត់ ដែលជាប្រជាពលរដ្ឋក្នុងមូលដ្ឋានសង្កាត់ផ្សារដើមគរ។
លោ ប៊ុន្នី បាននិយាយទៀតថា៖«អ្នកលក់លើចិញ្ចើមផ្លូវមិនមែនយើងខ្ញុំជាម្ចាស់ផ្ទះទេ គឺជាពលរដ្ឋដែលមកពីស្រែចម្ការនៃបណ្ដារខេត្តផ្សេង។បម្រាមរបស់អាជ្ញាធរដែលហាមមិនឲ្យយើងខ្ញុំជាប្រជាពលរដ្ឋលក់ដូរបន្លែ ផ្លែឈើនៅក្នុងផ្ទះរបស់ខ្លួន គឺជាការរំលោភបំពាន សិទ្ធិសេរីភាពក្នុងការជ្រើសរើសមុខរបរចិញ្ចឹមជីវិតស្របច្បាប់ »។
ទន្ទឹមជាមួយគ្នា ក្រុមអ្នកតវ៉ា ប្រមាណ៤០នាក់ បានលើកឡើងពីគោលជំហររបស់ខ្លួនក្នុងការតវ៉ាបិទផ្លូវនេះយ៉ាងដូច្នេះថា៖«យើងខ្ញុំតវ៉ាបិទកំណាត់ផ្លូវម៉ៅសេទុងនៅយប់[ថ្ងៃទី០៦-០៣-២០២២]នេះ គឺដើម្បីទាមទារដំណោះស្រាយ ក្នុងការប្រកបមុររបរចិញ្ចឹមជីវិតស្របច្បាប់ឡើងវិញប៉ុណ្ណោះ»។
ជុំវិញករណីនេះ លោក ជា ពិសី អភិបាលខណ្ឌទួលគោក បានប្រាប់ភ្នំពេញប៉ុស្តិ៍ថា មុនពេលចុះអនុវត្តវិធានការរដ្ឋបាល អាជ្ញាធរបានចុះផ្សព្វផ្សាយ និងអប់រំណែនាំដល់បងប្អូនប្រជាពលរដ្ឋ និងអាជីវករមួយក្ដាប់តូចក្នុងតំបន់នោះជាច្រើនលើកច្រើនសារមកហើយ ប៉ុន្តែក្រុមជនមួយក្ដាប់តូចទាំងនោះនៅតែគឃ្លើន បំពានទៅនឹងសេចក្ដីណែនាំជូនដំណឹងរបស់អាជ្ញាធរ ដោយបានញុះញង់ ជេរប្រមាថដល់សមត្ថកិច្ចអនុវត្តច្បាប់។
លោកបានបញ្ជាក់ថា៖ «ជាក់ស្ដែងនៅយប់ថ្ងៃទី ០៦ ខែមីនានេះ ក្រុមជនមួយក្ដាប់តូចទាំងនោះ បានលក់ដូរបន្លែ ផ្លែឈើលើចិញ្ចើមផ្លូវ បង្កភាពកកស្ទះផ្លូវសាធារណៈ ហើយបានប្រើអំពើហិង្សា ដោយយកផ្លែស្វាយ និង ផ្លែចេក គប់មកលើកម្លាំងសមត្ថកិច្ច ដែលចុះអនុវត្តច្បាប់ ព្រមទាំងបានយកសម្ភារៈមួយចំនួនមករាំងខ្ទប់កំណាត់ផ្លូវម៉ៅសេទុង ត្រង់ចំណុចកែងផ្លូវ២៤៥ ធ្វើការតវ៉ា ដោយជេរប្រមាថមកលើកម្លាំងសមត្ថកិច្ចយើង ក្រោយពីសមត្ថកិច្ចយើងបានសម្រេចអនុវត្តវិធានការរដ្ឋបាលចាប់យកផ្លែឈើរបស់ពួកគេ ដែលលក់លើចិញ្ចើមផ្លូវ មិនមែនក្នុងផ្ទះនោះទេ»។
បើតាមការអះអាងរបស់លោក ជា ពិសី ក្នុងអំឡុងពេល នៃការតវ៉ាបិទផ្លូវនោះ មានប្រជាពលរដ្ឋ ជាអ្នកដំណើរតាមម៉ូតូ ២-៣នាក់ បានគ្រោះថ្នាក់ចរារចណ៍ ដោយសារកិនលើផ្លែស្វាយ និង ផ្លែចេកដែលក្រុមអ្នកតវ៉ាទាំងនោះ បានគប់មកលើអាជ្ញាធរ ហើយបង្កការរាយប៉ាយនៅលើដងផ្លូវម៉ៅសេទុងត្រង់ចំណុចខាងលើនេះ។
ជាមួយគ្នានេះ លោកបានអំពាវនាវ ដល់ក្រុមអ្នកតវ៉ាទាំងនេះ បញ្ឈប់សកម្មភាពរារាំងដល់ការអនុវត្តច្បាប់របស់សមត្ថកិច្ចជាបន្ទាន់ ជាពិសេសអ្នកធ្លាប់បានប្រព្រឹត្តអំពើហិង្សាមកលើសមត្ថកិច្ចនាពេលកន្លងមកនិងពេលថ្មីៗនេះ ដោយលោកព្រមានថា៖«បើពុំនោះ សមត្ថកិច្ចយើងនឹងចាត់វិធានការច្បាប់ ដោយធ្វើការឃាត់ខ្លួន និងកសាងសំណុំរឿងបញ្ជូនទៅតុលាការ»៕