.jpg)
ជនសង្ស័យក្នុងករណីហិង្សានៅរោងការ។ រូបថត FB
ស្វាយរៀងៈ មនុស្ស ៤ នាក់ ក្នុងនោះមានកូនកំលោះម្នាក់ផងនោះ ត្រូវបានតុលាការឃុំខ្លួនក្នុងពន្ធនាគារ កាលពីថ្ងៃទី ៦ មីនា បន្ទាប់ពីសមត្ថកិច្ចស្រាវជ្រាវចាប់ខ្លួនពាក់ព័ន្ធបង្កហិង្សាវាយភ្ញៀវក្នុងរោងការប្រព្រឹត្ត កាលពីយប់ថ្ងៃទី ៣ មីនា នៅក្នុង ភូមិពោធិ៍ថ្មី ឃុំស្វាយតាយាន ស្រុកកំពង់រោទិ៍ ខេត្តស្វាយរៀង។
លោក ពេជ្រ ផល្លា អ្នកនាំពាក្យតុលាការខេត្ត ស្វាយរៀងឱ្យដឹងនៅថ្ងៃទី ៧ មីនាថា ជនដែលត្រូវតុលាការឃុំខ្លួនមានឈ្មោះ ស៊ុន រឿន អាយុ ២២ ឆ្នាំ ទី២-ឈ្មោះ រ៉ា ដេត ភេទប្រុស អាយុ ៤៤ ឆ្នាំ ទី៣-ឈ្មោះហេង ហៃ អាយុ ១៨ ឆ្នាំ និងឈ្មោះស៊ិន ហួត អាយុ ២៤ ឆ្នាំ។ ជនទាំង ៤ នាក់នេះត្រូវបានចៅក្រមស៊ើបសួរចេញដីកាឃុំនៅថ្ងៃទី ៦ មីនា ឆ្នាំ ២០២២។
លោកថ្លែងថា៖«ចៅក្រមស៊ើបសួរសម្រេចចេញដីកាឃុំក្នុងពន្ធនាគារខេត្តស្វាយរៀងបន្ទាប់ពីត្រូវតំណាងអយ្យការចោទបទហិង្សាដោយចេតនាមានស្ថានទម្ងន់ទោសតាមមាត្រា២១៨ នៃក្រមព្រហ្មទណ្ឌ»។
ពាក់ព័ន្ធបទចោទនេះ បើតាមមាត្រា ២១៨ នៃក្រមព្រហ្មទណ្ឌគឺជនទាំង ៤ នាក់នឹងត្រូវជាប់ពន្ធនាគារក្នុងម្នាក់ៗពី ២ ឆ្នាំដល់ ៤ ឆ្នាំ និងត្រូវទទួលរងនូវពិន័យពី ៤ លាន ទៅ ១០ លានរៀលផង។
លោក ហែម សាមុត អធិការគរបាលស្រុកកំពង់រោទិ៍បានឱ្យដឹងនៅថ្ងៃទី ៧ ខែ មីនាថា មុនកើតហេតុមានពិធីរៀបពាហ៍ពាហ៍មួយនៅក្នុងភូមិពោធិ៍ថ្មី ឃុំស្វាយតាយាន ស្រុកកំពង់រោទិ៍ ខេត្តស្វាយរៀង។ ខណៈភ្ញៀវកំពុងសប្បាយក្នុងពិធីស្រាប់តែនៅវេលាម៉ោងជាង ៨ យប់ កើតមានទំនាស់វាយតប់គ្នានៅក្នុងរោងការនោះធ្វើឱ្យភ្ញៀវដែលចូលរួមក្នុងពីធីត្រូវរត់ចេញព្រោះក្នុងជម្លោះនោះមានគប់កែវគប់ចានដាក់គ្នា។
លោកបន្តថា បន្ទាប់ពីកើតហេតុ និងមានប្រជាពលរដ្ឋរាយការណ៍ប្រាប់នគរបាលប៉ុស្តិ៍ឃុំស្វាយតាយានបានចុះទៅធ្វើអន្តរាគមន៍បន្ទាន់ហើយបានស្រាវជ្រាវឃាត់ខ្លួនបានជនបង្ក ២ នាក់។ លុះព្រឹកឡើងថ្ងៃទី ៤ មីនា សមត្ថកិច្ចស្រាវជ្រាវឃាត់ខ្លួនបានជនបង្ក២នាក់ទៀងក្នុងនោះឈ្មោះ ស៊ុន រឿន ជាកូនកំលោះដែលជាម្ចាស់ដើមការតែម្តង។ ទន្ទឹមនឹងនោះមានបុរសឈ្មោះ យុទ្ធ ដែលជាភ្ញៀវបានរងរបួសក្បាលតែរបួសស្រាលទេ។
លោកថា៖ «បើតាមសមត្ថកិច្ចសាកសួរក្រុមជនបង្កថា មុនដំបូងឈ្មោះហេង ហៃដែលជាមិត្តភ័ក្តរបស់កូនកំលោះបានបង្កជម្លោះជាមួយភ្ញៀវ។ ពេលឃើញអ៊ីចឹងឈ្មោះស៊ុន រឿនជាកូនកំលោះ ទៅជួយវាយនឹងគេដែរ។ ឥឡូវតុលាការឃុំទាំង ៤ នាក់នោះហើយ»៕
