ភ្នំពេញៈ ក្នុងរយៈពេល ២ ខែដើមឆ្នាំនេះ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) រកឃើញដេប៉ូ/ស្ថានីយលក់ប្រេងឥន្ធនៈ ២៦៧ កន្លែងនៅទូទាំងប្រទេស ដែលមិនមានអនុលោមភាព ក្នុងការលក់ប្រេងឥន្ធនៈឱ្យអតិថិជន។
របាយការណ៍អគ្គនាយកដ្ឋាន ក.ប.ប បានឱ្យ ភ្នំពេញ ប៉ុស្តិ៍ ដឹងនៅថ្ងៃទី ៧ មីនាថា ក្នុងរយៈពេល ២ ខែនេះ មន្ត្រីបានចុះត្រួតពិនិត្យភាពអនុលោមទៅនឹងបទប្បញ្ញត្តិ ពាក់ព័ន្ធនឹងការធ្វើអាជីវកម្មប្រេងឥន្ធនៈនៅតាមបណ្តាស្ថានីយ និងដេប៉ូនានា នៅទូទាំងប្រទេស បានចំនួន ៧៦៨។ ក្នុងចំណោមស្ថានីយ និងដេប៉ូទាំងនោះ គឺបានរកឃើញដេប៉ូប្រេងឥន្ធនៈចំនួន ២៦៧ ស្មើ ៣៤,៧៦% ប្រកបអាជីវកម្មមិនសុចរិត។
អគ្គនាយកដ្ឋាន ក.ប.ប បញ្ជាក់ថា៖ «ដេប៉ូ/ស្ថានីយលក់ប្រេងឥន្ធនៈចំនួន ២៦៧ កន្លែងទាំងនេះ គឺសុទ្ធសឹងបានលក់ប្រេងឥន្ធនៈ និងសាំងជូនអតិថិជនមិនគ្រប់ចំនួននៃលីត្រ និងគ្មានគុណភាព។ បើប្រៀបធៀបជាមួយរយៈពេលដូចគ្នានៃចុងឆ្នាំ ២០២១ បទល្មើសពាក់ព័ន្ធនឹងអាជីវកម្មប្រេងឥន្ធនៈមានការថយចុះចំនួន ៣,៥៥ ភាគរយ»។
សូមជម្រាបថា ក្នុងរយៈពេល ០២ ខែចុងឆ្នាំ ២០២១ គឺខែវិច្ឆិកា និងខែធ្នូ មន្ត្រី ក.ប.ប បានចុះត្រួតពិនិត្យភាពអនុលោមទៅនឹងបទប្បញ្ញត្តិ ពាក់ព័ន្ធនឹងការធ្វើអាជីវកម្មប្រេងឥន្ធនៈនៅតាមបណ្តាស្ថានីយ និងដេប៉ូនានានៅទូទាំងប្រទេសបានចំនួន ៦៦៣ ដោយរកឃើញដេប៉ូប្រេងឥន្ធនៈ ចំនួន ២៥៤ ស្មើ ៣៨,៣១% ប្រកបអាជីវកម្មមិនសុចរិត។
លោក ផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយក ក.ប.ប បានប្រាប់ ភ្នំពេញ ប៉ុស្តិ៍ នៅថ្ងៃទី ៧ មីនាថា ដេប៉ូ/ស្ថានីយលក់ប្រេងឥន្ធនៈទាំងនេះ គឺត្រូវបានអគ្គនាយដ្ឋាន ធ្វើការពិន័យជាអន្តរការណ៍ទៅតាមការកំណត់ដោយច្បាប់។
យ៉ាងណាក្តី លោក ផាន អូន បញ្ជក់ថា ក្នុងករណីដេប៉ូ/ស្ថានីយលក់ប្រេងឥន្ធនៈប្រព្រឹត្តល្មើសលើកទី១ គឺពួកគេទទួលពិន័យជាអន្តរការណ៍ ហើយបើរកឃើញប្រព្រឹត្តកំហុសដដែលទៀតជាលើក២ នឹងត្រូវបានពិន័យទ្វេគុណ។ បន្ថែមពីនេះ កបប ក៏នឹងពិនិត្យលទ្ធភាពទៅតាមនីតិវិធីច្បាប់បន្ថែមទៀត ប្រសិនបើដេប៉ូ/ស្ថានីយលក់ប្រេងឥន្ធនៈទាំងនោះនៅតែបន្តប្រព្រឹត្តកំហុសមិនរាងចាលជាច្រើនដង ដូចជាដាក់ចេញវិធានការនានាទៅតាមច្បាប់ រួមទាំងតាមផ្លូវតុលាការផងដែរ។
លោកបញ្ជាក់ថា៖ «ទិន្នន័យដែលយើងបូកសរុបទូទាំងប្រទេស យើងប្រមូលមិនទាន់អស់នៅឡើយទេ។ ដូច្នេះកំហុសលើកទី១ អាចនឹងពិន័យជាអន្តរការណ៍។ នៅពេលយើងបន្តនីតិវិធីបន្តទៀត យើងអាចនឹងមើលកំហុសលើកទី៣ អ៊ីចឹងដើម្បីស្នើទៅគណៈកម្មការកិច្ចការពារអ្នកប្រើប្រាស់ គួរមានវិធានការយ៉ាងណាទៀត យើងមិនទាន់សរុបទិន្នន័យបន្តទៀត»។
យោងតាមច្បាប់ស្តីពីកិច្ចការពារអ្នកប្រើប្រាស់បានឱ្យដឹងថា អំពើមិនសុចរិតទាក់ទងនឹងទំនិញ សេវា ឬការអះអាងដោយបំភាន់ត្រូវទទួលការព្រមានជាលាយលក្ខណ៍អក្សរ ចំពោះបុគ្គលណាដែលប្រព្រឹត្តកំហុសទាំងនេះជាលើកដំបូង។
ច្បាប់នេះក៏បានចែងដែរថា ក្នុងករណីទទួលរងនូវការព្រមានជាលាយលក្ខណ៍អក្សរម្តងរួចហើយនៅតែបន្តប្រព្រឹត្តល្មើស មន្ត្រីអ្នកអនុវត្តច្បាប់ មានសិទ្ធិ ព្យូរ ដកហូត ឬលុបចោលវិញ្ញាបនបត្រចុះបញ្ជីពាណិជ្ជកម្មឬអាជ្ញាប័ណ្ណ ខណៈកំហុសទាំងនេះក៏បានផ្តល់សិទ្ធិឱ្យមន្ត្រីអ្នកអនុវត្តច្បាប់អាចផាកពិន័យអន្តរការណ៍ជាប្រាក់មិនលើសពី២០ លានរៀល ហើយក្នុងករណីមិនរាងចាល ក៏អាចផ្តន្ទាទោសដាក់ពន្ធនាគារពី ៦ ខែ ទៅ ២ ឆ្នាំ និងត្រូវពិន័យជាប្រាក់បន្ថែមផងដែរ៕