.jpg)
CMAC រកឃើញគ្រាប់មិនទាន់ផ្ទុះក្នុងវាលចម្ការ។ រូបថត CMAC
ភ្នំពេញៈ លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) ថ្លែងថា CMAC បាននិងកំពុងអនុវត្តផែនការយុទ្ធសាស្ត្រភូមិគ្មានការគំរាមកំហែងដោយសារគ្រាប់មីន និងសំណល់ជាតិផ្ទុះពីសង្គ្រាម នៅខេត្តពោធិ៍សាត់ បាត់ដំបង ប៉ៃលិន បន្ទាយមានជ័យ ព្រះវិហារ សៀមរាប និងកំពង់ធំ មានន័យថា «ភូមិគ្មានបញ្ហាទាំងគ្រាប់មីន និងគ្រាប់មិនទាន់ផ្ទុះ»។
លោក ហេង រតនា ថា ក្នុងរយៈពេល ៣ ខែ ចាប់តាំងពីខែវិច្ឆិកា ដល់ធ្នូ ២០២១ និងខែមករា ២០២២ អង្គភាព CMAC សម្រេចរំដោះបានភូមិចំនួន ៣២ ភូមិ នៅក្នុងខេត្តចំនួន ៨ ប្រកបដោយជោគជ័យដោយមានប្រជាពលរដ្ឋទទួលផលដោយផ្ទាល់ចំនួន ៤ ៧៣៧ គ្រួសារ ហើយបើសរុបភូមិគោលដៅដែលសម្រេចបាន កាលពីក្នុងឆ្នាំ ២០២១ កន្លងមក មានជាង ១ ២០០ភូមិផងដែរ។
លោកថា៖ «ចាប់ពីឆ្នាំ ២០២២ នេះតទៅ អង្គភាព CMAC បានបង្កើនប្រសិទ្ធភាព និងបង្កើនល្បឿនលើការបោសសម្អាតរំដោះផ្ទៃដីតំបន់រងផលប៉ះពាល់ដោយសារគ្រាប់មីនប្រឆាំងមនុស្សដែលបានដឹង និងមានកំណត់ត្រាពហុកោណក្នុងប្រព័ន្ធទិន្នន័យថ្នាក់ជាតិឱ្យបានឆាប់រហ័សបំផុត ក្នុងគោលដៅធានាសុខសុវត្ថិភាព និងការអភិវឌ្ឍសេដ្ឋកិច្ចសង្គមជូនប្រជាពលរដ្ឋ ក៏ដូចជាការគាំទ្រយ៉ាងពេញទំហឹងចំពោះមហិច្ឆតារបស់រាជរដ្ឋាភិបាលក្នុងការសម្រេចអាណត្តិកម្ពុជាជារដ្ឋភាគីនៃអនុសញ្ញាអន្តរជាតិអូតាវ៉ា ដែលប្រែក្លាយកម្ពុជាគ្មានគ្រាប់មីន ប្រឆាំងមនុស្សនៅត្រឹមចុងឆ្នាំ ២០២៥»។
លោកថា ក្នុងឆ្នាំ ២០២២ នេះ CMAC បានជំរុញការរំដោះខេត្ត គ្មានគ្រាប់មីនចំនួន ៧ រួមមាន រាជធានីភ្នំពេញ ខេត្តកែប ខេត្តកណ្តាល ខេត្តកំពត ខេត្តព្រះសីហនុ ខេត្តតាកែវ និងខេត្តកំពង់ចាម។ ក្នុងនោះបើគិតមកដល់សប្ដាហ៍ទី៣ នៃខែកុម្ភៈ ឆ្នាំ ២០២២ CMAC សម្រេចរំដោះបានរាជធានីភ្នំពេញ និងខេត្តកែប ហើយខេត្តកណ្ដាលកំពុងដំណើរការហៀបនឹងបញ្ចប់ផងដែរ។ CMAC មានកម្លាំងរៀបរយតាមជំនាញចំនួនជាង ១៧០ ក្រុម ក្នុង ១ កងអនុសេនាតូច ហើយអង្គភាពក៏បានកសាងកម្លាំងស្ម័គ្រចិត្តជាបណ្តាញតាមភូមិ ដែលមានអាទិភាពខ្ពស់ចំនួនជាង ៣ ៥០០ ភូមិ និងមានបណ្ដាញស្ម័គ្រចិត្តជិត ៤ ០០០ នាក់ នៅទូទាំងប្រទេស សម្រាប់បម្រើការងារអប់រំផ្សព្វផ្សាយ ការយល់ដឹងពីគ្រោះថ្នាក់ដោយសារមីន និងសំណល់យុទ្ធភណ្ឌសង្គ្រាម។
CMAC ក៏បានយកចិត្តទុកដាក់កសាង សមត្ថភាព និងការពង្រឹងទំនាក់ទំនងរវាងអាជ្ញាធរមូលដ្ឋាន ទាំងកម្រិតភូមិ ឃុំ ស្រុក និងខេត្ត ជាយន្តការថ្នាក់ក្រោមជាតិយ៉ាងមានប្រសិទ្ធភាព ក្នុងការផ្សព្វផ្សាយយល់ដឹងពីគ្រោះថ្នាក់ដោយសារគ្រាប់មីន និងឆ្លើយតបរាល់សំណូមពររបស់ប្រជាពលរដ្ឋ។ ជាក់ស្ដែងក្នុងឆ្នាំ ២០២១ កន្លងទៅនេះ CMAC បានធ្វើការអប់រំយល់ដឹង ពីគ្រោះថ្នាក់ដោយសារគ្រាប់មីន និងសំណល់ជាតិផ្ទុះពីសង្គ្រាមដល់ក្រុមគោលដៅបានចំនួន ១៧ ២២៩ លើក ស្មើនឹង ៥៦៥ ៣៥៩ ខ្នងផ្ទះ មានប្រជាពលរដ្ឋចូលរួមសរុបចំនួន ៩២៨ ៦៩២ នាក់។
លោកថា៖ «កិច្ចការនេះសម្រេច បានជោគជ័យ ក៏បានទទួលនូវការសហការ និងគាំទ្រពេញទំហឹងពីកងយោធពលខេមរភូមិន្ទ អគ្គស្នងការដ្ឋាននគរបាលជាតិ ស្នងការដ្ឋានគ្រប់ខេត្ត-ក្រុង និងជាពិសេសបុស្តិ៍នគរបាលជាតិទូទាំងប្រទេស សំដៅអនុវត្តឱ្យបានសម្រេចគោលការណ៍ភូមិឃុំមានសុវត្ថិភាពផងដែរ»។
លោកថា ក្នុងពេលថ្មីនេះ CMAC ក៏បានបង្កើតប្រព័ន្ធរាយការណ៍ឌីជីថល ដែលមានឈ្មោះថា “CMAC Help!" ដើម្បីបង្កើនភាពងាយស្រួលដល់ប្រជាពលរដ្ឋក្នុងការរាយការណ៍នៅពេលប្រទះឃើញគ្រាប់មីន និងគ្រាប់មិនទាន់ផ្ទុះ ដោយគ្រាន់តែថតរូប ឬផ្តល់ទីតាំងដែលប្រទះឃើញគ្រាប់មីន ឬគ្រាប់មិនទាន់ផ្ទុះរួចផ្ញើចូលមកក្នុងកម្មវិធីនេះជាការស្រេច ហើយកម្មវិធីនេះនឹងដាក់ឱ្យដំណើរការក្នុងពេលឆាប់ៗនេះ។
កម្លាំង CMAC មានលទ្ធភាពប្រតិបត្តិការគ្រប់ខេត្តរាជធានីបានក្នុងក្របខ័ណ្ឌទូទាំងប្រទេស។ CMAC បានធ្វើកំណែទម្រង់ស៊ីជម្រៅលើកម្លាំងប្រតិបត្តិការរបស់ខ្លួនដោយបានធ្វើសមាហរណកម្មជំនាញបោសសម្អាតគ្រាប់មីនរួមមាន អ្នកជំនាញបច្ចេកទេស គ្រឿងចក្រ សុនខ និងកណ្តុរហិតមីនក៏ដូចជាការកែលម្អនីតិវិធីប្រតិបត្តិ និងការបំពាក់សម្ភារបច្ចេកទេសក្នុងការបោសសម្អាតពហុកោណចម្ការមីនប្រមាណ ១៥០ ទៅ ១៧០ គីឡូម៉ែត្រការ៉េ ក្នុង ១ ឆ្នាំៗចាប់ពីឆ្នាំ ២០២២ តទៅ។
ផែនការយុទ្ធសាស្ត្រ ៤ ឆ្នាំ (២០២២-២០២៥ ដើម្បីរំដោះផ្ទៃដីរងផលប៉ះពាល់ដោយសារគ្រាប់មីនប្រឆាំងមនុស្សដែលបានដឹង និងមានកំណត់ត្រាក្នុងទិន្នន័យជាតិចំនួនជាង ៧០០ គីឡូម៉ែត្រការ៉េ៕
