.jpg)
បុរសជាប្ដីដែលវាយសម្លាប់ប្រពន្ធ កាលពីថ្ងៃទី ៦ មីនា។ រូបថត ប៉ូលិស
កោះកុងៈ បុរសម្នាក់ដែលវាយប្រពន្ធស្លាប់ ដោយចោទថា ប្រពន្ធមានសាហាយស្មន់នៅភូមិ-សង្កាត់ស្ទឹងវែង ក្រុងខេមរភូមិន្ទ ត្រូវបាននគរបាលព្រហ្មទណ្ឌខេត្តកោះកុង បញ្ជូនទៅតុលាការ នៅថ្ងៃទី ៧ ខែមីនា បន្ទាប់ពីជននេះ ប្រព្រឹត្តបានចំនួន ២ ថ្ងៃ។
លោក ឃឹម សាណេ ស្នងការងទទួលផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្ត កោះកុងឱ្យដឹងនៅថ្ងៃទី ៧ មីនាថា ជនសង្ស័យឈ្មោះ ឈឺន សុងកាន អាយុ ៤៥ ឆ្នាំ រីឯស្ត្រីរងគ្រោះឈ្មោះ ស៊ង សុភ័ស អាយុ ៣២ ឆ្នាំ។ ពួកគេរស់នៅភូមិស្ទឹងវែង សង្កាត់ស្ទឹងវែង ក្រុងខេមរភូមិន្ទ។
លោកថ្លែងថា៖ «ករណីនេះ យើងបានសាកសួរជនសង្ស័យ ហើយគាត់បានសារភាពពីមូលហេតុនៃការសម្លាប់ គឺមកពីគាត់ប្រចណ្ឌ។ ខ្ញុំបញ្ជូនជនសង្ស័យទៅតុលាការនៅថ្ងៃនេះ (ថ្ងៃទី ៧ មីនា)។ ជនសង្ស័យមិនប្រើប្រាស់គ្រឿងញៀនទេ»។
បើតាមលោក សាណេ ដែលនិយាយយោងលើរបាយការណ៍របស់នគរបាលក្រុងខេមរភូមិន្ទ មូលហេតុនៃអំពើឃាតកម្មនេះ កើតឡើងពីជនបង្កផឹកស្រាស្រវឹង ហើយឈានដល់ការប្រចណ្ឌដោយជនបង្កចោទប្រពន្ធថា មានប្រុសថ្មី។
លោក សាត សំអឿន នាយនគរបាលប៉ុស្តិ៍រដ្ឋបាលស្ទឹងវែង ឱ្យដឹងនៅថ្ងៃទី ៧ មីនាថា បើតាមចម្លើយរបស់ជនសង្ស័យប្រាប់សមត្ថកិច្ចថា កាលពីព្រលប់ថ្ងៃទី ៥ មីនា ជនសង្ស័យ និងស្ត្រីរងគ្រោះបាននាំគ្នាទៅកំដរសពក្មេងស្រីម្នាក់ដែលលង់ទឹកស្លាប់។ លុះពេលយប់ជ្រៅទាំង ២ នាក់ ប្តីប្រពន្ធបានដើរត្រឡប់មកផ្ទះវិញ តែគេឃើញពួកគេដើរបណ្តើរឈ្លោះគ្នាតាមផ្លូវបណ្តើរ។
ការឈ្លោះប្រកែកគ្នានេះ ដោយសារជនសង្ស័យស្រវឹងស្រាខ្លាំង ហើយម្យ៉ាងគេប្រាប់គាត់ថា ប្រពន្ធរបស់គាត់មានសហាយស្មន់ជាមួយប្រុសផ្សេងទើបបានជាគាត់ឈ្លោះជាមួយប្រពន្ធរបស់គាត់។ ពេលឈ្លោះគ្នានោះគាត់បានសំឡុតសួរប្រពន្ធគាត់ ប៉ុន្តែប្រពន្ធគាត់មិនព្រមឆ្លើយទើបគាត់ចេះតែវ៉ៃតាមផ្លូវរហូតដល់ផ្ទះ។
លោកថា៖ «នៅផ្ទះគាត់យកក្បាលខ្សែក្រវាត់ដែកវាយក្បាល ដងខ្លួន ហើយចាប់ក្បាលប្រពន្ធគាត់បោកនឹងកម្រាលឥដ្ឋការូ៉។ ខ្ញុំបានពិនិត្យសាកសពជាមួយជំនាញកោសល្យវិច័យឃើញក្បាលគាត់ឡើងហើមទន់អស់។ គាត់់់់់យកជើងជាន់ទ្រូងឈ្លីទៀត»។
លោក ទួន សារ៉ន អធិការរងផ្នែកព្រហ្មទណ្ឌ នៃអធិការដ្ឋាននគរបាល ក្រុង ខេមរភូមិន្ទ ប្រាប់នៅថ្ងៃទី ៧ មីនាថា ហេតុការណ៍នេះបានកើតឡើងតាំងពីព្រលប់ថ្ងៃទី ៥ មីនា ប៉ុន្តែនគរបាលប៉ុស្តិ៍ស្ទឹងវែង របស់លោកទទួលសេចក្តីរាយការណ៍ពីសាច់ញាតិរបស់ស្ត្រីរងគ្រោះនៅវេលាម៉ោងជាង ១ រំលងអធ្រាត្រឈានចូលថ្ងៃទី ៦ មីនា។ ជនសង្ស័យក៏ត្រូវកម្លាំងសមត្ថកិច្ចចាប់ខ្លួននៅពេលនោះដែរ។
ពាក់ព័ន្ធការចោទប្រកាន់ពីតំណាងអយ្យការយ៉ាងណានោះ នៅថ្ងៃទី ៧ មីនា ភ្នំពេញ ប៉ុស្តិ៍ បានទូរស័ព្ទទាក់ទងលោក វ៉ៃ ភិរម្យ អ្នកនាំពាក្យអយ្យការអមសាលាដំបូងខេត្តកោះកុង ដើម្បីសុំការបញ្ជាក់បន្ថែម តែទូរស័ព្ទរបស់លោក មិនអាចទាក់ទងបានទេ៕
