កែប/កោះកុងៈ រដ្ឋបាលថ្នាក់ខេត្តមួយចំនួនបាននិងកំពុងបន្តរៀបចំ “ទិវាជាតិទីក្រុងស្អាតលើកទី១០” ដើម្បីគាំទ្រការបើកទេសចរណ៍កម្ពុជាអមជាមួយការប្រកាសយុទ្ធនាការ កម្ពុជាស្អាត ឆ្ពោះទៅស្វាគមន៍ព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣។
រាជរដ្ឋាភិបាលកម្ពុជាកាលពីថ្ងៃទី ២៨ ខែ កុម្ភៈ ឆ្នាំ ២០២២ បានដាក់ចេញនូវការងារអាទិភាពមួយចំនួន ដើម្បីឆ្លើយតបនឹងទិវាជាតិទីក្រុងស្អាតលើកទី១០ សម្រាប់ឆ្នាំ ២០២២។
បន្ទាប់ពីមានណែនាំនេះថ្នាក់ខេត្តមួយចំនួនបានរៀបចំទិវានេះជាសាធារណៈជាបន្តបន្ទាប់ទៅតាមទីតាំងរៀងខ្លួនដោយមានការណែនាំ អំពាវនាវ និងលើកបដា ទីក្រុងស្អាត ផ្សារស្អាត និងសាលាស្អាត ជាដើម។
តួយ៉ាងខេត្តកែបដែលជាប់សមុទ្រជាទិសដៅទេសចរណ៍បានប្រារព្ធពិធីអបអរសាទរទិវាជាតិទីក្រុងស្អាតលើកទី១០ ក្រោមប្រធានបទ “ទីក្រុងស្អាតគាំទ្រការបើកទេសចរណ៍កម្ពុជា” និងពិធីផ្សព្វផ្សាយជំរុញការអនុវត្តនីតិវិធីស្តង់ដាអប្បបរមា (SOP) តាមគន្លងថ្មីសម្រាប់អាជីវកម្មវិស័យទេសចរណ៍ កាលពីថ្ងៃទី ៣ មីនា ឆ្នាំ ២០២២។
ក្នុងឱកាសនោះ អភិបាលខេត្តកែប លោក សោម ពិសិដ្ឋ បានអំពាវនាវដល់គ្រប់ភាគីពាក់ព័ន្ធ ត្រូវចូលរួមប្រកបដោយស្មារតីទទួលខុសត្រូវខ្ពស់នូវចលនាប្រឡងប្រណាំង “ទីក្រុងស្អាតរមណីយដ្ឋានស្អាត សេវាល្អ បដិសណ្ឋារកិច្ចល្អ” ដើម្បីឱ្យកម្ពុជាក្លាយជាគោលដៅទេសចរណ៍ប្រកបដោយគុណភាព និរន្តរភាព និងសុវត្ថិភាព សម្រាប់ការបើកទទួលស្វាគមន៍ភ្ញៀវទេសចរអន្តជាតិឡើងវិញ។
ប្រធានមន្ទីរទេសចរណ៍ខេត្តកែប លោក សោម ចិន្តា បានឱ្យដឹងថា ពាក់ព័ន្ធនឹងវិស័យទេសចរណ៍ក្នុងឆ្នាំ ២០២១ ខេត្តកែប ទទួលបានភ្ញៀវទេសចរសរុប ៥៨៦ ៣៤៧ នាក់ មានការថយចុះ៥៨ ភាគរយ ក្នុងនោះភ្ញៀវទេសចរជាតិចំនួន ៥៨០ ៣៤៤ នាក់ ថយចុះចំនួន ៥៧,៥០ ភាគរយ និងភ្ញៀវទេសចរបរទេសចំនួន ៦០០ នាក់ ថយចុះចំនួន ៨០,៣១ ភាគរយ។
ដោយឡែកចំពោះការអនុវត្តវិធានការក្នុងអំឡុងពេលកូវីដ ១៩ វិញ រហូតទល់បច្ចុប្បន្ននេះ ខេត្តកែបមានអាជីវកម្ម និងសេវាកម្មទេសចរណ៍ចំនួន ៧៥ ទីតាំង ហើយក៏ទទួលបានឡាបិល
“វិធានសុវត្ថិភាពទេសចរណ៍” ផងដែរ។
រីឯនៅខេត្តកោះកុង កាលពីថ្ងៃទី ៤ ខែមីនា ប្រធានមន្ទីរទេសចរណ៍ខេត្តនេះ លោក សុខ ចាន់គ្រឹះស្នា បានដឹកនាំមន្ត្រីចងបដាក្នុងឱកាសទិវាទីក្រុងស្អាតនេះ ដែលមានខ្លឹមសារ ទីក្រុងស្អាត ផ្សារស្អាត និងសាលាស្អាត ស្នាមញញឹមរួសរាយរាក់ទាក់ជាសក្តានុពលទេសចរណ៍ដ៏ទាក់ទាញពលរដ្ឋគំរូចូលរួមគិតគូរពីបរិស្ថានជាដើម។
ទន្ទឹមនេះដែរ លោក តាំង សុចិត្តគ្រឹះស្នា ប្រធានមន្ទីរទេសចរណ៍ខេត្តព្រះសីហនុ អំពាវនាវដល់អាជ្ញាធរគ្រប់លំដាប់ថ្នាក់ មន្ទីរជំនាញពាក់ព័ន្ធ ម្ចាស់អាជីវកម្ម និងប្រជាពលរដ្ឋ ក៏ដូចជាភ្ញៀវទេសចរ មេត្តាចូលរួមឱ្យបានសកម្ម និងជាប់ជាប្រចាំក្នុងការគ្រប់គ្រង និងលើកកម្ពស់សុវត្ថិភាពសណ្ដាប់ធ្នាប់បរិស្ថាន និងអនាម័យសាធារណៈនៅក្នុងទីក្រុង និងតាមរមណីយដ្ឋានតំបន់ឆ្នេរ។
ចំពោះខេត្តកំពង់ធំវិញ លោកអភិបាលខេត្ត ងួន រតនៈ បានរៀបទិវាជាតិទីក្រុងស្អាត និងបានលើកទឹកចិត្តដល់ពលរដ្ឋឱ្យចូលរួមអនុវត្តប្រកបដោយស្មារតីទទួលខុសត្រូវខ្ពស់។
លោកបានថ្លែងថា៖ «ទីក្រុងស្អាតផ្តើមចេញពីយើងទាំងអស់គ្នាដែលតម្រូវឱ្យចូលរួមអនុវត្តកាតព្វកិច្ចជាពិសេសពលរដ្ឋរស់នៅក្រុងស្ទឹងសែន ត្រូវយកចិត្តទុកដាក់វេចខ្ចប់កាកសំណល់រឹង និងរាវឱ្យមានរបៀបរៀបរយ ការរៀបចំសណ្តាប់ធ្នាប់សាធារណៈតាមដងផ្លូវសំដៅដល់ស្អាតដោយទេសភាពស្រស់ត្រកាល ស្អាតដោយប្រណីត និងស្អាតដោយបរិស្ថានល្អប្រសើរ»។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោក ហូ វណ្ឌី បានថ្លែងថា បន្ទាប់ពីបានដាក់ឱ្យអនុវត្តទិវាជាតិទីក្រុងស្អាតអស់រយៈពេល ១០ ឆ្នាំមកនេះ ឃើញមានគ្រប់ថ្នាក់ខេត្ត-ក្រុងបានយកចិត្តទុកដាក់ពង្រឹងនូវភាពអនាម័យ និងបរិស្ថានមានភាពល្អប្រសើរជាងមុន។
លោកបានបង្ហាញជំនឿថា ក្នុងករណីរាជរដ្ឋាភិបាលចងក្រងទិវាជាតិទីក្រុងស្អាតទៅជាច្បាប់មួយសម្រាប់អនុវត្តឬហៅថា បដិវត្តអនាម័យ នោះនឹងកាន់តែល្អប្រសើរ។
លោកថា៖ «យើងជឿជាក់ ១០០ ភាគរយថា បរិស្ថានអនាម័យនឹងស្អាតមិនត្រឹមតែស្អាតគ្រប់តំបន់ទេ ប៉ុន្តែប្រជាពលរដ្ឋដែលធ្លាប់បោះសំរាមពាសវាលពាសកាលក៏ចាប់ផ្តើមកែលម្អ ដែលបង្កើតខ្នាតគំរូប្រចាំជីវិត មានន័យថា ការរស់នៅមានអនាម័យ និងរស់នៅស្អាត ព្រោះយើងកំពុងធ្វើការទាក់ទាញភ្ញៀវទេសចរ ហើយបើយើងមិនចេះស្អាត មិនចេះអនាម័យផង គឺចប់ហើយ»។
លោកនាយករដ្ឋមន្ត្រី ហ៊ុន សែន ដែលជាប្រធានកិត្តិយសនៃគណៈកម្មាធិការជាតិវាយតម្លៃទីក្រុងស្អាតបានដាក់ចេញការងារអាទិភាពមួយចំនួន ដើម្បីឆ្លើយតបនឹងទិវាជាតិទីក្រុងស្អាតសម្រាប់ឆ្នាំ ២០២២ រួមមាន គ្រប់ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងផ្នែកឯកជនត្រូវបន្តចូលរួមអនុវត្តប្រកបដោយស្មារតីទទួលខុសត្រូវខ្ពស់លើវិធានឬបទដ្ឋានគតិយុត្តដែលបានដាក់ចេញសម្រាប់សេវាកម្មទេសចរណ៍ស្របតាមគន្លងប្រក្រតីភាពថ្មី បន្តចូលរួមជំរុញនិងស្តារវិស័យទេសចរណ៍ឡើងវិញ។ គ្រប់ស្ថាប័នពាក់ព័ន្ធត្រូវដាក់ចេញយុទ្ធនាការអប់រំសង្គម និងផ្សព្វផ្សាយយុទ្ធនាការកម្ពុជាស្អាតឱ្យបានកាន់តែសកម្ម និងផុលផុសសំដៅសម្រេចបានការអភិវឌ្ឍប្រកបដោយភាពស្អាត និងបៃតងនៅក្នុងទីក្រុងកម្ពុជាទាំងមូល ដើម្បីត្រៀមទទួលសា្វគមន៍ភ្ញៀវទេសចរពិសេសទម្លាប់នៃការរស់នៅជាមួយភាពស្អាតនិងអនាម័យ៕