ព្រះវិហារៈ រដ្ឋបាលខេត្តព្រះវិហារត្រៀមផ្ទៃដីទំហំប្រមាណ ៣៦ ហិកតា សម្រាប់ធ្វើជាទីលានចាក់សំរាម នៅភូមិឆែបលិច ឃុំឆែប ១ ស្រុកឆែប ដើម្បីគ្រប់គ្រងសំរាមឱ្យមានសណ្តាប់ធ្នាប់លើកកម្ពស់អនាម័យ ខណៈមានការកើនឡើងនៃចំនួនពលរដ្ឋរស់នៅ និងកំណើនសំណល់រឹងរាវប្រចាំថ្ងៃ។
អភិបាលស្រុកឆែប លោក សុក សាន្តតារា ប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែមីនាថា រដ្ឋបាលខេត្តបានគ្រោងទុកដីបម្រុង ៣៦ ហិកតា សម្រាប់ធ្វើទីលានចាក់សំរាមយូរហើយ ប៉ុន្តែដោយសារមានការកាប់ទន្ទ្រានពីសំណាក់ពលរដ្ឋ ទើបថ្មីៗនេះអាជ្ញាធរបានធ្វើព្រំដី និងធ្វើផ្លូវចូលបណ្តោះអាសន្ន។
លោកថា៖ «ធម្មតាពលរដ្ឋគាត់ឃើញដីទំនេរស្អាត គាត់កាប់ទន្ទ្រានយក ដោយបារម្ភមានការបន្តកាប់ទន្ទ្រាន ឥឡូវនេះមន្ត្រីជំនាញ បានធ្វើព្រំដី និងធ្វើផ្លូវចូលជាបណ្តើរៗហើយ
ពលរដ្ឋដែលកាប់ទន្ទ្រានដីនោះក៏បានប្រគល់ជូនអាជ្ញាធរវិញដែរ»។
លោកបានបញ្ជាក់ថា ការត្រៀមដីទំហំធំនេះ សម្រាប់ចាក់សំរាមនាពេលបច្ចុប្បន្នផង និងសម្រាប់ថ្ងៃអនាគតផង។ លោកថា៖ «មូលហេតុត្រៀមដីធំដោយសារគ្រោងធ្វើទីលានចាក់សំរាម
ស្របតាមបច្ចេកទេសព្រោះធំកាលណាល្អកាលហ្នឹង ដើម្បីជាផលប្រយោជន៍របស់បងប្អូនប្រជាពលរដ្ឋ ព្រោះឥឡូវនេះការទុកដាក់សំរាមអនាធិបតេយ្យសំរាមរាយប៉ាយពេញ និងចាក់ពាសវាលពាសកាលវាបាត់សោភណភាពនៅស្រុក ធ្វើឱ្យខូចបរិស្ថាន»។
លោកបន្តថា នៅថ្ងៃអនាគតកំណើនប្រជាពលរដ្ឋនៅទីប្រជុំជនកាន់តែច្រើនហើយវាច្បាស់ជាមានបញ្ហាលើការគ្រប់គ្រងសំរាម ប្រសិនបើស្រុកមិនបានរៀបចំផែនការគ្រោងទុក។ លោកឱ្យដឹងដែរថា ទីលានចាក់សំរាមថ្មីនេះសម្រាប់បម្រើឱ្យតែនៅស្រុកឆែបប៉ុណ្ណោះ ខណៈមានពលរដ្ឋរស់នៅជាង ២៥ ០០០ ពាន់នាក់ ហើយលោកថា នឹងបន្តកើនឡើងនៅឆ្នាំបន្តបន្ទាប់។
ទោះយ៉ាងណា លោកមិនទាន់បង្ហើបពីកាលបរិច្ឆេទនៃការសាងសង់ទីលានចាក់សំរាមជាផ្លូវការនៅឡើយទេ ខណៈលោកថា ឯកសារច្បាប់បានបញ្ជូនទៅស្ថាប័នពាក់ព័ន្ធរួចហើយដោយរង់ចាំតែបញ្ជូនត្រឡប់មកវិញប៉ុណ្ណោះ។
លោកថា៖ «យើងរង់ចាំតែច្បាប់រត់ចេញពីខាងក្រសួងបរិស្ថានទេកាលណាបានច្បាប់ធ្លាក់មកយើងរកកញ្ចប់ថវិកាបដិភាគកញ្ចប់ថវិកាស្រុក ក្រុមហ៊ុនវិនិយោគខ្លះ ម្យ៉ាងទៀតក្រសួងបរិស្ថានគេយកចិត្តទុកដាក់ណាស់ជំរុញឱ្យធ្វើការងារនេះ»។
បើតាមលោក សុកសាន្តតារា ទីលានចាក់សំរាមចាស់គឺស្ថិតនៅក្បែរគម្រោងទីលានចាក់សំរាមថ្មី ប៉ុន្តែមានទំហំតូច មិនទាន់ឆ្លើយតបទៅនឹងតម្រូវការប្រើប្រាស់ប្រចាំថ្ងៃ។
ស្របគ្នានេះដែរ លោកអំពាវនាវឱ្យមានការចូលរួមពីសំណាក់ប្រជាពលរដ្ឋក្នុងការទុកដាក់សំរាមឱ្យបានត្រឹមត្រូវ ដើម្បីរក្សាបាននូវបរិស្ថានស្អាត និងធ្វើឱ្យពលរដ្ឋក្នុងមូលដ្ឋានរស់នៅប្រកបដោយផាសុកភាពខ្ពស់។
ប៉ុន្តែកន្លងទៅលោកធ្លាប់លើកឡើងថា គោលដៅរបស់រាជរដ្ឋាភិបាលធ្វើការគ្រប់គ្រងកាកសំណល់រឹងសំរាមឱ្យបានល្អដែលជាផ្នែកមួយនៃគោលនយោបាយជាតិ ហើយក្រសួងបរិស្ថាននឹងបន្តផ្តល់ជំនួយបច្ចេកទេសបណ្តុះបណ្តាលសមត្ថភាពមន្ត្រីដល់រដ្ឋបាលថ្នាក់ក្រោមជាតិក្នុងការគ្រប់គ្រងសំរាមនៅតាមទីប្រជុំជន។
ទាក់ទងនឹងបញ្ហាសំរាមនេះដែរ លោក នេត្រ ភក្ត្រា បានឱ្យដឹងកាលពីឆ្នាំ ២០២១ ថា ក្នុង ១ ថ្ងៃ សំណល់សំរាមតែងបង្កើតឡើងមានជាង ១ ម៉ឺនតោន ហើយក្នុង ១ ឆ្នាំ សំណល់សំរាមមានប្រមាណ ៤ លានតោន។ លោកបានឱ្យដឹងទៀតថា សំរាមមានការកើនឡើងចន្លោះពី ១០ ទៅ ១៥ ភាគរយ ក្នុង ១ ឆ្នាំ ដែលនឹងធ្វើឱ្យទីលានចាក់សំរាមដែលគ្រោងចាក់រយៈពេល ៥ ឆ្នាំ ប្រែប្រួល និងអាចប្រើប្រាស់មិនបានគ្រប់តាមពេលវេលាកំណត់ ព្រោះកំណើនសំរាមកើនឡើង រីឯការដកហូតយកទៅកែច្នៃនៅមានកម្រិត៕
វីដេអូ៖