ក្រចេះ/មណ្ឌលគិរីៈ មន្ត្រីឧទ្យានុរក្សមកពីខេត្តមណ្ឌលគិរី និងខេត្តក្រចេះប្រមាណ ៤២ នាក់ ទទួលបានវគ្គបណ្តុះបណ្តាលស្តីពី «ការពង្រឹងប្រសិទ្ធភាពការអនុវត្តច្បាប់ និងនីតិវិធីបំពេញកំណត់ហេតុបទល្មើសធនធានធម្មជាតិ» ខណៈក្រសួងបរិស្ថានគ្រោងរៀបចំវគ្គបណ្តុះបណ្តាលស្តីពីការការពារធនធានធម្មជាតិនេះបន្តទៀតនៅពាក់កណ្តាលខែនេះ។
វគ្គបណ្តុះបណ្តាលនេះ ត្រូវបានរៀបចំឡើងកាលពីថ្ងៃទី ២២ ដល់ ២៧ ខែកុម្ភៈ ដោយអង្គការ WCS សហការជាមួយក្រសួងបរិស្ថានដែលមានមន្ត្រីឧទ្យានុរក្សមកពីខេត្តមណ្ឌលគិរី និងក្រចេះព្រមទាំងនគរបាល និងមន្ត្រីកងរាជអាវុធហត្ថខេត្តមណ្ឌលគិរី សរុបចំនួន ៤២ នាក់។
ទំព័រហ្វេសប៊ុករបស់អង្គការ WCS បានឱ្យដឹងថា វគ្គបណ្តុះបណ្តាលទាំងនោះ មានគោលបំណងកសាងសមត្ថភាពអ្នកចូលរួមឱ្យយល់ដឹងអំពីច្បាប់ស្តីពីតំបន់ការពារធម្មជាតិ លិខិត
បទដ្ឋានគតិយុត្តពាក់ព័ន្ធការអនវុត្តច្បាប់ ជាពិសេសវិធីកសាងសំណុំរឿងបទល្មើសធម្មជាតិដែលត្រឹមត្រូវព្រមទាំងឱ្យមន្ត្រីឧទ្យានុរក្សយល់ដឹងកាន់តែច្បាស់អំពីសិទ្ធិ តួនាទី និងភារកិច្ចរបស់ខ្លួនក្នុងការអនវុត្តការងារក្នុងតំបន់ការពារធម្មជាតិ។
អង្គការ WCS បានបញ្ជាក់ថា «វគ្គបណ្តុះបណ្តាលទាំង ២ នោះ បានរៀបចំធ្វើឡើងនៅទីស្នាក់ការដែនជម្រកសត្វព្រៃកែវសីមា ដោយមានការគាំទ្រពីគម្រោងកាំប៉ាស។ វគ្គបណ្តុះបណ្តាលនីមួយៗមានរយៈពេល ៣ ថ្ងៃ»។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ ភ្នំពេញ ប៉ុស្តិ៍ នៅថ្ងៃទី ៦ មីនាថា ការបណ្តុះបណ្តាលនេះ គឺជាការចូលរួមពង្រឹងបន្ថែមទៅលើសមត្ថភាពមន្ត្រី ដើម្បីបង្កើនប្រសិទ្ធភាពក្នុងការអនុវត្តច្បាប់ និងបំពេញនីតិវិធីផ្សេងៗក្នុងការគ្រប់គ្រង និងអភិរក្សធនធានធម្មជាតិ។
លោកបានបន្តថា ការបណ្តុះបណ្តាលនេះក៏ដើម្បីឱ្យមន្ត្រីឧទ្យានុរក្សកាន់តែមានគ្រឹះរឹងមាំក្នុងការធ្វើកំណត់ហេតុប្រមូលកសាងសំណុំរឿង និងការប្រមូលភ័ស្តុតាងនានាពាក់ព័ន្ធនឹងបទ
ល្មើសធនធានធម្មជាតិបញ្ជូនទៅតុលាការកាន់តែប្រសិទ្ធភាព។
លោកបានបញ្ជាក់ថា៖ «វាក៏បានចូលរួមផ្លាស់ប្តូរបទពិសោធរបស់មន្ត្រីឧទ្យានុរក្សដែល កិច្ចការងារនេះ គឺមានសារៈសំខាន់ណាស់ ព្រោះមន្ត្រីឧទ្យានុរក្សក៏ជាមន្ត្រីនគរបាលយុត្តធម៌ដែលគាត់ចូលរួមការពារ និងអភិរក្សធនធានធម្មជាតិ និងទប់ស្កាត់បង្ក្រាបបទល្មើស។
នៅពេលដែលបង្ក្រាបបទល្មើស គឺត្រូវមានភ័ស្តុតាង និងឯកសារពាក់ព័ន្ធ ការកសាងសំណុំរឿងចៀសវាងមិនមានមូលដ្ឋានរឹងមាំដែលធ្វើឱ្យវិធានការផ្លូវច្បាប់របស់យើងមិនពេញលេញបន្តទៅមុខទៀត»។
ជាមួយនឹងវគ្គបបណ្តុះបណ្តាលនេះ លោក នេត្រ ភក្ត្រា បានឱ្យដឹងដែរថា នៅថ្ងៃទី ១៥ និងថ្ងៃទី ១៦ ខែមីនា ខាងមុខនេះ ក្រសួងបរិស្ថានក៏នឹងបើកវគ្គបណ្តុះបណ្តាលផ្សព្វផ្សាយអំពីច្បាប់
ស្តីពីតំបន់ការពារធម្មជាតិនៅក្នុងខេត្តកែប ដើម្បីផ្តល់ចំណេះដឹងដល់មន្ត្រីក្រសួងបរិស្ថានក៏ដូចជាមន្ត្រីឧទ្យានុរក្សពីខេត្តកែប និងខេត្តកំពត។
បន្ថែមពីនេះ លោក នេត្រ ភក្ត្រា បានបញ្ជាក់ថា វគ្គបណ្តុះបណ្តាលនេះ ក៏នឹងមានការចូលរួមពីមន្ត្រីនគរបាលយុត្តធម៌ និងមកពីស្ថាប័នតុលាការនានា ដើម្បីបញ្ជ្រាបការយល់ដឹងអំពីច្បាប់ស្តីពីតំបន់ការពារធម្មជាតិក្នុងការចូលរួមអនុវត្ត និងការពារទាំងអស់គ្នា៕