.jpg)
លោក ហ៊ុន សែន និងភរិយាក្នុងទិវាសិទ្ធិនារីកន្លងទៅ។ រូបថត SPM
ភ្នំពេញៈ រាជរដ្ឋាភិបាលកម្ពុជាបាននិងកំពុងដាក់ចេញនូវវិធានការអាទិភាពសំខាន់ៗមួយចំនួន ដើម្បីជំរុញដល់គ្រប់ក្រសួង ស្ថាប័ន និងដៃគូពាក់ព័ន្ធ ឱ្យបន្តនិងពង្រីកវិសាលភាពក្នុងការអនុវត្តគោលនយោបាយពង្រឹងសមភាពយេនឌ័រដែលបានចាត់ទុកស្ត្រីជាឆ្អឹងខ្នងនៃការអភិវឌ្ឍសេដ្ឋកិច្ច និងសង្គមជាតិ។
ការអនុវត្តអភិក្រមការបញ្ជ្រាបយេនឌ័រ ជាកិច្ចការអន្តរវិស័យដូចមានកំណត់នៅក្នុងយុទ្ធសាស្ត្រចតុកោណដំណាក់កាលទី ៤ ដើម្បីកំណើនការងារសមធម៌ និងប្រសិទ្ធភាពក្នុងការកសាងមូលដ្ឋានឆ្ពោះទៅសម្រេចចក្ខុវិស័យកម្ពុជានៅឆ្នាំ ២០៣០។
នេះជាការលើកឡើងរបស់ប្រមុខរាជរដ្ឋាភិបាលកម្ពុជាក្នុងថ្ងៃទិវាអន្តរជាតិនារី ៨ មីនា ខួបលើកទី ១១១ ឆ្នាំ ២០២២ នេះ ដោយបានជ្រើសរើសយកមូលបទ «សមភាពយេនឌ័រថ្ងៃនេះដើម្បីចីរភាពនាពេលអនាគត»។
លោកនាយករដ្ឋមន្ត្រី ហ៊ុន សែន បានលើកឡើងតាមរយៈសារលិខិតថា៖ «យើងជ្រើសរើសយកមូលបទនេះក្នុងគោលបំណងបញ្ជាក់អំពីតម្លៃនៃការទទួលបាននូវសមភាពរវាងស្ត្រី និងបុរសនៅក្នុងការអភិវឌ្ឍគ្រប់វិស័យ និងកៀរគរដល់គ្រប់ដៃគូពាក់ព័ន្ធក្នុងការបន្តចូលរួមអនុវត្តនូវវិធានការផ្នែកគោលនយោបាយ កម្មវិធីនិងសកម្មភាពនៅក្នុងការលើកកម្ពស់សមភាពយេនឌ័រ និងតួនាទីរបស់ស្ត្រីនៅក្នុងរបៀបវារៈនៃការអភិវឌ្ឍសេដ្ឋកិច្ច និងសង្គមជាតិប្រកបដោយចីរភាព»។
សម្រាប់រាជរដ្ឋាភិបាលកម្ពុជាមូលបទនេះ គឺជាកាលានុវត្តភាពថ្មីបន្ថែមទៀតដើម្បីជំរុញដល់គ្រប់ក្រសួងស្ថាប័ន និងដៃគូពាក់ព័ន្ធបន្ត និងពង្រីកវិសាលភាពក្នុងការអនុវត្តគោលនយោបាយពង្រឹងសមភាពយេនឌ័រដែលបានចាត់ទុកស្ត្រីជាឆ្អឹងខ្នងនៃការអភិវឌ្ឍសេដ្ឋកិច្ច និងសង្គមជាតិ និងការអនុវត្តអភិក្រមការបញ្ជ្រាបយេនឌ័រ។
លោកថា៖ «នេះជាកិច្ចការអន្តរវិស័យដូចមានកំណត់នៅក្នុងយុទ្ធសាស្ត្រចតុកោណដំណាក់កាលទី ៤ ដើម្បីកំណើនការងារសមធម៌ និងប្រសិទ្ធភាពក្នុងការកសាងមូលដ្ឋានឆ្ពោះទៅសម្រេចចក្ខុវិស័យកម្ពុជានាឆ្នាំ ២០៣០ និងឆ្នាំ ២០៥០ ផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣, គោលដៅអភិវឌ្ឍន៍ប្រកបដោយចីរភាពកម្ពុជាឆ្នាំ ២០៣០ ដោយមិនទុកនរណាម្នាក់ឱ្យនៅឯកោ និងក្របខ័ណ្ឌគោលនយោបាយនានារបស់រាជរដ្ឋាភិបាល»។
ដើម្បីសម្រេចតាមចក្ខុវិស័យនេះរាជរដ្ឋាភិបាលកម្ពុជាបាននិងកំពុងដាក់ចេញនូវវិធានការអាទិភាពសំខាន់មួយចំនួនក្នុងនោះមាន ការកសាងសំណាញ់សុវត្ថិភាពសង្គម និងមូលដ្ឋានសង្គមសេដ្ឋកិច្ច ដែលរឹងមាំនាពេលអនាគត,ការធ្វើឱ្យប្រព័ន្ធអេកូឡូស៊ី សហគ្រាសធុនមីក្រូ តូច និងមធ្យមមានបរិយាប័ន្ន។ ការអនុវត្តក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥, ការលើកកម្ពស់តួនាទីរបស់ស្ត្រីនៅក្នុងសកម្មភាពសេដ្ឋកិច្ចបៃតង កសិឧស្សាហកម្មបៃតង និងអេកូទេសចរណ៍...ជាដើម។
លោក ហ៊ុន សែន បានបញ្ជាក់ថា៖ «ដើម្បីឈានទៅសម្រេចបាននូវកិច្ចការអាទិភាពប្រកបដោយប្រសិទ្ធភាពតម្រូវឱ្យមានការចូលរួមទាំងអស់គ្នា ក្នុងការផ្លាស់ប្តូរទស្សនៈអវិជ្ជមាន ការប្រកាន់យកទស្សនៈ និងឥរិយាបថជាវិជ្ជមានតាមរយៈការទទួលស្គាល់ពីតួនាទីរបស់ស្ត្រីដែលជាចលករដ៏សំខាន់រួមចំណែកក្នុងការពន្លឿនកិច្ចអភិវឌ្ឍសង្គម និងសេដ្ឋកិច្ចគ្រួសារ និងសង្គមជាតិទាំងមូលប្រកបដោយចីរភាព»។
ជាមួយនេះដែរលោកក៏បានអំពាវនាវដល់ថ្នាក់ដឹកនាំក្រសួង ស្ថាប័ន ដៃគូពាក់ព័ន្ធ អាជ្ញាធរគ្រប់លំដាប់ថ្នាក់ ប្រជាជន គ្រប់រូប និងក្រុមគ្រួសារចូលរួមគាំទ្រនិងអនុវត្តគោលនយោបាយរបស់រាជរដ្ឋាភិបាលក្នុងការពង្រឹងសមភាពយេនឌ័រតាមរយៈការអនុវត្តវិធានការអាទិភាពទាំងនេះ។
រីឯសម្តេចព្រះមហាក្សត្រី នរោត្តម មុនិនាថ សីហនុ ក៏បានចេញព្រះរាជសារផងដែរដោយបានគាំទ្រនូវការលើកយកនូវមូលបទ «សមភាពយេនឌ័រថ្ងៃនេះ ដើម្បីចីរភាពនាពេលអនាគត» ដែលជាការរំលេចឱ្យឃើញថា ស្ត្រី និងបុរសជាដៃគូស្មើភាព និងជាការបញ្ជាក់ពីតម្លៃនៃការទទួលបាននូវសមភាពរវាងស្ត្រី និងបុរសសម្រាប់ការអភិវឌ្ឍគ្រប់វិស័យ។
ព្រះមហាក្សត្រី មានព្រះរាជបន្ទូលថា៖ «ក្នុងបរិការណ៍បច្ចុប្បន្នដែលយើងទាំងអស់គ្នាកំពុងស្ថិតក្នុងដំណើរការនៃរបៀបវារៈស្តារសេដ្ឋកិច្ចសង្គមក្រោយវិបត្តិកូវីដ ១៩ ការយកចិត្តទុកដាក់ និងការពង្រឹងសមភាពយេនឌ័រជាកិច្ចការអាទិភាព និងកាន់តែចាំបាច់ ដើម្បីធានាថា ស្ត្រី និងក្មេងស្រីគ្រប់រូបទទួលបានសមភាពនៅក្នុងគ្រប់ទិដ្ឋភាព»។
ចំណែក លោកស្រី ឱ វណ្ណឌីន រដ្ឋលេខាធិការក្រសួងសុខាភិបាលក៏បានលើកឡើងនាថ្ងៃទិវាអន្តរជាតិនារី ៨ មីនា នេះដែរថា គ្រូពេទ្យស្ត្រីជា «កងទ័ពអាវស» ក្នុងបរិបទប្រយុទ្ធនឹងជំងឺកូវីដ ១៩ និងយុទ្ធនាការចាក់វ៉ាក់សាំងបង្ការជំងឺកូវីដ ១៩។
លោកស្រីថ្លែងថា៖ «នៅក្នុងយុគសម័យប្រយុទ្ធនឹងជំងឺកូវីដ ១៩ ស្ត្រីដែលជាគ្រូពេទ្យ និងអ្នកជំនាញពាក់ព័ន្ធផ្សេងៗបានចូលរួមចំណែកយ៉ាងសកម្មក្នុងការជួយផ្តល់សេវាអប់រំ សុខភាព ការពារថែទាំ ពិនិត្យ ព្យាបាលជំងឺកូវីដ ១៩ ផង និងជំងឺផ្សេងៗទៀត ដោយមិនខ្លាចនឿយហត់ឡើយ»។
លោកស្រី ឱ វណ្ណឌីន ថា នៅក្នុងការងារសង្គមរបស់ស្ត្រី គឺជួយបំពេញបន្ថែមឱ្យគ្នាទៅវិញទៅមក ហើយរឹតតែសម្រេចបានផលល្អប្រសើរប្រសិនបើសមភាពយេនឌ័រត្រូវបានអនុវត្តប្រកបដោយភាពមិនរើសអើង និងមិនប្រកាន់ភេទ៕
