.jpg)
លោក គន់ គីម ចង្អុលទីតាំងដែលត្រូវសង់វិមានឈ្នះឈ្នះ អន្លង់វែង ពីខែមុន។ រូបថត ក្រសួងការពារជាតិ
ឧត្ដរមានជ័យៈ ពិធីបញ្ចុះបឋមសិលាសាងសង់ស្តូបអនុស្សាវរីយ៍នយោបាយឈ្នះ ឈ្នះ អន្លង់វែង ដែលស្ថិតក្នុងស្រុកអន្លង់វែង ខេត្តឧត្តរមានជ័យ ត្រូវប្រព្រឹត្តទៅនៅព្រឹកថ្ងៃទី ៩ ខែមីនានេះ ក្រោមអធិបតីភាពលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ ដើម្បីរំឭកដល់ប្រតិបត្តិករនយោបាយដែលបានបញ្ចប់សង្គ្រាមស៊ីវិលនៅកម្ពុជា។
លោក ឌី រ៉ាដូ អភិបាលរង និងជាអ្នកនាំពាក្យរដ្ឋបាលខេត្តឧត្តរមានជ័យ ប្រាប់ភ្នំពេញប៉ុស្តិ៍នៅថ្ងៃទី ៨ ខែមីនា ឆ្នាំ ២០២២ ថា ការសាងសង់ស្តូបអនុស្សាវរីយ៍នយោបាយឈ្នះ ឈ្នះ អន្លង់វែង នឹងត្រូវសាងសង់នៅលើទំហំដីប្រមាណ ៣០០ ហិកតា ខណៈទីតាំងអន្លង់វែងនេះគឺជាទីតាំងដែលបានបញ្ចប់សង្គ្រាមចុងក្រោយ។
លោកបន្តថា ការសាងសង់ស្តូបនេះត្រូវរៀបចំបញ្ចុះបឋមសិលាសាងសង់នៅថ្ងៃទី ៩ មីនាឆ្នាំនេះ ក្រោមអធិបតីភាពលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ ដើម្បីជាការរំឭកពីគុណបំណាច់ វីរភាព និងអរគុណដល់ប្រតិបត្តិករនយោបាយ ជាពិសេសលោកនាយករដ្ឋមន្ត្រី ហ៊ុន សែន ដែលបានបញ្ចប់សង្គ្រាមស៊ីវិលទាំងស្រុងនៅកម្ពុជា ។
លោកថ្លែងថា៖ «ទំហំស្តូបដែលត្រូវសាងសង់គឺមានទំហំ ៦០ ម៉ែត្រ x១២០ ម៉ែត្រ។ ពាក់ព័ន្ធនឹងចំណាយថវិកាលើគម្រោងនេះខ្ញុំអត់ដឹងទេ ព្រោះមិនទាន់ទទួលបានព័ត៌មាន ប៉ុន្តែថវិកាសម្រាប់ការសាងសង់ស្តូបនេះគឺមានគ្រប់គ្រាន់មិនមានការខ្វះខាតទេ។ ដោយឡែកសម្រាប់ថវិកាសាងសង់ហេដា្ឋរចនាសម្ព័ន្ធផ្សេងទៀតអាចថានឹងខ្វះ យើងនឹងអំពាវនាវសប្បុរសជនឱ្យចូលរួមបន្ថែមទៀត»។
ក្នុងពិធីចុះពិនិត្យទីតាំងដើម្បីរៀបចំពិធីបញ្ចុះបឋមសិលាសាងសង់ស្តូបអនុស្សាវរីយ៍នយោបាយឈ្នះឈ្នះអន្លង់វែងកាលពីថ្ងៃទី ៧ ខែមីនា ឆ្នាំ ២០២២ លោក គន់ គីម ប្រធានអនុគណៈកម្មការសាងសង់ស្តូបនេះបានឱ្យដឹងថា ក្នុងរយៈពេល ១ សប្តាហ៍កន្លងទៅនេះ ដោយមានការយកចិត្តទុកដាក់ពីកងពលតូចអន្តរាគមន៍លេខ ៨ កងពលធំអន្តរាគមន៍លេខ ៣ បាននាំយកគ្រឿងចក្រមកឈូសឆាយផ្លូវឡើងភ្នំ ២០០ ចូលទៅដល់ទីតាំងតំបន់ប្រវត្តិសាស្ត្រយោធាតេជោភ្នំ ២០០ ក្នុងនោះក្រុមការងារបានធ្វើផ្លូវព័ទ្ធជុំវិញ និងបានបោសសម្អាតមីនផងដែរ ។
លោកថ្លែងថា៖ «ក្នុងការរៀបចំសាងសង់ស្តូប ឈ្នះ ឈ្នះក្រុមការងារបានធ្វើផ្លូវប្រវែង ២ ១៦៨ ម៉ែត្រ ចូលទៅកាន់ទីតាំងដែលត្រូវសាងសង់ស្តូប។ ការងារនេះមានការចូលរួមសហការពីផ្នែកធនធានទឹកខេត្តឧត្តរមានជ័យក្នុងការសិក្សាធ្វើទំនប់ស្ទាក់ទឹកផងដែរ»។
លោក ណឹម សុវត្ថិ ប្រធានក្រុមការងារសិក្សាស្រាវជ្រាវប្រវត្តិសាស្ត្រយោធាដែលបានចុះសិក្សាស្រាវជ្រាវសម្រាប់ការសាងសង់ស្តូបថ្មីនេះបានថ្លែងថា ការសម្រេចការរៀបចំស្តូបនេះ ក្រុមការងាររបស់លោកបានប្រមូលតឹកតាង និងរៀបចំនូវអំណះអំណាងដើម្បីប្រែក្លាយខ្លឹមសារដែលមានឱ្យទៅ ស្ថាបត្យកម្ម និងឱ្យក្លាយទៅជាសំណង់។
លោក ណឹម សុវត្ថិបានបន្តថា៖ «មកទល់ថ្ងៃនេះយើងបានទទួលនូវមនុស្សចូលមកសិក្សារាប់រយ រាប់ពាន់នាក់ នៅតំបន់ប្រវត្តិសាស្ត្រយោធាតេជោ ភ្នំ ២០០ នេះ ហើយបានរៀបចំនូវពិធីផ្សេងៗ ទោះបីមិនទាន់មានអគារ ស្កឹមស្កៃ ប៉ុន្តែអត្ថន័យដ៏ធំធេង និងបរិយាកាសនៅទីនេះគឺបានទាក់ទាញច្រើនណាស់ជាមួយអ្នកដែលមកទស្សនានៅទីនេះ»។
បើតាម លោក ណឹម សុវត្ថិ ការរៀបចំស្តូបវិមានឈ្នះ ឈ្នះ នៅទីនេះគឺក្រុមការងារខ្លឹមសារបានត្រៀមដោយកត់ទុកនូវធាតុចូល និងឯកសារជាច្រើនរួមទាំងប្រតិបត្តិករដែលត្រូវរៀបចំឱ្យទៅជាចម្លាក់ និងបង្កើតជាតឹកតាងសម្រាប់មនុស្សជំនាន់ក្រោយរៀនសូត្របង្កើតនូវអត្តសញ្ញាណជាតិ បង្កើតនូវស្មារតីស្នេហាជាតិ បង្កើតនូវការចូលរួមក្នុងការការពារនូវបូរណភាពទឹកដី៕
