.jpg)
ប្រជាពលរដ្ឋ ៣០០ គ្រួសារដែលទទួលបានអំណោយ។ រូបថត ហ្វេសប៊ុក
ឧត្តរមានជ័យៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទរួមជាមួយអាជ្ញាធរខេត្តឧត្តរមានជ័យ នៅថ្ងៃទី ៨ ខែមីនា បានយកអង្ករជំនួយសង្គ្រោះបន្ទាន់ទៅចែកជូនប្រជាពលរដ្ឋចំនួន ៣០០ គ្រួសារ ដែលមានជីវភាពខ្វះខាត ដែលរងផលប៉ះពាល់ដោយសារជំងឺកូវីដ ១៩ នៅស្រុកចុងកាល់។
លោក វេង សាខុន បានលើកឡើងថា ជំងឺកូវីដ ១៩ បានធ្វើឱ្យប៉ះពាល់ទាំងផ្នែកសេដ្ឋកិច្ច និងសង្គម ជាពិសេសជីវភាពរបស់ប្រជាពលរដ្ឋ។ លោកថា ដោយឈ្វេងយល់ពីផលប៉ះពាល់យ៉ាងធ្ងន់ធ្ងរនេះ រាជរដ្ឋាភិបាលបានដាក់ចេញនូវវិធានការសំខាន់ៗជាច្រើន ក្នុងនោះមានទាំង វិធានការសេដ្ឋកិច្ច វិធានការច្បាប់ រដ្ឋបាល និងវិធានការសុខាភិបាល សំដៅទប់ស្កាត់ឱ្យខាងតែបាននូវការរាតត្បាតនៃជំងឺដ៏កាចសាហាវមួយនេះ និងជាពិសេសបើកឱ្យដំណើរការសកម្មភាពសង្គមក្នុងបំណងស្តារសេដ្ឋកិច្ចជាតិឡើងវិញ។ នេះបើយោងតាមហ្វេសប៊ុកលោក វេង សាខុន នៅថ្ងៃទី ៨ ខែមីនា។
លោករដ្ឋមន្ត្រីបានឱ្យដឹងទៀតថា ដើម្បីជួយសម្រាលបញ្ហាខ្វះខាតស្បៀងរបស់ប្រជាពលរដ្ឋដែលទទួលផលប៉ះពាល់ដោយកូវីដ ១៩ លោកនាយករដ្ឋមន្ត្រី ហ៊ុន សែន បានសម្រេចឱ្យរូបលោក និងអភិបាលខេត្ត នាំយកអង្ករជំនួយសង្គ្រោះបន្ទាន់នេះទៅចែកជូន ប្រជាពលរដ្ឋនៅខេត្តឧត្តរមានជ័យ។ លោកថា សកម្មភាពនេះ ពិតជាបានបង្ហាញយ៉ាងច្បាស់ពីការគិតគូរយកចិត្តទុកដាក់ខ្ពស់របស់ប្រមុខដឹកនាំប្រទេសអំពីសុខទុក្ខរបស់ប្រជាពលរដ្ឋនៅគ្រប់កាល:ទេស: និងគ្រប់ទីកន្លែងលើផ្ទៃប្រទេស ស្របនឹងពាក្យថា "ទីណាមានការលំបាក ទីនោះត្រូវតែមានដំណោះស្រាយ" បានទាន់ពេល និងមានប្រសិទ្ធភាព។
លោកថ្លែងថា៖ «អង្ករ ៤០ គីឡូក្រាមក្នុង ១ គ្រួសារនេះ ជាជំនួយបឋមនៅមានជំនួយជាបន្តបន្ទាប់ទៀត តាមរយ:កាកបាទក្រហមកម្ពុជា ដែលមានសម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន ជាប្រធាន ដៃគូអភិវឌ្ឍន៍ វិស័យឯកជន និងសប្បុរសជនមួយចំនួនទៀត»។
លោក ឌី រ៉ាដូ អ្នកនាំពាក្យរដ្ឋបាលខេត្តឧត្តរមានជ័យបានឱ្យដឹងនៅថ្ងៃទី ៨ ខែមីនាថា អង្ករដែលជាជំនួយសង្គ្រោះបន្ទាន់នេះជាជំនួយបន្ថែមលើថវិកាដែលរាជរដ្ឋាភិបាលធ្លាប់បានផ្តល់ក្នុងពេលកន្លងមក។ ជំនួយលើកនេះ មានអង្គរចំនួន ៤០ តោន សម្រាប់ចែកជូនប្រជាពលរដ្ឋ ១ ០០០ គ្រួសារក្នុងនោះ មានអ្នកស្រុកចុងកាល់ចំនួន ៣០០ គ្រួសារ ក្រុងសំរោងចំនួន ៤២៥ គ្រួសារ និងស្រុកបន្ទាយអំពិលចំនួន ២៧៥ គ្រួសារ។ ប៉ុន្តែក្រុងសំរោង និងស្រុកបន្ទាយអំពិល នឹងត្រូវចែកជូននៅពេលក្រោយទៀតរហូតដល់គ្រប់ ១ ០០០ គ្រួសារ។
លោកថ្លែងថា៖ «អាហ្នឹងជាស្បៀងសង្គ្រោះបន្ទាន់ ដែលបងប្អូនយើងលោកក្រីក្រ និងរងគ្រោះដោយសារផលប៉ះពាល់កូវីដ។ ក្នុង ១ គ្រួសារចែកជូន អង្គរ ៤០ គីឡូ ហើយនិងថវិកានៅចុងកាល់ហ្នឹងគឺយើងចែកម្នាក់ ១ ម៉ឺនរៀល» ។
ក្នុងឱកាសនោះដែរ លោក រដ្ឋមន្ត្រី បានណែនាំឱ្យមន្ទីរកសិកម្ម រុក្ខាប្រមាញ់ និងនេសាទខេត្ត ត្រូវបង្កើនការខិតខំប្រឹងប្រែងបន្ថែមទៀត លើការងារបង្កបង្កើនផល ដោយត្រូវសហការជាមួយដៃគូអភិវឌ្ឍន៍ វិស័យឯកជន អង្គការជាតិ អន្តរជាតិ ដើម្បីស្វះស្វែងរកជំនួយបន្ថែមទាំងបច្ចេកទេស និងហិរញ្ញវត្ថុពីគ្រប់មជ្ឈដ្ឋាន ដើម្បីយកមកជួយប្រជាកសិករទាំងក្នុងពេលបន្ទាន់ និងរយ:ពេលវែង។
លោក សូត្រ ស៊ីសុខឃាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យថ្លែងនៅថ្ងៃទី ៨ ខែមីនាថា ពូជត្រី ពូជកង្កែប មាន់ និងពូជបន្លែ ដែលចែកជូនក្នុងពេលកន្លងមក គឺពលរដ្ឋយកទៅអនុវត្តបានផលល្អ។
លោកថា៖ «នៅពេលដែលមានគោលការណ៍បើកចំហនៅក្នុងការព្យាបាលជំងឺកូវីដតាមផ្ទះ អត់មានបញ្ហាទេ បើអ្នកឈឺនៅផ្ទះព្យាបាលអស់ថ្នាំទៅពេទ្យ អ៊ីចឹងវាធ្វើឱ្យយើងវិលទៅរកភាពធម្មតាវិញ យើងអាចចេញចូលរកគ្នាបាន។ ប៉ុន្តែពីមុនអត់ទេ កើតមួយហើយ តាមរកអ្នកពាក់ព័ន្ធទាំងអស់ អ៊ីចឹងម្នាក់ៗ បាក់ទឹកចិត្ត តែឥឡូវអត់អីទេធម្មតា»។
បើតាម លោក ស៊ីសុខឃាង នៅឆ្នាំ ២០២១ ការងារបង្កបង្កើនផលទាំងរដូវប្រាំង និងរដូវវស្សា សម្រេចបាន ៩៧ ៣៣០ ហិកតា ទិន្នផលទទួលបាន ២៧១ ៣៦៣ តោន ដែលតាមការវាយតម្លៃលើតុល្យភាពស្បៀងអាចនៅសល់អង្ករ ១១៤ ៦០៤ តោន។
ដោយឡែក តាមរយៈកម្មវិធីផ្សព្វផ្សាយបច្ចេកទេសកសិកម្មថ្មីដែលធន់នឹងការប្រែប្រួលអាកាសធាតុ (ASPIRE) ការគាំទ្រដោយកម្មវិធីអភិវឌ្ឍន៍សេដ្ឋកិច្ចមូលដ្ឋានរបស់អង្គការ GIZ ការគាំទ្រដោយគម្រោង RUSH-IT ការគាំទ្រដោយគម្រោង CHAIN និង ការគាំទ្រសកម្មភាពវារីវប្បកម្មរបស់រដ្ឋបាលជលផល បានផ្តល់កូនត្រី និងតង់ចិញ្ចឹមកូនកង្កែប និងតង់ចិញ្ចឹមពូជមាន់ ចំណី និងស្នូកទឹក-ស្នូកចំណី ជូនដល់កសិករចំនួន ១ ១៩៥ គ្រួសារ និង គ្រាប់ពូជបន្លែចម្រុះជូនកសិករចំនួន ១ ២៥០ គ្រួសារ ដែលស្ថិតក្នុងក្រុងសំរោង ស្រុកចុងកាល់ ស្រុកបន្ទាយអំពិល ស្រុកត្រពាំងប្រាសាទ និងស្រុកអន្លង់វែង៕
