ភ្នំពេញៈ ក្រសួងវប្បធម៌ និងវិចិត្រសិល្បៈ បានចាត់ទុកការយករូបរាងទង់ជាតិខ្មែរទាំងមូលទៅច្នៃធ្វើជាសម្លៀកបំពាក់តាំងពីលើដល់ក្រោម ថាជាការធ្វើឱ្យបាត់បង់តម្លៃជាតិ សាសនា ព្រះមហាក្សត្រ ដែលប្រជាជនកម្ពុជាតែងតែគោរពនិងស្នើឱ្យអ្នកច្នៃម៉ូដ ធ្វើការពិចារណា និងកែប្រែឡើងវិញ។
ការលើកឡើងនេះ បន្ទាប់ពីមានផលិតកម្មក្នុងស្រុកមួយបានយកគំរូទង់ជាតិមកច្នៃធ្វើជាសម្លៀកបំពាក់ ដើម្បីត្រៀមថត MV នៅតំបន់រមណីយដ្ឋានអង្គរ កាលពីពេលថ្មីៗនេះ។ ការច្នៃនេះមានទាំងអ្នកគាំទ្រផង និងអ្នករិះគន់ផង។
យ៉ាងណាក្តី រដ្ឋមន្ត្រីក្រសួងវប្បធម៌លោកស្រី ភឿង សកុណា បានថ្លែងថា បងប្អូនដែលគាត់ធ្វើនោះ ដោយសារតែមិនបានយល់ដឹងវែងឆ្ងាយពីទំនៀមទម្លាប់ប្រពៃណីរបស់កម្ពុជា។ លោកស្រី ទទួលស្គាល់ថា តាមតថភាពជាក់ស្តែង គោលបំណងនៃការច្នៃ និងការរៀបចំនោះផ្តើមចេញពីការស្រឡាញ់ជាតិ និងចង់បង្ហាញមោទនភាពជាតិ ប៉ុន្តែការដែលយកទង់ជាតិធ្វើជាខោអាវទាំងមូលត្រូវតែពិចារណាឡើងវិញ។
លោកស្រីមានប្រសាសន៍ថា៖ «រូបទង់ជាតិកន្លងមកមានគេយកដាក់នៅលើអាវ គេច្នៃតូចៗ ប៉ុន្តែគេមិនមែនយកមកទាំងអស់នៃទង់ជាតិមករុំខ្លួនទេ ព្រោះទង់ជាតិ គឺជាអ្វីដែលយើងគោរព ព្រោះទង់ជាតិយើងបង្ហូតឡើងលើគោរពទាំងអស់គ្នា សូម្បីព្រះករុណា ក៏គោរពទង់ជាតិដែរ»។
លោកស្រីបញ្ជាក់ថា ធម្មតាទង់ជាតិខ្មែរគឺជារបស់ដែលមានតម្លៃហើយគេមិនដែលយកទៅស្លៀកនៅក្រោមចង្កេះទេគេអាចច្នៃជារូបតូចៗនៅលើអាវទាំងខាងមុខ និងខាងក្រោយបាន ប៉ុន្តែបើយកទង់ជាតិទាំងអស់មកច្នៃអ៊ីចឹងវាទៅជារឿងមួយមិនសមរម្យទៅវិញ។ «អ្នកខ្លះញ៉ាំអីប្រឡាក់ដៃយកមកជូតនឹងសំពត់មានរូបទង់ជាតិ ហើយអង្គុយនៅពីលើអ៊ីចឹងវាបាត់អស់តម្លៃមួយចំនួនទៅហើយ»។
ក្នុងន័យនេះលោកស្រី ភឿង សកុណា លើកឡើងថា ប្រទេសនីមួយៗមានវប្បធម៌រៀងៗខ្លួន ហើយកុំប្រៀបធៀបវប្បធម៌គេ និងកម្ពុជា ព្រោះមានការគោរពខុសៗគ្នា។ លោកស្រីថា៖ «ខ្ញុំឃើញដែរនៅប្រទេសអឺរ៉ុបមួយចំនួន គេច្នៃទង់ជាតិ ជាកម្រាលជូតជើង គេច្នៃធ្វើអីផ្សេងៗ ប៉ុន្តែនេះជារឿងរបស់គេ ចំណែកខ្មែរយើងជាតិ សាសនាព្រះមហាក្សត្រ គឺយើងគោរពណាស់ អ៊ីចឹងកុំយកអ្វីដែលជាទំនៀមទម្លាប់របស់គេមកដាក់នៅក្នុងសង្គមរបស់យើង»។
ជាមួយគ្នានេះដែរអ្នកនាំពាក្យអាជ្ញាធរជាតិអប្សរាលោក ឡុង កុសល មានប្រសាសន៍ថា ការយកទង់ជាតិខ្មែរ ដែលជានិមិត្តរូបរបស់ជាតិទៅច្នៃធ្វើជាម៉ូដសម្លៀកបំពាក់ គឺជាការមិនសមរម្យ ព្រោះគេតែងតែផ្តល់តម្លៃដល់ទង់ជាតិហើយទង់ជាតិតែងតែត្រូវបានបង្ហូតឡើងលើដោយអមជាមួយនូវការច្រៀង និងភ្លេងជាតិ។
លោកថ្លែងថា៖ «ទង់ជាតិត្រូវបានគោរពដោយស្មារតីស្នេហាជាតិ ស្រឡាញ់ទឹកដីជាតិមាតុភូមិ ។ ម្យ៉ាងទៀត ទង់ជាតិក៏ត្រូវបានផ្ដល់ជាមហាកិត្តិយសសម្រាប់ វីរជន យុទ្ធជន យុទ្ធនារីដែលបានពលីជីវិតនៅពេលបានចេញច្បាំងការពារជាតិ ទឹកដី ឬទៅបំពេញបេសកកម្ម មនុស្សធម៌នៅក្រៅគឺជាតិតែងដឹងគុណ និងយកទង់ជាតិទៅគ្រងពីលើដើម្បីសម្តែងការគោរព និងដឹងគុណ»។
លោកថា ដូច្នេះការយករូបភាពទង់ជាតិមកធ្វើជាសម្លៀកបំពាក់គឺមិនសមរម្យទេ និងអាចជាការប្រមាថ ដូចជានៅពេលដែល គេស្លៀកពាក់ គឺគេហាក់បីដូចជាបានអង្គុយលើទង់ជាតិដែលតំណាងឱ្យជាតិទាំងមូល ឬក៏នៅពេលដែលសម្លៀកបំពាក់នោះប្រឡាក់ អ្នកខ្លះមិនបានយកទៅបោកសម្អាតទេបែរជាយកទៅទុកចោលជាដើម។
លោកបញ្ជាក់ថា ប្រសិនបើចង់បង្ហាញឱ្យឃើញពីទឹកចិត្តស្រឡាញ់ជាតិពិតមែននោះ គឺនៅពេលមកទស្សនាតំបន់អង្គរ ដែលជាសម្បត្តិវប្បធម៌ និងជាបេតិកភណ្ឌរបស់មនុស្សជាតិ សូមជួយចូលរួមការពារបរិស្ថាន កុំបោះសំរាមចោលនៅក្នុងរមណីយដ្ឋានអង្គរ ត្រូវធ្វើដំណើរថ្មើរជើងចូលតំបន់អង្គរ ទៅតាមផ្លូវដែលបានរៀបចំជូនសូមកុំដើរជាន់ស្មៅ ដែលនាំឱ្យខូចសោភណភាព៕
វីដេអូ៖