.jpg)
លោក កឹម សុខា ពេលចេញពីតុលាការកន្លងមក។ ហុង មិនា
ភ្នំពេញៈ សំណុំរឿងក្ដីលោក កឹម សុខា អតីតមេដឹកនាំបក្សប្រឆាំងដែលគ្រោងធ្វើនៅថ្ងៃនេះ ត្រូវបានលើកពេលទៅថ្ងៃទី ១៦ ខែមីនាវិញ ដោយហេតុតំណាងអយ្យការអមសាលាដំបូងម្នាក់មានវិជ្ជមានកូវីដ ១៩។ លោក កឹម សុខា ជាប់ចោទពីបទ «សន្ទិដ្ឋភាពជាមួយបរទេស ឬ គប់គិតជាមួយបរទេសដើម្បីផ្តួលរំលំរាជរដ្ឋាភិបាលកម្ពុជា»។
តាមលិខិតស្នើសុំកាលពីថ្ងៃទី ៧ ខែមីនារបស់ លោក ឆាយ ហុង ព្រះរាជអាជ្ញាធរងនៃសាលាដំបូងរាជធានីភ្នំពេញបានឱ្យដឹងថា កាលពីថ្ងៃទី ៤ ខែមីនា ឆ្នាំ ២០២២ លោក ប្លង់ សុផល ជាតំណាងអយ្យការក្នុងសំណុំរឿងព្រហ្មទណ្ឌនេះ បានធ្វើតេស្តពិនិត្យសុខភាពរកឃើញវិជ្ជមានជំងឺកូវីដ ១៩ បញ្ជាក់ដោយមន្ទីរពិសោធន៍វេជ្ជសាស្ត្របង្អែកជាតិ។
លិខិតនេះបានសរសេរថា៖ «ហេតុនេះ ដើម្បីការពារ និងទប់ស្កាត់ការឆ្លងរីករាលដាលនៃជំងឺកូវីដ ១៩ តំណាងអយ្យការស្នើសុំលើកពេលសវនាការនៅថ្ងៃទី ៩ ខែមីនា ឆ្នាំ ២០២២ វេលាម៉ោង ៨:៣០ នាទីព្រឹក ទៅពេលក្រោយ»។
លោក កូយ សៅ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ បានបញ្ជាក់ថា សវនាការនឹងបន្តនៅថ្ងៃទី ១៦ ខែមីនា ឆ្នាំ ២០២២។
លោក ប្លង់ សុផល អ្នកនាំពាក្យសាលាដំបូងរាជធានី-ភ្នំពេញប្រាប់ភ្នំពេញប៉ុស្តិ៍នៅថ្ងៃទី ៨ ខែមីនា ឆ្នាំ ២០២២ ថា លោកពិតជាមានវិជ្ជាមានកូវីដ-១៩ប្រាកដមែន។
លោក ផែង ហេង មេធាវីការពារក្តី លោក កឹម សុខា ប្រាប់ភ្នំពេញប៉ុស្តិ៍នៅថ្ងៃទី ៨ ខែមីនា ឆ្នាំ ២០២២ ឱ្យដឹងថា ក្រុមមេធាវីរបស់លោកបានទទួលលិខិតពន្យារសវនាការនេះហើយ។
លោកបានថ្លែងថា៖ «អានេះ វាអាស្រ័យទៅតុលាការ គាត់ជាអ្នកដឹកនាំនីតិវិធី។ យើងចេះតែចង់ឱ្យពន្លឿន ប៉ុន្តែយើងមិនដឹងធ្វើយ៉ាងម៉េច តាមដំណើរហ្នឹងទៅ»។ លោកក៏ស្នើសុំឱ្យសាលាដំបូងរាជធានីភ្នំពេញមានការប៉ះប៉ូវពេលវេលា និងថ្ងៃបន្ថែមទៀតចំពោះសវនាការ លោក កឹម សុខា នេះដើម្បីបញ្ចប់សំណុំរឿងនេះ ដោយការបើកសវនាការព្រឹកល្ងាច គឺសវនាការនេះនឹងឆាប់ចប់ដែរ។
លោក ជិន ម៉ាលីន អ្នកនាំពាក្យក្រសួងយុត្តិធម៌បានសរសេរនៅលើទំព័រហ្វេសប៊ុកកាលពីថ្ងៃទី ៥ ខែមីនាថា ការលើកពេលនៃសវនាការនេះ មិនមែនជាចេតនាអូសបន្លាយនោះទេ។ លោកថា៖ «តុលាការត្រូវដំណើរការដោយត្រឹមត្រូវទៅតាមនីតិវិធីច្បាប់ ដើម្បីធានាថា សិទ្ធិរបស់ភាគីត្រូវបានធានា ជាពិសេសសិទ្ធិការពារខ្លួនរបស់ជនជាប់ចោទ»។ «សំណុំរឿងនេះ មានភ័ស្តុតាងរឹងមាំណាស់ ហើយក្នុងនាមជាអ្នកតាមដាន និងសង្កេតលើសំណុំរឿងជាច្រើននាពេលកន្លងមក ខ្ញុំមិនដែលឃើញសំណុំរឿងដែលមានភ័ស្តុតាងរឹងមាំ និងស៊ីចង្វាក់គ្នាយ៉ាងល្អដូចសំណុំរឿងមួយនេះទេ»៕
វីដេអូ៖
