.jpg)
បុរសម្នាក់ត្រូវបានសមត្ថកិច្ចឃាត់ខ្លួន ករណីសម្លាប់ប្រពន្ធកាលពីម្សិលមិញ។ រូបថត ប៉ូលិស
សៀមរាបៈ បុរសម្នាក់បានសម្លាប់ស្ត្រីដែលជាប្រពន្ធ អាយុ ៤២ ឆ្នាំម្នាក់ដោយអារកនៅក្នុងបរិវេណផ្ទះនៅភូមិចុងកៅស៊ូ សង្កាត់ស្លក្រាម ក្រុង-ខេត្ត សៀមរាប នៅថ្ងៃទី ៨ មីនា ជាថ្ងៃដែលពិភពលោកប្រារព្ធទិវាអន្តរជាតិនារី។ យោងតាមប្រភពនគរបាលមូលដ្ឋាន។
លោក ភឹង ចិន្ដារ៉េត ស្នងការរងទទួលផែនការងារនគរបាលព្រហ្មទណ្ឌថ្លែងថា ជនសង្ស័យឈ្មោះ ស្រេង សុខ អាយុ ៤៦ ឆ្នាំគ្មានមុខរបរអ្វីទេ។ រីឯស្ត្រីរងគ្រោះឈ្មោះ សោរ គឹមហៀង អាយុ ៤២ ឆ្នាំ។ ពួកគេរស់នៅ ភូមិចុងកៅស៊ូ សង្កាត់ ស្លក្រាម ក្រុង-ខេត្ត សៀមរាប។
លោកថា៖ «បើតាមស្តាប់សម្តីរបស់ជនសង្ស័យទៅគឺគ្មានរឿងអ្វីធំដុំទេ ជារឿងទំនាស់ក្នុងគ្រួសារតិចតួចប៉ុណ្ណោះ។ តាមមើលជនសង្ស័យ មានបញ្ហាខួរក្បាលផងក៏មិនដឹងព្រោះគាត់នៅតែផ្ទះ ហើយស្ត្រីរងគ្រោះរកស៊ីចិញ្ចឹម»។
លោក ជា ចំរើន អធិការនគរបាលក្រុងសៀមរាបនៅថ្ងៃទី ៨ មីនា ថ្លែងថា ពេលសម្លាប់ប្រពន្ធរបស់គាត់ស្លាប់ហើយជនសង្ស័យបានយកភួយទៅគ្របសាកសពស្ត្រីរងគ្រោះបន្ទាប់មកជនសង្ស័យបានចាក់សោទ្វារផ្ទះ និងទ្វាររបងហើយជិះម៉ូតូតែម្នាក់ឯងទៅប្រាប់មន្ត្រីនគរបាល ១ រូបនៅតាមផ្លូវដោយនិយាយថា គាត់បានកាប់ប្រពន្ធរបស់គាត់ស្លាប់ហើយ។ ភ្លាមៗមន្ត្រីនគរបាលរូបនោះបានឱ្យជនសង្ស័យនាំទៅមើលសាកសពហើយក៏ឃើញដូចការប្រាប់របស់ជនសង្ស័យមែន។
យោងតាមចម្លើយបឋមជនសង្ស័យខឹងនឹងប្រពន្ធ មិនសូវយកចិត្តទុកដាក់ក្រុមគ្រួសារនិងបង្ខំឱ្យខ្លួនផឹកទឹកក្រូចឆ្មារសុទ្ធរហូតមានជំងឺក្រពះ ជំងឺតម្រងនោម។ សមត្ថកិច្ចកំពុងកសាងសំណុំរឿងបញ្ជូនជនសង្ស័យទៅសាលាដំបូងខេត្តសៀមរាបដើម្បីចាត់ការតាមច្បាប់បន្តទៀត៕
