ភ្នំពេញៈ រដ្ឋមន្ត្រីក្រសួងមហាផ្ទៃ លោក ស ខេង នឹងជួបប្រជុំជាមួយភាគីពាក់ព័ន្ធនៅថ្ងៃទី ៩ ខែមីនា ដើម្បីស្វែងរកដំណោះស្រាយវិវាទការងារក្រុមហ៊ុនណាហ្គាវើលដ៍ លីមីតធីត ដែលបានធ្វើឱ្យបុគ្គលិក និងអតីតបុគ្គលិកក្រុមហ៊ុននេះ ចេញតវ៉ាអូសបន្លាយអស់រយៈពេលជាង ៣ ខែមកហើយ។
ការកោះប្រជុំរបស់លោក ស ខេង នេះស្របពេលដែលរដ្ឋបាលរាជធានីភ្នំពេញបានធ្វើការព្រមានចាត់វិធានការផ្លូវច្បាប់ រួមទាំងការផាកពិន័យធ្ងន់ធ្ងរទៅលើអតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ ក្នុងករណីដែលពួកគេមិនសហការជាមួយមន្ត្រីសុខាភិបាលក្នុងការធ្វើតេស្តរកវីរុសកូវីដ ១៩។
យោងតាមលិខិតអញ្ជើញមួយច្បាប់ចេញផ្សាយកាលពីថ្ងៃទី ៤ ខែមីនា ប៉ុន្តែភ្នំពេញប៉ុស្តិ៍ទើបទទួលបាននៅថ្ងៃទី ៨ មីនា ឱ្យដឹងថា កិច្ចប្រជុំរកដំណោះស្រាយវិវាទការងារក្រុមហ៊ុនណាហ្គាវើលដ៍នេះនឹងធ្វើឡើងក្រោមអធិបតីភាព លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃនៅវេលាម៉ោង ៣ រសៀល ថ្ងៃទី ៩ ខែមីនា នៅនៅសាលារាជធានីភ្នំពេញេ។
ប្រភពដដែលបានឱ្យដឹងថា កិច្ចប្រជុំនេះ មានសមាសភាពភាគីពាក់ព័ន្ធជាច្រើននឹងចូលរួម រួមមាន រដ្ឋមន្ត្រីក្រសួងការងារ លោក អ៊ិត សំហេង រដ្ឋមន្ត្រីក្រសួងយុត្តិធម៌ លោក កើត រិទ្ធ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង អគ្គស្នងការនគរបាលជាតិ លោក នេត សាវឿន អភិបាលរាជធានីភ្នំពេញ លោក ឃួង ស្រេង ប្រធានសាលាដំបូងរាជធានីភ្នំពេញ លោក តាំង ស៊ុនឡាយ ព្រះរាជអាជ្ញាអយ្យការអមសាលាដំបូងរាជធានីភ្នំពេញ លោក ច្រឹង ខ្មៅ រួមទាំងស្នងការនគរបាលរាជធានីភ្នំពេញ លោក ស ថេត និងមេបញ្ជាការកងរាជអាវុធហត្ថរាជធានីភ្នំពេញលោក រ័ត្ន ស្រ៊ាង ផងដែរ។
ស្របពេលជាមួយគ្នានេះ រដ្ឋបាលរាជធានីភ្នំពេញបានព្រមានចាត់វិធានការផ្លូវច្បាប់ រួមទាំងការផាកពិន័យជាប្រាក់ពី ១ លានទៅ ៥ លានរៀល ចំពោះអតីតនិងបុគ្គលិកក្រុមហ៊ុនណាហ្គាវើលដ៍ក្នុងករណីដែលពួកគេមិនសហការជាមួយមន្ត្រីសុខាភិបាលពាក់ព័ន្ធការធ្វើតេស្តរកវីរុសកូវីដ ១៩ និងអំពាវនាវឱ្យបញ្ឈប់នូវរាល់សកម្មភាពប្រមូលផ្ដុំបន្តទៀត។
សេចក្តីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី ៧ ខែមីនាបានឱ្យដឹងថា៖ «មានមនុស្សមួយក្តាប់តូចក្នុងជួរបាតុករក្រុមហ៊ុនណាហ្គាវើលដ៍ និងមនុស្សមួយក្រុមដែលនៅខាងក្រៅបានចិញ្ចឹមចិត្តរៀបចំសេណារីយោឱ្យមានរូបភាពផ្សេងៗ និងញុះញង់ឱ្យមានការប្រមូលផ្តុំ ដើម្បីកេងចំណេញផលប្រយោជន៍»។ សេចក្តីជូនដំណឹងលើកឡើងទៀតថា៖ «លើសពីនេះទៀត ក្រុមនេះបានលើកហេតុផលពន្យល់ ឆក់ឱកាស ប្រើប្រាស់ និងរៀបចំក្រុមបាតុករ ដែលជាអតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ ឱ្យធ្វើបាតុកម្មខុសច្បាប់មុនថ្ងៃ ៨ មីនា ១ ថ្ងៃ គឺនៅថ្ងៃទី ៧ ខែមីនា ឆ្នាំ ២០២២ ដើម្បីយករូបភាពនានា ពីការអនុវត្តវិធានការសុខាភិបាលប្រយុទ្ធប្រឆាំងនឹងជំងឺកូវីដ ១៩ ការរៀបចំសណ្តាប់ធ្នាប់សាធារណៈរបៀបរៀបរយសង្គមរបស់អាជ្ញាធរមានសមត្ថកិច្ចសម្រាប់ធ្វើការបកស្រាយទៅជារូបភាពអវិជ្ជមានផ្សេងៗតាមការចង់បានរបស់ពួកគេ»។
រដ្ឋបាលរាជធានីបន្តថា ជាក់ស្តែងក្នុងការអនុវត្តវិធានការសុខាភិបាលប្រយុទ្ធប្រឆាំងជំងឺកូវីដ ១៩ នៅរសៀលថ្ងៃទី ៧ ខែមីនា អាជ្ញាធរមានសមត្ថកិច្ចបានអញ្ជើញក្រុមបាតុករទាំងអស់ចំនួន ១៨០ នាក់ ទៅមណ្ឌលចត្តាឡីស័ករាជធានីភ្នំពេញដើម្បីធ្វើតេស្ដស្វែងរកវីរុសកូវីដ ១៩។
ប៉ុន្តែនៅពេលទៅដល់ទីតាំងខាងលើ ក្រុមបាតុករទាំងអស់បែរជាមិនផ្តល់កិច្ចសហការជាមួយក្រុមគ្រូពេទ្យប្រចាំការនៅទីនោះឡើយ ដោយពួកគាត់មិនព្រមផ្តល់ព័ត៌មានអំពីឈ្មោះ និងអត្តសញ្ញាណរបស់ខ្លួនដើម្បីឱ្យក្រុមគ្រូពេទ្យបំពេញបែបបទសម្រាប់ធ្វើតេស្ត។ ទោះជាយ៉ាងណាក៏ដោយ ក្រុមគ្រូពេទ្យនៅតែខិតខំព្យាយាមពន្យល់ហេតុផលដល់គាត់ដោយភាពអត់ធ្មត់ ធ្វើយ៉ាងណាឱ្យពួកគាត់ផ្ដល់សំណាកតាមពេលវេលាកាន់តែឆាប់ដែលអាចធ្វើទៅបាន។
រដ្ឋបាលរាជធានីភ្នំពេញបានព្រមានថា៖ «ក្នុងករណី ដែលបាតុករទាំងអស់នៅតែមានះពុំព្រមផ្ដល់កិច្ចសហការ រដ្ឋបាលរាជធានីភ្នំពេញ នឹងអនុវត្តវិធានការច្បាប់ដោយពិន័យអន្តរការណ៍ជាប្រាក់ពី ១ លាន ទៅ ៥ លានរៀល ហើយក្នុងករណីមិនរាងចាលនឹងពិន័យទ្វេដង ស្របតាមមាត្រា ២១ និងមាត្រា ២៧ ស្តីពីវិធានការសុខាភិបាលដើម្បីទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយ គ្រោះថ្នាក់ធ្ងន់ធ្ងរផ្សេងទៀត»។
រដ្ឋបាលរាជធានីបន្តទៀតថា ក្នុងករណីមានការរារាំងការអនុវត្តវិធានការសុខាភិបាលនឹងកសាងសំណុំរឿងបញ្ជូនទៅតុលាការ។
នាយកប្រតិបត្តិមជ្ឈមណ្ឌលសម្ព័នភាពការងារ និងសិទ្ធិមនុស្សលោក មឿន តុលា ដែលតាមដានករណីនេះ មើលឃើញថា ការអនុវត្តច្បាប់របស់អាជ្ញាធរនាពេលបច្ចុប្បន្នមានស្តង់ដា ២ ចំពោះប្រជាពលរដ្ឋធម្មតា និងក្រុមកូដករទាំងនោះ។ លោកបញ្ជាក់ថា៖ «យើងឃើញមានមង្គលការ បុណ្យទាន មានមនុស្សណែនតាន់តាប់ ហើយបើយើងអនុវត្តវិធានការគួរទៅយកសំណាកនៅទីតាំងទាំងនោះផង ព្រោះធម្មតារោងការ បុណ្យ ជួបជុំ ជល់កែវ មិនពាក់ម៉ាស់ ប៉ុន្តែកូដករគាត់ពាក់ម៉ាស់ នេះខ្ញុំនិយាយតាមការមើលឃើញ អ៊ីចឹងខ្ញុំថា វិធានការទៅលើកូដករណាហ្គាវើលដ៍ វាហាក់ដូចជាស្តង់ដា ២»។ យ៉ាងណាមិញលោក នៅតែជំរុញដល់អាជ្ញាធរពាក់ព័ន្ធគួរដោះស្រាយដោយសន្តិវិធី ដើម្បីផលប្រយោជន៍រួមស្របពេលដែលរាជរដ្ឋាភិបាលកំពុងស្តារសេដ្ឋកិច្ចឡើងវិញ។
លោកថា៖ «បើសិនជាយើងរកសរកខ្មៅមិនចប់ទេ ខ្ញុំថា រឿងដែលសំខាន់ឈរលើគោលការណ៍មនុស្សធម៌ក្នុងន័យថា ពួកណាហ្គានេះ បាត់បង់ការងារហើយ បាត់បង់ចំណូលមានបញ្ហាផ្លូវចិត្ត អ៊ីចឹងបើសិនជាអាជ្ញាធរដាក់ពិន័យជាប្រាក់ទៀត គ្នាមានលុយពីណាបង់ មានតែធ្វើឱ្យមានការមិនសប្បាយចិត្តរវាងពលរដ្ឋ និងអាជ្ញាធរ។ អ៊ីចឹងខ្ញុំថា ជម្រើសដែលល្អរកវិធីដោះស្រាយ ធ្វើតាមប្រសាសន៍របស់សម្តេចក្រឡាហោម ស ខេង»។
សេចក្តីថ្លែងការណ៍របស់សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានចាត់ទុកសកម្មភាពរបស់អាជ្ញាធរជាការបំបិទសេរីភាព និងទាមទារឱ្យដោះលែងតំណាងកម្មករ និងសកម្មជន ១១ រូប ដែលកំពុងជាប់ឃុំ។ បន្ថែមពីនេះ ជំរុញឱ្យក្រុមហ៊ុនណាហ្គាវើលដ៍ ដោះស្រាយវិវាទជាមួយកម្មករហើយទទួលយកបុគ្គលិកសរុបចំនួន ៣៦៥ នាក់ឱ្យចូលធ្វើការងារវិញ។
តាមរយៈសេចក្តីជូនដំណឹងរបស់រដ្ឋបាលរាជធានីភ្នំពេញបានអំពាវនាវដល់ក្រុមបាតុករ ដែលជាអតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ ដទៃទៀត «កុំជឿតាមការអូស-ទាញរបស់ជនឱកាសនិយមមួយក្តាប់តូច ដើម្បីកេងចំណេញ និងស្នើឱ្យបញ្ឈប់នូវរាល់សកម្មភាពប្រមូលផ្ដុំខុសច្បាប់ផ្ទុយនឹងវិធានការសុខាភិបាល ដែលអាចនាំឱ្យមានហានិភ័យ ចំពោះសុខភាពសាធារណៈ និងបញ្ចៀសការកកស្ទះចរាចរណ៍ ព្រមទាំងការរំខានដល់ការប្រកបរបរអាជីវកម្ម និងកិច្ចការងារប្រចាំថ្ងៃរបស់ពលរដ្ឋដទៃទៀត»៕
វីដេអូ៖