ភ្នំពេញៈ រដ្ឋាករទឹកស្វយ័តក្រុងភ្នំពេញចុះហត្ថលេខាលើកិច្ចសន្យាគម្រោងពង្រីកប្រព័ន្ធផ្គត់ផ្គង់ទឹកស្អាតក្រុងតាខ្មៅនៃខេត្តកណ្តាលជាមួយក្រុមហ៊ុន KKKCT CONSORTIUM ក្រោមហិរញ្ញប្បទានឥតសំណងរបស់រដ្ឋាភិបាលជប៉ុន ដែលមានទឹកប្រាក់សរុបចំនួន ៣ ៤២១ លានយ៉េន។
ពិធីចុះហត្ថលេខាលើកិច្ចសន្យាគម្រោងពង្រីកប្រព័ន្ធផ្គត់ផ្គង់ទឹកស្អាតក្រុងតាខ្មៅនេះ ត្រូវបានធ្វើឡើងកាលពីថ្ងៃទី ៧ ខែមីនា ក្រោមវត្តមានលោក អ៊ុំ សុថា រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាភិបាលនៃរដ្ឋាករទឹកស្វយ័តក្រុងភ្នំពេញ លោក ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ និងលោក OKAZAKI Koichi ប្រធានទីប្រឹក្សាបច្ចេកទេសនៃក្រុមហ៊ុន Nihon Suido Consultant Co., Ltd។
លោក ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញបានឱ្យដឹងថា គម្រោងនេះនឹងចាប់ផ្តើមដំណើរការសាងសង់នាខែមិថុនា ឆ្នាំ ២០២២ និងបញ្ចប់នាខែធ្នូ ឆ្នាំ ២០២៤ ដោយក្រុមហ៊ុន ម៉ៅការសាងសង់មកពីប្រទេសជប៉ុន KKKCT CON-SORTIUM និងត្រួតពិនិត្យដោយក្រុមហ៊ុនទីប្រឹក្សាបច្ចេកទេសមកពីប្រទេសជប៉ុន។
ទន្ទឹមនេះ លោក ឡុង ណារ៉ូ បានស្នើឱ្យពលរដ្ឋចូលរួមប្រើប្រាស់ទឹកដោយសន្សំសំចៃក្នុងរដូវប្រាំង ដើម្បីឱ្យអ្នកនៅជាយរាជធានីភ្នំពេញមានទឹកប្រើប្រាស់ដូចអ្នករស់នៅកណ្តាលក្រុង។
លោក អ៊ុំ សុថា មានប្រសាសន៍ថា គម្រោងពង្រីកប្រព័ន្ធផ្គត់ផ្គង់ទឹកស្អាតក្រុងតាខ្មៅនេះ មានសមត្ថភាពផលិតទឹកស្អាត ៣០ ០០០ ម ៣/ថ្ងៃ ដើម្បីផ្គត់ផ្គង់ និងបំពេញសេចក្តីត្រូវការការប្រើប្រាស់ទឹកនៅភាគខាងត្បូង និងខាងលិចនៃរាជធានីភ្នំពេញ និងក្រុងតាខ្មៅ។
លោកបន្តថា គម្រោងពង្រីកប្រព័ន្ធផ្គត់ផ្គង់ទឹកស្អាតក្រុងតាខ្មៅ គឺជាគម្រោងអាទិភាពមួយក្នុងចំណោមគម្រោងអាទិភាពផ្សេងទៀតដែលបានទទួលនូវហិរញ្ញប្បទានឥតសំណងពីរដ្ឋាភិបាលជប៉ុនតាមរយៈទីភ្នាក់ងារសហប្រតិបតិ្តការអន្តរជាតិនៃប្រទេសជប៉ុន ដែលមានទឹកប្រាក់សរុបចំនួន ៣ ៤២១ លានយ៉េន។ ទន្ទឹមនេះដែរលោក សង្ឃឹម និងជឿជាក់ថា គម្រោងនេះពិតជាដំណើរការប្រកបដោយជោគជ័យទៅតាមកម្មវិធីដែលបានកំណត់ និងចូលរួមចំណែកបញ្ចប់ជាស្ថាពរ នូវបញ្ហាកង្វះទឹកស្អាតនៅរាជធានី-ភ្នំពេញ និងក្រុងតាខ្មៅចាប់ពីឆ្នាំ ២០២៤ តទៅ ជាពិសេសបន្ទាប់ពីរោងចក្រប្រព្រឹត្តិកម្មទឹកស្អាតបាក់ខែង ជំហានទី ១ ត្រូវបានដាក់ឱ្យដំណើរការជាផ្លូវការ។
ដើម្បីចូលរួមចំណែកសម្រេចឱ្យបាននូវគោលដៅទី ៦ សី្តពី «ទឹកស្អាត និងអនាម័យ» ស្របគោលដៅអភិវឌ្ឍន៍ប្រកបដោយចីរភាពរបស់រាជរដ្ឋាភិបាល ដែលកំណត់ថា ប្រជាពលរដ្ឋរស់នៅតាមទីក្រុង និងទីប្រជុំជនទូទាំងប្រទេសនឹងទទួលបាននូវការផ្គត់ផ្គង់ទឹកស្អាត ១០០% នៅឆ្នាំ ២០២៥» រដ្ឋាករទឹកស្វយ័តក្រុងភ្នំពេញបានសហការយ៉ាងជិតស្និទ្ធជាមួយភ្នាក់ងារសហប្រតិបតិ្តការអន្តរជាតិនៃប្រទេសជប៉ុន (JICA) ដែលជាដៃគូអភិវឌ្ឍន៍ ដើម្បីពិនិត្យមើលឡើងវិញ និងធ្វើបច្ចុប្បន្នភាពផែនការមេដំណាក់កាលទី ៣ សម្រាប់ឆ្នាំ ២០២១-២០៣០ ដែលមានបញ្ចូលនូវគម្រោងអាទិភាពជាច្រើនសម្រាប់ការអភិវឌ្ឍ និងពង្រីកសមត្ថភាពប្រព័ន្ធផលិតកម្ម៕