ភ្នំពេញៈ ក្រសួងវប្បធម៌ និងវិចិត្រសិល្បៈបានជម្រាបជូនទៅផលិតករ សេវាករ អង្គការ និងក្រុមហ៊ុនថតភាពយន្តទាំងក្នុង និងក្រៅប្រទេសទាំងអស់ថា រាល់ការស្នើសុំការអនុញ្ញាតថតភាពយន្ត ភាពយន្តឯកសារ ចម្រៀងកាយវិការ ឬស្ប៉តពាណិជ្ជកម្ម ផលិតករត្រូវដាក់ពាក្យស្នើសុំផ្ទាល់មកនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ក្រោមចំណុះក្រសួង។
យោងតាមសេចក្តីជូនព័ត៌មានកាលពីថ្ងៃទី ៧ មីនាបានឱ្យដឹងថា តាមអនុក្រឹត្យលេខ ២៣៤ ចុះថ្ងៃទី ៨ ខែវិច្ឆិកា ឆ្នាំ ២០១៦ ស្តីពី «ការគ្រប់គ្រង ឧស្សាហកម្មភាពយន្ត» រាល់ការស្នើសុំការអនុញ្ញាតថតភាពយន្តភាពយន្តឯកសារចម្រៀងកាយវិការ ឬស្ប៉តពាណិជ្ជកម្មផលិតករត្រូវដាក់ពាក្យស្នើសុំផ្ទាល់មកនាយកដ្ឋានសិល្បៈភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈ។
ការស្នើសុំនេះត្រូវភ្ជាប់មកជាមួយនូវឯកសារពាក់ព័ន្ធមានជាអាទិ៍ លិខិតស្នើសុំថត អត្ថបទនិពន្ធរឿងពិស្តារ អត្ថបទសង្ខេបខ្លឹមសារកម្មវិធី និងទីកន្លែងថតជាដើម។ ក្រសួងបញ្ជាក់ថា៖ «ឯកសារទាំងនេះនឹងសម្រួលរាល់ទម្រង់នៃការស្នើសុំថតភាពយន្ត ភាពយន្តឯកសារ ចម្រៀងកាយវិការ ឬស្ប៉តពាណិជ្ជកម្មផ្សេងៗ ចៀសវាងការខាតបង់ពេលវេលានៃការស្នើសុំដោយប្រយោល ឬដោយវិធីផ្សេង តាមរយៈអង្គភាពផ្សេងៗទៀត»។
ក្រសួងវប្បធម៌ ក៏បានស្នើសុំកិច្ចសហការពីក្រសួងស្ថាប័នពាក់ព័ន្ធឱ្យជួយណែនាំដល់ផលិតករ ក្រុមហ៊ុនថតភាពយន្ត និងអង្គការនានា ដែលមានបំណងថតភាពយន្តក្នុងព្រះរាជាណាចក្រកម្ពុជាឱ្យមកទំនាក់ទំនងផ្ទាល់ជាមួយនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ ដែលមានអាសយដ្ឋាន អគារលេខ ៧០ ផ្លូវលេខ ២០០ សង្កាត់បឹងរាំង ខណ្ឌដូនពេញ រាជធានីភ្នំពេញ ឬតាមគេហទំព័រ www.cambodiafilm.info អ៊ីមែល contact@cambodiafilm.info លេខទូរស័ព្ទ (៨៥៥) ២៣ ២១៥ ៤៦៩ និង (៨៥៥) ១១ ៤៤៧ ៧៨៩ (សម្រាប់ជនបរទេស) ឬតេឡេក្រាម (៨៥៥)១២ ៩៧៧ ៩៧៧។
លោក ហាប់ ទូច អ្នកនាំពាក្យក្រសួងវប្បធម៌ ថ្លែងនៅថ្ងៃទី ៨ មីនាថា ការជូនព័ត៌មានរបស់ក្រសួងនេះ គឺដើម្បីឱ្យសាធារណជន ឬក៏ផលិតករទាំងក្នុង និងក្រៅប្រទេសដែលមានបំណងផលិតភាពយន្ត ឬវីដេអូផ្សេងៗដែលមិនដឹងថា ត្រូវទៅស្នើសុំនៅស្ថាប័នមួយណាទើបក្រសួងជូនដំណឹងបែបនេះដើម្បីផ្ដល់ភាពងាយស្រួលដល់ពួកគេ។ លោកថ្លែងថា៖ «ពីមុនមានផលិតករ សេវាករ អង្គការ និងក្រុមហ៊ុនថតភាពយន្តមួយចំនួន ពួកគាត់អត់ដឹង ហើយពួកគាត់ទៅសុំការអនុញ្ញាតថតនៅស្ថាប័នផ្សេងៗ មិនមែនជាក្រសួងវប្បធម៌ ដែលការធ្វើបែបនេះ វានាំឱ្យមានការយឺតយ៉ាវទៅវិញទេ»។
លោកបញ្ជាក់ថា តាមអនុក្រឹត្យលេខ ២៣៤ ចុះថ្ងៃទី ៨ ខែវិច្ឆិកា ឆ្នាំ ២០១៦ ស្តីពី «ការគ្រប់គ្រងឧស្សាហកម្មភាពយន្ត» រាល់ការស្នើសុំការអនុញ្ញាតថតភាពយន្ត ភាពយន្តឯកសារ ចម្រៀងកាយវិការ ឬស្ប៉តពាណិជ្ជកម្មផលិតករត្រូវដាក់ពាក្យស្នើសុំផ្ទាល់មកនាយកដ្ឋានសិល្បៈភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈ។
លោក ហាប់ ទូច បញ្ជាក់ថា បើសិនជាផលិតករមិនបានស្នើសុំទេ សមត្ថកិច្ចអាចឬអាជ្ញាធរដែនដីអាចមានសិទ្ធិបញ្ឈប់រាល់សកម្មភាពផលិត ការថតទាំងអស់បាន។
លោកបន្តថា៖ «ការស្នើសុំមកក្រសួងវប្បធម៌ គឺយើងបានចេញលិខិតជូនដល់ផលិតករ ដើម្បីជួយសម្រួលដល់ការថត ការផលិតវីដេអូឯកសារ ឬភាពយន្តផ្សេងៗ និងសម្រាប់បង្ហាញទៅសមត្ថកិច្ច ឬអាជ្ញាធរដែនដីនៅពេលត្រូវការ»៕
វីដេអូ៖