បន្ទាយមានជ័យៈ ភ្លៀងលាយឡំខ្យល់កន្ត្រាក់ និងផ្គររន្ទះកាលពីល្ងាចថ្ងៃទី ៧ ខែមីនា ឆ្នាំ ២០២២ បានបង្កឱ្យបុរសម្នាក់រងរបួស និងខូចខាតផ្ទះ និងសាលារៀនជាង ២០ ខ្នងនៅក្នុងស្រុកចំនួន ៣ រួមមានអូរជ្រៅ ភ្នំស្រុក និងស្រុកថ្មពួកក្នុងខេត្តបន្ទាយមានជ័យ។ នេះបើតាមការប្រាប់ឱ្យដឹងពីមន្ត្រីនគរបាលមូលដ្ឋាន។
លោក យឹម សំណាង អភិបាលស្រុកអូរជ្រៅបានប្រាប់ភ្នំពេញប៉ុស្តិ៍ថា ភ្លៀងលាយឡំខ្យល់កន្ត្រាក់ កាលពីល្ងាចថ្ងៃទី ៧ ខែមីនា បានធ្វើឱ្យផ្ទះពលរដ្ឋ ២១ ខ្នងនិងអគារសាលារៀនចំនួន ១ រងការខូចខាត។ ប៉ុន្តែមិនបង្កគ្រោះថ្នាក់ដល់ប្រជាពលរដ្ឋណាម្នាក់ឡើយ។
លោកថ្លែងថា៖ «នៅព្រឹកថ្ងៃទី ៨ ខែមីនា ឆ្នាំ ២០២២ នេះ អាជ្ញាធរយើងបានចុះជួយអន្តរាគមន៍រុះរើ និងសាងសង់ផ្ទះពលរដ្ឋឡើងវិញ នៅក្នុងភូមិកណ្ដាលខាងក្រោយសាលាឃុំសំរោង ក្នុងស្រុកអូរជ្រៅ និងបណ្ដាឃុំមួយចំនួនទៀត ដែលរងការខូចខាតដោយបាតុភូតធម្មជាតិនេះ»។
ចំណែកលោក សុខ ឫទ្ធី អភិបាលរងស្រុកភ្នំស្រុកបានឱ្យដឹងថា កាលពីល្ងាចថ្ងៃទី ៧ ខែមីនា មានបាតុភូតរន្ទះបាញ់មួយកើតឡើង បណ្ដាលឱ្យបុរសម្នាក់ឈ្មោះ ស្ងៀម សួប អាយុ ៦២ ឆ្នាំ រស់នៅក្នុងភូមិត្រពាំងប្រិយ៍ ឃុំភ្នំដី ស្រុកភ្នំស្រុក ខេត្តបន្ទាយមានជ័យរងរបួសធ្ងន់។
លោកថ្លែងថា៖ «តាមការអះអាងរបស់សាច់ញាតិជនរងគ្រោះត្រូវរន្ទះបាញ់នៅចំណុចខ្លាគ្រហឹម ស្ថិតក្នុងភូមិស្ពានក្មេង ឃុំភ្នំដី ស្រុកភ្នំស្រុក ខណៈគាត់កំពុងដេញគោត្រឡប់មកផ្ទះវិញ។ បច្ចុប្បន្នជនរងគ្រោះកំពុងសម្រាកព្យាបាលនៅមន្ទីរពេទ្យបង្អែកស្រុកភ្នំស្រុក»។
ចំណែកនៅភូមិក្បាលក្របី ឃុំបន្ទាយឆ្មារ ស្រុកថ្មពួក វិញ ក៏មានករណីភ្លៀងលាយឡំជាមួយខ្យល់កន្ត្រាក់បង្កឱ្យមានកាលខូចខាតផ្ទះ ៦ ខ្នង។ នេះបើយោងតាមលោក ហេង សុភក្តិ មេឃុំបន្ទាយឆ្មារ ។
ទោះជាយ៉ាងណា លោកបានបញ្ជាក់ថា នៅពេលនេះ ផ្ទះដែលរងការខូចខាតទាំងនោះត្រូវបានក្រុមកម្លាំងកងទ័ព និងនគរបាល រួមទាំងអាជ្ញាធរមូលដ្ឋានជួយជួសជុលឡើងវិញអស់ហើយ។
ចាប់ពីថ្ងៃទី ៩ ដល់ ១៥ ខែមីនា ខាងមុខនេះ នៅប្រទេសប្រទេសកម្ពុជានឹងមានភ្លៀងធ្លាក់ក្នុងកម្រិតពីខ្យោយទៅបង្គួរដោយសារនៅក្នុងអំឡុងពេលនេះ កម្ពុជាកំពុងទទួលឥទ្ធិពលពីទ្រនុងសម្ពាធខ្ពស់ (ចិន) ក្នុងកម្រិតខ្សោយ និងឥទ្ធិពលពីសម្ពាធទាបដែលកើតឡើងលើប្រទេសថៃ។ នេះបើយោងតាមការព្យាកររបស់ក្រសួងធនធានទឹក និងឧតុនិយមដែលទើបបានចេញផ្សាយនៅថ្ងៃទី ៨ ខែមីនា ។
យ៉ាងណាក៏ដោយ ក្រសួងបានស្នើឱ្យមានការប្រុងប្រយ័ត្ន ចំពោះបាតុភូតខ្យល់កន្ត្រាក់ និងផ្គររន្ទះ ដែលកើតមានក្នុងអំឡុងពេលមុន និងអំឡុងពេលមេឃកំពុងភ្លៀង៕