.jpg)
នគរបាលខេត្តព្រះសីហនុកំពុងសាកសួរអ្នកបើកបររថយន្តធុនធំពីថ្ងៃទី ១៧ ខែកុម្ភៈឆ្នាំ ២០២២។ រូបថត FN
ព្រះសីហនុៈ លោក គួច ចំរើន អភិបាលខេត្តព្រះសីហនុដាក់បទបញ្ជាឱ្យកងកម្លាំងនគរបាលជំនាញធ្វើការត្រួតពិនិត្យជាប្រចាំស្វែងរកសារធាតុញៀន និងសារធាតុស្រវឹងលើក្រុមអ្នកបើកបរយានយន្ត ពិសេសអ្នកបើកបររថយន្តធុនធ្ងន់ ដើម្បីកាត់បន្ថយហានិភ័យគ្រោះថ្នាក់ចរាចរណ៍។ នេះបើតាមលោក ជួន ណារិន្ទ ស្នងការនគរបាលខេត្តព្រះសីហនុ។
លោក ជួន ណារិន្ទ ថ្លែងប្រាប់ភ្នំពេញប៉ុស្ដិ៍កាលពីថ្ងៃទី ៧ មីនាថា កាលពីថ្ងៃទី ៣ ខែមីនា លោក គួច ចំរើន ក្នុងពេលអញ្ជើញសួរសុខទុក្ខកម្លាំងនគរបាលចរាចរណ៍ផ្លូវគោក និងជំរុញការអនុវត្តច្បាប់ចរាចរណ៍ផ្លូវគោក ជាពិសេសការត្រួតពិនិត្យរកសារធាតុញៀនលើអ្នកបើកបររថយន្តធុនធំជាប្រចាំបានដាក់បទបញ្ជាបន្ថែមឱ្យធ្វើការត្រួតពិនិត្យជាប្រចាំរកសារធាតុញៀន និងសារធាតុស្រវឹងលើក្រុមអ្នកបើកបរយានយន្តពិសេសអ្នកបើកបររថយន្តធុនធ្ងន់ដើម្បីកាត់បន្ថយហានិភ័យគ្រោះថ្នាក់ចរាចរណ៍។
លោកឱ្យដឹងថា កងកម្លាំងនគរបាលជំនាញបានចុះចល័តត្រួតពិនិត្យអ្នកបើកបរយានទាំងពេលយប់ និងពេលថ្ងៃជាប់ជាប្រចាំបន្ថែមទៀតចាប់តាំងពីថ្ងៃទី ២៤ ខែកុម្ភៈ រហូតដល់ពេលបច្ចុប្បន្ននេះ។ កម្លាំងជំនាញបានចុះទៅទីតាំងសំខាន់ៗចំនួន ៣ គឺដើម្បីរឹតបន្តឹងលើការហាមឃាត់មិនឱ្យអ្នកបើកបរប្រើប្រាស់គ្រឿងញៀន ឬគ្រឿងស្រវឹងក្នុងពេលបើកបរ។
លោកថ្លែងថា៖ «ការងារនេះ គឺមានការចង្អុលបង្ហាញពីឯកឧត្ដមអភិបាលខេត្ដ។ យើង ត្រួតពិនិត្យគ្រប់រថយន្តទាំងអស់ដែលយើងចាប់អារម្មណ៍ដែលរថយន្តនោះងាយនឹងបង្កឱ្យមានហានិភ័យគ្រោះថ្នាក់ចរាចរណ៍កើតឡើងជាពិសេសប្រភេទរថយន្តធុនធំតែម្ដង»។
លោកបន្តថា៖ «យើងត្រួតពិនិត្យតាំងពីលក្ខណៈបច្ចេកទេស លក្ខណៈបើកបរតាមច្បាប់ចរាចរណ៍ផ្លូវគោក ត្រង់ចំណុចថា តើរថយន្តធុនធំទាំងនោះបានបើកបររបៀបម៉េចត្រឹមត្រូវតាមច្បាប់ឬទេ? យើងក៏ឆ្មក់ត្រួតពិនិត្យសារធាតុញៀននិងសារធាតុស្រវឹង ចំពោះអ្នកបើកបររថយន្ត ពិសេសរថយន្តធុនធំនេះដែរ»។
លោក ណារិន្ទ បានលើកឡើងថា អ្នកបើកបរយានយន្តពិសេសរថយន្តធុនធំដែលមានផ្ទុកសារធាតុញៀន ពួកគេគឺជាជនរងគ្រោះ។ ប៉ុន្ដែបើសមត្ថកិច្ចពិនិត្យឃើញថា អ្នកបើកបរមានផ្ទុកសារធាតុញៀនកម្រិតស្រាល គឺនឹងធ្វើការអប់រំណែនាំឱ្យបញ្ឈប់ការប្រើប្រាស់គ្រឿងញៀន និងណែនាំទៅកាន់គ្រួសារពួកគេឱ្យជួយអប់រំ ណែនាំបន្ថែមបន្សាបគ្រឿងញៀនឡើងវិញ។
លោកបញ្ជាក់ថា៖ «យើងមានវិធានការតឹងរ៉ឹងតែចំពោះអ្នកបើកបរដែលមានផ្ទុកសារធាតុញៀនកម្រិតធ្ងន់ធ្ងរ។ បើសិនជាយើងរកឃើញអ្នកបើកបរមានផ្ទុកសារធាតុញៀន និងគ្រឿងស្រវឹងទាំង ២ មុខនេះ ទោះបីមិនទាន់បានបង្កហានិភ័យរបួសស្នាមទៅដល់អ្នកដទៃ ក៏យើងនឹងរឹតបន្ដឹងទៅតាមវិធានការច្បាប់ដែរ»។ លោកឱ្យដឹងថាចាប់តាំងពីថ្ងៃទី ២៤ ខែកុម្ភៈ រហូតដល់ខែមីនានេះ សមត្ថកិច្ចពិនិត្យឃើញថា អ្នកបើកបរមានការប្រុងប្រយ័ត្នក្នុងនោះរកឃើញមានហានិភ័យទាបប៉ុណ្ណោះ។
លោកបន្តថា៖ «បើមានហានិភ័យទាបបែបនេះក៏ល្អដែរព្រោះយើងមិនចង់ធ្វើការផាកពិន័យ ឬអនុវត្ដវិធានការច្បាប់ទេ។ យើងចង់ឱ្យប្រជាពលរដ្ឋគោរពវិធានការច្បាប់ចរាចរណ៍ផ្លូវគោកឱ្យបានគ្រប់ៗគ្នា។ ការគោរពច្បាប់ គឺពលរដ្ឋគោរពអាយុជីវិតខ្លួនឯង និងក្រុមគ្រួសារខ្លួនឯងហើយបានគោរពដល់អ្នកដទៃ។ បើពលរដ្ឋអាចគោរពច្បាប់ចរាចរណ៍បានគឺបានចូលរួមចំណែកមួយក្នុងការកាត់បន្ថយភាពក្រីក្រនៅក្នុងសង្គមជាតិយើង»។
លោក អ៊ី សុខា ស្នងការរងនគរបាលខេត្តព្រះសីហនុទទួលបន្ទុកចរាចរណ៍ផ្លូវគោកបានឱ្យដឹងថា មានបុរសអ្នកបើកបររថយន្តធុនធំចំនួន ២ នាក់ត្រូវបាននគរបាលរកឃើញថា មានប្រើប្រាស់សារធាតុញៀនកម្រិតស្រាលត្រូវបានឃាត់ខ្លួនបណ្តោះអាសន្ន ដើម្បីអប់រំ ប៉ុន្ដែដោយសារកត្ដាលំបាកក្នុងគ្រួសារអ្នកបើកបរទាំង ២ នាក់នេះ លោក គួច ចំរើន បានអនុញ្ញាតឱ្យគ្រួសារមកធានាពួកគេទៅអប់រំកែប្រែបន្ថែមនៅផ្ទះវិញ។
លោកបានឱ្យដឹងថា តាមរយៈការត្រួតពិនិត្យមានអ្នកបើកបររថយន្តដឹកទំនិញធុនធំមួយចំនួន សមត្ថកិច្ចរកឃើញថា ប្រើប្រាស់គ្រឿងញៀនកម្រិតស្រាល ត្រូវបាននគរបាលឃាត់ខ្លួន នាំយកមកអប់រំរួចឱ្យក្រុមគ្រួសារធានាយកត្រឡប់ទៅផ្ទះវិញ។ ប៉ុន្ដែបើពួកគេនៅបន្តប្រើប្រាស់សារធាតុញៀនទៀត ឬឈានដល់ការប្រើប្រាស់សារធាតុញៀនកម្រិតធ្ងន់ នគរបាលផ្នែកប្រឆាំងគ្រឿងញៀននឹងចាត់ការបន្តតាមនីតិវិធីច្បាប់។
លោក គួច ចំរើន កាលពីថ្ងៃទី ៣ ខែមីនា ក្នុងពេលអញ្ជើញសួរសុខទុក្ខកម្លាំងនគរបាលចរាចរណ៍ផ្លូវគោក និងជំរុញការអនុវត្តច្បាប់ចរាចរណ៍ផ្លូវគោកជាពិសេសការត្រួតពិនិត្យរកសារធាតុញៀនលើអ្នកបើកបររថយន្តធុនធំជាប្រចាំនោះ លោកបានថ្លែងថា ការប្រើប្រាស់គ្រឿងញៀនជាអំពើខុសច្បាប់ ជាពិសេសការសេពគ្រឿងញៀន ហើយបើកបររថយន្ត គឺអាចបង្កវិនាសកម្ម និងគ្រោះថ្នាក់ចរាចរណ៍ព្រមទាំងអាចឈានទៅដល់ការបាត់បង់អាយុជីវិតខ្លួនឯង និងអ្នកដទៃទៀតផង។ លោកថ្លែងថា៖ «ការសេពគ្រឿងញៀនគឺនាំមកនូវក្តីវិនាស និងបំផ្លាញទ្រព្យសម្បត្តិរបស់យើង ក្រុមគ្រួសារ និងសង្គមជាតិយើង»៕
