.jpg)
មនុស្ស ៥ នាក់ ត្រូវចាប់ខ្លួនបញ្ជូនទៅតុលាការ ករណីអំពើហិង្សាតាមដងផ្លូវ។ រូបថត ប៉ូលិស
ភ្នំពេញៈ ជនសង្ស័យចំនួន ៥ នាក់ក្នុងនោះមានមន្ត្រីនគរបាលម្នាក់ផងត្រូវបាននគរបាលព្រហ្មទណ្ឌខណ្ឌចំការមនកសាងសំណុំរឿងបញ្ជូនទៅតុលាការនៅថ្ងៃទី ១០ មីនា បន្ទាប់ពីឃាត់ខ្លួនបាន ២ ថ្ងៃករណីវាយបំផ្លាញម៉ូតូ ១ គ្រឿង និងដកកាំភ្លើងភ្ជង់បុរសម្នាក់ប្រព្រឹត្តក្នុងភូមិសាស្ត្រសង្កាត់ទន្លេបាសាក់ ខណ្ឌចំការមន កាលពីទី ៨ ខែមីនា។
លោក ឈួនមៀច ស៊ីម៉ូលីន អធិការរងទទួលផែនការងារនគរបាលព្រហ្មទណ្ឌខណ្ឌចំការមនឱ្យដឹងនៅថ្ងៃទី ៩ មីនា ថា ជនសង្ស័យឈ្មោះ ស៊ឹម សុខហេង អាយុ ២៨ ឆ្នាំ ជាមន្ត្រីនគរបាលនៃនាយកដ្ឋានស៊ើបការណ៍ខាងក្រៅ និងបច្ចេកទេស រួមបក្ខពួក ៤ នាក់ទៀតត្រូវបានសមត្ថកិច្ចជំនាញរបស់លោកកសាងសំណុំរឿងបញ្ជូនទៅសាលាដំបូងរាជធានីភ្នំពេញនៅថ្ងៃទី ១០ មីនា នេះ។
លោកប្រាប់ថា៖ «ករណីក្រុមជនសង្ស័យទាំង ៥ នាក់នេះយើងបញ្ជូនទៅតុលាការនៅ (ថ្ងៃទី ៩ មីនា) មិនទាន់ទេ។ ប៉ុន្តែនៅ (ថ្ងៃទី ១០ មីនា) ទើបបានសមត្ថកិច្ចរបស់ខ្ញុំបញ្ជូនពួកគេទៅតុលាការ»។
ពាក់ព័ន្ធការឃាត់ខ្លួននេះដែរត្រូវបានលោក សាល បណ្តុះ នាយនគរបាលប៉ុស្តិ៍ទន្លេបាសាក់ ខណ្ឌចំការមន នៅថ្ងៃទី ៩ មីនា គ្រាន់តែប្រាប់ខ្លីថាករណីនេះសមត្ថកិច្ចរបស់លោកបានឃាត់ខ្លួនពួកគេកាលពីយប់ថ្ងៃទី ៨ មីនា ប៉ុន្តែលោកបានបញ្ជូនពួកគេផុតពីដៃលោកហើយ។
តាមកំណត់ហេតុរបស់នគរបាលប៉ុស្តិ៍ទន្លេបាសាក់ បង្ហាញថា កាលពីវេលាម៉ោងជាង ២ ជិតភ្លឺថ្ងៃទី ៨ មីនា មានករណីក្រុមក្មេងដេញវាយគ្នានៅតាមបណ្តោយផ្លូវព្រះនរោត្តមក្នុងសង្កាត់ទន្លេបាសាក់ ខណ្ឌចំការមន។ កំណត់ហេតុបង្ហាញបន្តថា ភ្លាមៗនោះបុរសជាសន្តិសុខម្នាក់ដែលឃើញហេតុការណ៍ក៏បានរាយការណ៍ប្រាប់នគរបាលប៉ុស្តិ៍ទន្លេបាសាក់ហើយភ្លាមៗនោះនគរបាលប៉ុស្តិ៍បានចុះធ្វើអន្តរាគមន៍ និងឃាត់ខ្លួនក្រុមជនសង្ស័យបានជាបន្តបន្ទាប់៕
