.jpg)
ម្ចាស់ក្សត្រីថៃប្រគល់សញ្ញាបត្រដល់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។ រូបថត AKP
ភ្នំពេញៈ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានកម្ពុជាទទួលបានសញ្ញាបត្របណ្ឌិតកិត្តិយសគរុកោសល្យសារព័ត៌មាន មនុស្សសាស្ត្រ និងសង្គមសាស្ត្រពីព្រះរាជាណាចក្រថៃឡង់ដ៍ ក្នុងស្នាដៃដែលលោកបានចូលរួមយ៉ាងសកម្មក្នុងវិស័យព័ត៌មាន និងផ្សព្វផ្សាយ ដើម្បីផ្ដល់ប្រយោជន៍ដល់ប្រទេសជាតិ និងសង្គមជាតិ។
សញ្ញាបត្របណ្ឌិតកិត្តិយសនេះត្រូវបានប្រគល់ដោយផ្ទាល់ពីព្រះអង្គម្ចាស់ក្សត្រីមហាចក្រី សិរិនថន នៃព្រះរាជាណាចក្រថៃឡង់ដ៍កាលពីថ្ងៃទី ៨ ខែមីនា ឆ្នាំ ២០២២ នៅសាកលវិទ្យាល័យ រ៉ាច្ចមុងឃុន តិចណូឡូជី ថាក់យ៉ាក់បុរី [Rajamangala University of Technology Thanyaburi (RMUTT)] ក្នុងខេត្តផាធុមថានីប្រទេសថៃ។
យោងតាមគេហទំព័ររបស់ក្រសួងព័ត៌មានបានឱ្យដឹងថាសញ្ញាបត្របណ្ឌិតកិត្តិយសនេះគឺជាសញ្ញាបត្របណ្ឌិតមួយដែលមានការទទួលស្គាល់ពីសាកលវិទ្យាល័យរ៉ាច្ចមុងឃុន តិចណូឡូជី ថាក់យ៉ាក់បុរីដោយបានទទួលស្គាល់ថា លោក ខៀវ កាញារីទ្ធ បានចូលរួមពាំនាំយកសន្តិភាព ការផ្សះផ្សាជាតិ និងស្ថិរភាពនយោបាយ តាមរយៈការប្រើប្រាស់សិល្បៈនៃការផ្សព្វផ្សាយព័ត៌មាន និងទំនាក់ទំនងនយោបាយ ព្រមទាំងសមិទ្ធផលជាច្រើនទៀតនៅប្រទេសកម្ពុជា។
ការឈានដល់ការផ្តល់សញ្ញាបត្រកិត្តិយសពីភាគីថៃនេះ បន្ទាប់ពីមានការវាយតម្លៃនូវគុណសម្បត្តិសំខាន់ៗចំនួន ៥ ចំណុចរបស់លោកដែលរួមមានលក្ខណសម្បត្តិ ទី ១ គឺលោក មើលទៅលើសម្ព័ន្ធភាពក្នុងការចុះធ្វើការតស៊ូមតិ ដោះស្រាយបញ្ហារវាងកម្ពុជា-ថៃ នៅលើខ្សែបន្ទាត់ព្រំដែននៅក្នុងជំនួបពិភាក្សាទាំងក្នុង និងក្រៅប្រទេស។ លក្ខណសម្បត្តិ ទី ២ ការព្យាយាមធ្វើទំនាក់ទំនងនូវរាល់វិបត្តិដែលកើតមានឡើងផ្នែកនយោបាយនៅក្នុងស្រុក ក៏ដូចជាមួយភាគីថៃ ដោយបានជួយកាត់បន្ថយ និងនាំឱ្យមានការឯកភាពគ្នា។
លក្ខណសម្បត្តិ ទី ៣ លោក ខៀវ កាញារីទ្ធ មានវីរភាពក្នុងកិច្ចការពង្រឹងខាងផ្នែកព័ត៌មាន និងផ្សព្វផ្សាយឱ្យមានលក្ខណៈល្អប្រសើរ ហើយលក្ខណសម្បត្តិ ទី ៤ លោក ជាមនុស្សដែលត្រូវបានប្រមុខរាជរដ្ឋាភិបាលកម្ពុជាមានទំនុកចិត្ត និងមើលឃើញពីកិច្ចខិតខំប្រឹងប្រែង បំពេញកិច្ចការងារនៅក្នុងក្រសួងព័ត៌មានបានដោយរលូន និងមានលទ្ធផលល្អ។
លក្ខណសម្បត្តិទី ៥ លោកជាមនុស្សដែលមានចិត្តមេត្តាធម៌តែងតែជួយចូលរួមដោះស្រាយរាល់ទុក្ខលំបាកដល់ប្រជាពលរដ្ឋ ជាពិសេសជនពិការ ជនក្រីក្រ និងប្រជាជនដែលជួបគ្រោះមហន្តរាយ រួមទាំងការជួយបរិច្ចាគ ជួយមន្ទីរពេទ្យរដ្ឋដែលនៅទីដាច់ស្រយាល និងដើម្បីជួយទ្រទ្រង់ព្រះពុទ្ធសាសនា។ នេះបើតាមការអះអាងរបស់លោក សាត ដារ៉ា អតីតនិស្សិតខ្មែររៀននៅសាកលវិទ្យាល័យ រ៉ាច្ចមុងឃុន តិចណូឡូជី ប្រាក់ណាខន។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានថ្លែងក្នុងឱកាសទទួលសញ្ញាបត្រនៅប្រទេសថៃកាលពីថ្ងៃទី ៨ មីនាថាការផ្តល់ឱ្យដោយសាកលវិទ្យាល័យ រ៉ាច្ចមុងឃុន តិចណូឡូជី ប្រាក់ណាខន នេះគឺជាការផ្តល់កិត្តិយសមួយ។
លោករដ្ឋមន្ត្រីថ្លែងថា៖ «ការផ្តល់ឱ្យនេះក៏បង្ហាញពីកិច្ចខិតខំប្រឹងប្រែងក្នុងការស្វែងយល់ពីប្រទេសកម្ពុជា និងការស្វែងយល់ពីយើងទាំងអស់គ្នាក្នុងការប្រឹងប្រែងកសាងនូវចំណេះជូនប្រជាពលរដ្ឋ ក៏ដូចជាការកសាង ចំណងមិត្តភាពរវាងប្រទេសទាំង ២ ផងដែរ។
លោកបានបញ្ជាក់ថា៖ «សញ្ញាបត្របណ្ឌិតកិត្តិយស ដែល (ខ្ញុំ) ទទួលបាននាពេលនេះក៏ជាការចូលរួមប្រឹងប្រែងពីសហការីទាំងអស់ដែលកន្លងមកនេះ បានរួមសហការគ្នាក្នុងការចូលរួមកសាងជាតិ និងមាតុភូមិកម្ពុជា»។
លោក មឿន ឈានណារិទ្ធសាស្ត្រាចារ្យផ្នែកព័ត៌មាននៃសាកលវិទ្យាល័យកម្ពុជាបានសាទរ និងបាននិយាយថា លោក ខៀវ កាញារីទ្ធ គឺជាបុគ្គលម្នាក់ដែលស័ក្ដិសមនឹងទទួលបានសញ្ញាបត្របណ្ឌិតកិត្តិយសគរុកោសល្យសារព័ត៌មាននេះព្រោះថាលោកមានបទពិសោធ និងចំណេះដឹងច្រើនក្នុងវិស័យនេះ។
លោក ឈានណារិទ្ធ បានថ្លែងថា ក្នុងពេលកន្លងមកនេះលោក ខៀវ កាញារីទ្ធ មិនត្រឹមតែបំពេញតួនាទីជារដ្ឋមន្ត្រីក្រសួងព័ត៌មានដែលចូលរួមសម្របសម្រួល និងធានាដល់សេរីភាពសារព័ត៌មាននៅក្នុងប្រទេសកម្ពុជាប៉ុណ្ណោះទេលោកក៏បានចូលរួមយ៉ាងសកម្មជាមួយអ្នកសារព័ត៌មាន ដើម្បីធ្វើយ៉ាងណាឱ្យលំហូរនៃការផ្តល់ព័ត៌មានរបស់មន្ត្រីរដ្ឋាភិបាលកាន់តែលឿន និងរហ័ស។
លោកបានបញ្ជាក់ថា៖ «យើងពិតជាទទួលស្គាល់ថា ឯកឧត្តម ខៀវ កាញារីទ្ធ គឺពិតជាបានចូលរួមលើកតម្កើងសេរីភាពសារព័ត៌មានហើយបានបញ្ជ្រាបនូវការយល់ដឹងអំពីលទ្ធិប្រជាធិបតេយ្យទៅតាមស្ថាប័នក្រសួងមន្ទីរនានាដែលនាំឱ្យមន្ត្រីដទៃទៀតក្នុងពេលបច្ចុប្បន្នមានអ្នកនាំពាក្យសម្រាប់ឆ្លើយតបគ្រប់មន្ទីរស្ថាប័ន។ ការងាររបស់ឯកឧត្តមរដ្ឋមន្ត្រីជាង ៤២ ឆ្នាំមកនេះគឺស័ក្តិសមទៅនឹងសញ្ញាបត្របណ្ឌិតកិត្តិយសដែលលោកបានទទួល»។
លោក ឈានណារិទ្ធ បានថ្លែងដោយចាត់ទុកថា ការផ្តល់ឱ្យនូវសញ្ញាបត្របណ្ឌិតកិត្តិយសមកកាន់មន្ត្រីរដ្ឋាភិបាលខ្មែរពីសំណាក់ព្រះមហាក្សត្រនៃប្រទេសថៃនេះក៏ជាកិត្តិយសមួយដែលប្រទេសថៃបានផ្តល់ឱ្យប្រទេសកម្ពុជាផងដែរ។
លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) បានថ្លែងស្រដៀងគ្នាថា ការទទួលសញ្ញាបត្របណ្ឌិតកិត្តិយស របស់លោករដ្ឋមន្ត្រី ខៀវ កាញារីទ្ធ គឺស័ក្តិសមនឹងប្រវត្តិការងារបស់លោកដែលធ្លាប់បានប្រឡូកក្នុងវិស័យព័ត៌មានដោយផ្តើមចេញពីអ្នកសារព័ត៌មានដោយខ្លួនឯងផ្ទាល់រហូតក្លាយជារដ្ឋមន្ត្រីក្រសួងព័ត៌មានកម្ពុជា។
លោកថា រដ្ឋមន្ត្រីរូបនេះក៏បានបន្តបង្កើនទំនាក់ទំនងល្អជាមួយអ្នកសារព័ត៌មានទូទាំងប្រទេស និងបានការពារធានាដល់សេរីភាពសារព័ត៌មានផងដែរ។ លោក ថ្លែងថា៖ «សម្រាប់ខ្ញុំចូលរួមអបអរសាទរចំពោះការទទួលបានសញ្ញាបត្របណ្ឌិតកិត្តិយសនេះព្រោះថា ការផ្តល់សញ្ញាបត្រទាំងនេះលុះត្រាតែមានការវាយតម្លៃលើអ្នកដែលត្រូវទទួលបាននេះគឺគាត់ស័ក្ដិសមនឹងទទួលបាន។ មួយទៀតការផ្តល់សញ្ញាបត្រនេះក៏ជាផ្នែកមួយនៅក្នុងការលើកទឹកចិត្តដល់អ្នកសារព័ត៌មានដែលជាក្មេងៗជំនាន់ក្រោយដែលបង្ហាញថា ការប្រឹងប្រែងរបស់គាត់ក្នុងនាមជាអ្នកសារព័ត៌មានគឺមិនអត់ប្រយោជន៍ទេ»៕
វីដេអូ៖
