បាត់ដំបងៈ ក្នុងគោលបំណង ដើម្បីពង្រឹងវិន័យ និងគុណភាពនៃការសិក្សារបស់សិស្ស នាយកសាលា និងលោកគ្រូអ្នកគ្រូ នៃវិទ្យាល័យ «សម្ដេចតេជោ ហ៊ុនសែន សំពៅលូន» ដោយមានការព្រមព្រៀងពីឪពុកម្តាយ និងអាណាព្យាបាលសិស្សប្រមាណ ៥០០ នាក់ បានដាក់ចេញនូវបទបញ្ជាផ្ទៃក្នុងមួយចំនួន ដើម្បីឱ្យសិស្សអនុវត្តក្នុងនោះមានទាំងការហាមមិនឱ្យសិស្សប្រើទូរស័ព្ទលេងហ្គេម នៅក្នុងម៉ោងសិក្សាផងដែរ។
នៅដើមឆ្នាំ ២០២២ នេះសាលាបានដកហូតទូរស័ព្ទពីសិស្សដែលលេងហ្គេមក្នុងម៉ោងសិក្សាបានចំនួន ១០ គ្រឿងហើយ ក្នុងនោះបានធ្វើឱ្យឪពុកសិស្សម្នាក់មានការខឹងសម្បា ដោយសារតែការដកហូតទូរស័ព្ទពីសិស្សយកទៅរក្សាទុកនោះគឺមានរយៈពេលយូរពេកគឺរហូតដល់ពី ៦ ខែទៅ ១ ឆ្នាំ ដែលធ្វើឱ្យប៉ះពាល់ដល់ការរៀនសូត្ររបស់សិស្សតាមប្រព័ន្ធអនឡាញ។
លោក ប៊ូ ហឿន អាយុ ៥០ ឆ្នាំ ជាអាណាព្យាបាលរបស់សិស្សម្នាក់នៃវិទ្យាល័យ «សម្ដេចតេជោ ហ៊ុន សែន សំពៅលូន» បានប្រាប់ ភ្នំពេញ ប៉ុស្តិ៍ថា កាលពីព្រឹកថ្ងៃទី ៣ ខែកុម្ភៈ គ្រូបង្រៀនម្នាក់បានចាប់ដកហូតទូរស័ព្ទដៃពីកូនប្រុសគាត់ យកទៅឱ្យលោកនាយកសាលារក្សាទុកក្នុងរយៈពេល ១ ឆ្នាំ ដោយអះអាងថា កូនប្រុសគាត់បានលេងហ្គេមក្នុងម៉ោងសិក្សា។ ប៉ុន្តែកូនប្រុសគាត់បានអះអាងថា មិនបានលេងហ្គេមទេ គឺបានប្រើប្រាស់ ប្រព័ន្ធ Calculator ដើម្បីគណនាលេខនៃលំហាត់រូបវិទ្យាប៉ុណ្ណោះ។
លោកថ្លែងថា៖ «នៅរសៀលថ្ងៃដដែលនោះ ខ្ញុំបានទៅជួបលោកនាយកសាលា ដើម្បីសុំទោសនិងធ្វើកិច្ចសន្យាជំនួសកូនប្រុសរបស់ខ្ញុំ និងដើម្បីស្នើសុំយកទូរស័ព្ទត្រឡប់មកវិញ តែលោកនាយកសាលាបានបដិសេធ ដោយប្រាប់ឱ្យរង់ចាំដល់ដំណាច់ខែកុម្ភៈទើបគាត់ប្រគល់ឱ្យវិញ»។
ជុំវិញករណីនេះ លោក អៀង សុធា គ្រូបង្រៀនផ្នែករូបវិទ្យា និង ជាគ្រូទទួលបន្ទុកសិស្សថ្នាក់ទី ១០ (ឆ) នៃវិទ្យាល័យនេះបានប្រាប់ភ្នំពេញប៉ុស្តិ៍ថា នៅថ្ងៃនោះ គាត់ពិតជាបានដកហូតទូរស័ព្ទ IPhone7 ពីសិស្សប្រុសម្នាក់ឈ្មោះ ងូច ពន្លឺ អាយុ ១៦ ឆ្នាំ ជាបណ្ដោះអាសន្នតាមបទបញ្ជាផ្ទៃក្នុងរបស់សាលាប្រាកដមែន ដោយសារសិស្សនោះបានលេងហ្គេមក្នុងម៉ោងសិក្សា។
លោកបញ្ជាក់ថា៖ «ខ្ញុំបានឃើញសិស្សហ្នឹង កំពុង លេងហ្គេម ខណៈពេលខ្ញុំកំពុងពន្យល់មេរៀនរូបវិទ្យា។ នៅពេលនោះខ្ញុំខឹងខ្លាំងណាស់ ព្រោះខំពន្យល់ តែគេមិនស្ដាប់ និងរំខានដល់សិស្សផ្សេងទៀត»។
ទោះយ៉ាងណា លោក ហឿន និយាយថា លោកមិននៅក្នុងហេតុការណ៍នោះទេ ហើយលោកក៏មិនមែនចង់តវ៉ា រកខុសត្រូវអ្វីនោះដែរ អ្វីដែលលោកបានស្នើនោះ គឺការសុំយកទូរស័ព្ទដៃត្រឡប់មកវិញ ដើម្បីឱ្យកូនគាត់បានរៀនសូត្រប៉ុណ្ណោះ។
លោកបន្តថា នៅថ្ងៃទី ២៨ ខែកុម្ភៈលោកបានទៅស្នើសុំលោកនាយកសាលានោះម្ដងទៀត ប៉ុន្តែលោកនាយកសាលាប្រាប់ថា យោងតាមបទបញ្ជាផ្ទៃក្នុងរបស់សាលា គឺត្រូវរក្សាទុករយៈពេលពី ៦ ខែទៅ ១ ឆ្នាំ ទើបប្រគល់ជូនវិញ។ លោក ហឿន លើកឡើងថា៖ «គាត់ជានាយកសាលាតែមិនគោរពសម្ដី ម្ដងគាត់ថា ចាំដាច់ខែកុម្ភៈ ម្ដងគាត់ថាចាំដាច់ឆ្នាំ ២០២២ និងមិនទទួលខុសត្រូវចំពោះការខូចខាតដោយប្រការណាមួយឡើយ។ បើដូច្នេះ សាលាចាំបាច់តម្រូវឱ្យសិស្សបំពេញសំណៅវិញ្ញាសាប្រឡងតាមប្រព័ន្ធ Google Form ដល់សិស្សធ្វើអ្វី?»។
ដោយចង់បានទូរស័ព្ទមកឱ្យកូនរបស់លោកមករៀនសូត្រតាមប្រព័ន្ធបច្ចេកវិទ្យាទំនើបរបស់ក្រសួងអប់រំ និងតាមភាពចាំបាច់របស់លោកគ្រូអ្នកគ្រូវិញនោះ នៅថ្ងៃទី ៥ មីនា លោក ហឿន ក៏បានទៅស្នើសុំលោកនាយកសាលាជាថ្មីម្ដងទៀត។ ប៉ុន្តែលើកនេះ លោកត្រូវបានលោកនាយកសាលាព្រមានធ្ងន់ៗថា នឹងបណ្ដេញកូនរបស់លោកចេញពីសាលា ប្រសិនបើលោកនៅតែទទូចចង់បានទូរស័ព្ទទៅវិញមុនពេលកំណត់។
លោកបញ្ជាក់ថា៖ «ខ្ញុំយល់ថា លោកនាយកសាលានេះ ហាក់ដូចជាមានបំណងផ្សេងក្នុងរឿងចាប់ដកហូតទូរស័ព្ទដៃពីសិស្សនេះ ព្រោះគាត់ប្រើពាក្យព្រមានខ្ញុំថា បើនៅចង់បានទូរស័ព្ទទៅវិញមុនកាលកំណត់ គាត់ប្រគល់ឱ្យវិញបាន តែសិស្សដែលបានប្រព្រឹត្តកំហុសនេះនឹងត្រូវបណ្ដេញចេញពីសាលា»។
ពាក់ព័ន្ធករណីនេះ អ្នកស្រី ប្រាក់ ផល្លា អាយុ ៤៦ ឆ្នាំ អាណាព្យាបាលសិស្សម្នាក់ទៀត នៅក្នុងវិទ្យាល័យ «សម្ដេចតេជោ ហ៊ុន សែន សំពៅលូន» នេះដែរ បានប្រាប់ភ្នំពេញប៉ុស្តិ៍ថា លោកគ្រូ អ្នកគ្រូ និងនាយកសាលា មានចិត្តមិនខុសពីឪពុកម្ដាយ ឬ អាណាព្យាបាលសិស្សនោះទេ គឺចង់ឱ្យសិស្សានុសិស្សរបស់ខ្លួន មានចំណេះដឹងខ្ពង់ខ្ពស់ប្រកបដោយប្រសិទ្ធភាព និងគុណភាព។ ប៉ុន្តែការដាក់កំហិត ទណ្ឌកម្មធ្ងន់បែបនេះ មិនមែនជាដំណោះស្រាយសមស្របនោះទេ តែជាការបំផ្លាញផ្លូវចិត្តដល់សិស្សានុសិស្សរបស់ខ្លួនទៅវិញ។
អ្នកស្រីបានថ្លែងថា៖ «ខ្ញុំចង់ឱ្យលោកគ្រូ អ្នកគ្រូ និងនាយកសាលាព្រមទាំងមាតាបិតា អាណាព្យាបាលសិស្សមានការអធ្យាស្រ័យ និងយោគយល់គ្នាទៅវិញទៅមក។ បើសិស្សានុសិស្សមានកំហុសត្រូវដាក់ពិន័យ ប៉ុន្តែសូមកុំធ្ងន់ធ្ងរពេក ព្រោះវាអាចប៉ះពាល់ដល់ផ្លូវចិត្តរបស់សិស្សទៅថ្ងៃអនាគត»។
ទោះយ៉ាងណា លោក សុខា ប៊ុណ្ណា នាយកវិទ្យាល័យ «សម្ដេចតេជោ ហ៊ុន សែន សំពៅលូន» បានប្រាប់ភ្នំពេញប៉ុស្តិ៍ថា លោកមិនបានប្រើពាក្យគំរាមកំហែងបែបនោះទេ។ ប៉ុន្តែលោកបានប្រើពាក្យថា បើយកទូរស័ព្ទទៅឱ្យកូនរបស់លោកប្រើប្រាស់វិញ ហើយកូនយកមកលេងហ្គេមនៅក្នុងសាលាទៀតនោះគឺមិនបានទេ ព្រោះសាលាហាមឃាត់ បើចង់លេងហ្គេមនៅក្នុងសាលាពិសេសក្នុងម៉ោងសិក្សា មានតែប្ដូរទៅសាលាណាផ្សេងទៅ។
លោកបញ្ជាក់ថា៖ «យើងខ្ញុំធ្វើបែបនេះគឺដើម្បីពង្រឹងគុណភាពការសិក្សារបស់សិស្ស ព្រោះនៅក្នុងឆ្នាំនេះ សាលាយើងខ្ញុំបានដាក់ចេញផែនការដ៏ធំមួយគឺ ចង់ឱ្យសិស្សថ្នាក់ទី ៩ និង ទី ១២ ជាប់ ឌីប្លូម និង បាក់ឌុប ៩៥ ភាគរយឡើងទៅ។ ម្យ៉ាងទៀត យើងបានអនុវត្តវិធានការនេះរយៈពេល ៣ ឆ្នាំមកហើយ ព្រមទាំងមានការចូលរួមគាំទ្រពីអាណាព្យាបាលសិស្សប្រមាណជាង ៥០០ នាក់»។
បើតាមលោក ប៊ុណ្ណា កន្លងមកលោកបានដកហូតទូរស័ព្ទទុករយៈពេលពី ១ ខែ ទៅ ៣ ខែប៉ុណ្ណោះ ប៉ុន្តែវិធានការនេះមិនបានជោគជ័យនោះទេ គឺសិស្សនៅតែយកទូរស័ព្ទមកលួចលេងហ្គេមនៅក្នុងសាលា និងក្នុងម៉ោងសិក្សា។ ដោយសារបញ្ហានេះសាលាក៏បានឯកភាពជាមួយក្រុមមាតាបិតាសិស្សដាក់ចេញនូវវិធានការថ្មីនេះតែម្ដង គឺបើរកឃើញសិស្សរូបណាយកទូរស័ព្ទមកលេងហ្គេមក្នុងម៉ោងសិក្សាគឺត្រូវដកហូតទូរស័ព្ទទុកពី ៦ ខែទៅ ១ ឆ្នាំ ទើបប្រគល់ជូនវិញ។ សម្រាប់ឆ្នាំសិក្សា ២០២២ នេះ សាលាបានដកហូតទូរស័ព្ទដៃពីសិស្សចំនួន ១០ គ្រឿងរួចមកហើយក្នុងនោះក៏រួមមានទាំងរបស់សិស្សថ្នាក់ទី ១០ (ឆ) នោះផងដែរ។
លោកបានបន្ថែមថា៖ «មានតែឪពុកសិស្សម្នាក់ហ្នឹងទេដែលគាត់មកស្នើសុំម្ដងហើយម្ដងទៀតដោយមិនស្ដាប់ការពន្យល់ណែនាំរបស់យើងខ្ញុំ ដែលធ្វើដើម្បីអនាគតរបស់សិស្សទាំងអស់ ដែលពួកគេជាកូនៗរបស់ពួកគាត់ទាំងអស់គ្នានោះហើយ»។
ជុំវិញករណីនេះ លោក អោម សារិន អនុប្រធានការិយាល័យ អប់រំស្រុកសំពៅលូន បានប្រាប់ភ្នំពេញប៉ុស្តិ៍ថា គណៈអភិបាលស្រុកសំពៅលូនបានដឹកនាំក្រុមមន្ត្រីជំនាញ ចុះពិនិត្យ និងបើកកិច្ចប្រជុំបន្ទាន់មួយកាលពីថ្ងៃទី ៧ មីនា ២០០២ ដើម្បីសម្របសម្រួលដំណោះស្រាយ ប៉ុន្តែលោកនាយកសាលាបានប្រកាន់គោលជំហររបស់ខ្លួន ក្នុងការអនុវត្តបទបញ្ជាផ្ទៃក្នុងរបស់សាលា។
លោកថ្លែងថា៖ «ការពង្រឹងការអនុវត្តបទបញ្ជាផ្ទៃក្នុងនៃអង្គភាព ដើម្បីឧត្តមភាព គុណភាព ប្រសិទ្ធភាពនៃការងារ អប់រំដល់សិស្ស គឺពិតជាត្រឹមត្រូវហើយ ប៉ុន្តែយើងគួរពិនិត្យទៅតាមស្ថានភាពជាក់ស្ដែង»៕
វីដេអូ៖