.jpg)
កិច្ចប្រជុំនៅវិទ្យាល័យ ហ៊ុន សែន មិត្តភាពពីថ្ងៃទី ៧ មីនា។ រូប ក្រសួងបរិស្ថាន
ព្រះសីហនុ: ក្រសួងបរិស្ថានសហការជាមួយមន្ទីរអប់រំយុវជន និងកីឡាខេត្តព្រះសីហនុ ដាក់ឱ្យ អនុវត្តសកម្មភាពកែច្នៃជីកំប៉ុស នៅតាមសាលាគោលដៅចំនួន ៥ នៅក្នុងខេត្តនេះ ដើម្បីលើកកម្ពស់លើវិស័យបរិស្ថាន និងកែប្រែសាលារៀនទាំងនោះឱ្យក្លាយជាពណ៌បៃតងគ្រប់រដូវកាល។
គម្រោងនេះត្រូវបានប្រកាសអនុវត្តកាលពីថ្ងៃទី ៧ ខែមីនា ដោយមានការចូលរួមពីមន្ត្រីនៃក្រសួងបរិស្ថាន និងដៃគូពាក់ព័ន្ធនៅវិទ្យាល័យ ហ៊ុន សែន មិត្តភាព ក្រុងព្រះសីហនុ ក្នុងកិច្ចប្រជុំរួមគ្នាមួយ សម្រាប់ផ្សព្វផ្សាយ និងណែនាំដល់សាលារៀនគោលដៅទាំងនោះ ដើម្បីចូលរួមអនុវត្ត។
ក្រសួង បរិស្ថានបានឱ្យដឹងថា គោលបំណង និងអត្ថប្រយោជន៍នៃការធ្វើជីកំប៉ុសមិនត្រឹមតែចូលរួមកិច្ចការបរិស្ថានប៉ុណ្ណោះទេ គឺថែមទាំងចូលរួមផ្តាស់ប្តូរផ្នត់គំនិតក្នុងការគ្រប់គ្រងសំរាម សំណល់រឹង ដោយការញែក ឬការទុកដាក់ដើម្បីបញ្ជ្រាបការយល់ដឹងតាមរយៈសិស្ស។
ក្រសួងបានបញ្ជាក់ថា៖ «ដើម្បីឱ្យគម្រោងនេះអាចអនុវត្តបានជោគជ័យ សូមសំណូមពរឱ្យមន្ទីរអបរំ និងសាលា ដែលត្រូវជ្រើសសម្រាប់អនុវត្ត ត្រូវផ្តល់កិច្ចសហការល្អជាមួយ មន្ត្រីជំនាញអគ្គនាយកដ្ឋាន គាំពារបរិស្ថាន ដែលនឹងចុះមកជួយសម្របសម្រួលផ្តល់ បច្ចេកទេស»។
លោក សុខ គាង រដ្ឋលេខាធិការក្រសួងបរិស្ថានដែលបានដឹកនាំកិច្ចប្រជុំស្តីពីគម្រោងបង្កើត ឱ្យមានសកម្មភាពកែច្នៃជីកំប៉ុសនៅតាមសាលាគោលដៅមួយចំនួន នៅក្នុងខេត្តព្រះសីហនុសង្ឃឹមថា គម្រោងនេះនឹងអនុវត្តបានជោគជ័យហើយនឹងក្លាយទៅជាគំរូសម្រាប់យកទៅអនុវត្តនៅតាមសាលាផ្សេងៗទៀត។
បើតាមក្រសួងបរិស្ថានសាលាទាំង ៥ ដែលជាគោលដៅសម្រាប់អនុវត្តគម្រោងនេះគឺត្រូវមានលក្ខណសម្បត្តិមួយចំនួនដូចជាត្រូវមានទីតាំង និងទំហំសមស្របទៅនឹងបរិមាណសំណល់ ដែលបង្កើតប្រចាំថ្ងៃ។ ត្រូវរៀបចំដាក់ធុងសំរាមទៅតាមប្រភេទសំរាម និងតម្រូវឱ្យមានការញែកសំណល់ទៅតាមប្រភេទរួមទាំងត្រូវមានប្រភពសំណល់សរីរាង្គ និងបង្កើតឱ្យមានកម្មវិធីកាត់បន្ថយសំណល់ប្លាស្ទិកមួយចំនួនផងដែរ។
លោកស្រី អ៊ុច សោភា ប្រធានមន្ទីរអប់រំ យុវជន និងកីឡាខេត្តព្រះសីហនុបានប្រាប់ភ្នំពេញប៉ុស្តិ៍នៅថ្ងៃទី ៩ មីនាថា សាលាទាំង ៥ ដែលអនុវត្តគម្រោងនេះដំបូងនៅក្នុងខេត្តគឺមានអនុវិទ្យាល័យ ហ៊ុន សែន មិត្តភាព អនុវិទ្យាល័យក្រុងព្រះសីហនុ អនុវិទ្យាល័យព្រៃនប់ អនុវិទ្យាល័យស្ទឹងហាវ និងអនុវិទ្យាល័យវាលរេញជាដើម។
លោកស្រីបានបញ្ជាក់ថា មន្ទីរអប់រំរួមទាំងសាលាគោលដៅទាំង ៥ បានត្រៀមខ្លួនជាស្រេចក្នុងកិច្ចសហការជាមួយក្រសួងបរិស្ថាន ដើម្បីអនុវត្តគម្រោងនេះឱ្យបានជោគជ័យ ខណៈដែលលោកស្រីចាត់ទុកថា ការកែច្នៃជីកំប៉ុស នៅតាមសាលារៀន គឺផ្តល់អត្ថប្រយោជន៍ច្រើនដល់សិស្សានុសិស្ស និងបរិស្ថាន។
លោកស្រីបានបញ្ជាក់ថា៖«ការកែច្នៃជីកំប៉ុសនេះ គឺទី ១ អាចជួយផ្នែកបរិស្ថានបានច្រើន ព្រោះយើងប្រមូលសំណល់សរីរាង្គយកមកកែប្រែឱ្យមានប្រយោជន៍។ ការកែច្នៃនេះ មិនមែនជួយតែបរិស្ថានទេ គឺជួយសិស្សយើងទៀតឱ្យគាត់បានយល់បានដឹងនៅក្នុងបំណិនជីវិតរបស់គាត់»។
បើលោកស្រី អ៊ុច សោភា សម្រាប់ជីកំប៉ុសដែលបានកែច្នៃរួចហើយនៅតាមគោលដៅសាលារៀនទាំង ៥ នេះនឹងត្រូវយកមកប្រើប្រាស់បានជាប្រយោជន៍ក្នុងការដាំដុះរបស់សាលារួមប្រជាសហគមន៍ ដោយលោកស្រីរំពឹងទុកថា បើគម្រោងនេះទទួលបានជោគជ័យ មន្ទីរ ខេត្តនឹងពង្រីកបន្ថែមទៀត ជុំវិញសកម្មភាពកែច្នៃជីកំប៉ុសនៅតាមសាលានានាដទៃទៀត៕
