ភ្នំពេញៈ ក្រសួងវប្បធម៌និងវិចិត្រសិល្បៈបានអំពាវនាវឲ្យអាជីវកររកស៊ីតុបតែងសម្លៀកបំពាក់បែបបុរាណជូនភ្ញៀវចូលទស្សនាអង្គរពិនិត្យឡើងវិញលើការស្លៀកពាក់ឲ្យស្របតាមក្បួនខ្នាតនិងប្រពៃណីរបស់ខ្មែរចៀសវាងបង្កការយល់ច្រឡំ និងបង្ហាញសម្លៀកបំពាក់ដែលមិនមែនជារបៀបខ្មែរ។
ការអំពាវនាវបែបនេះបានធ្វើឡើងក្រោយមានមតិប្រតិកម្មនឹងការលើកឡើងពីសំណាក់អ្នកប្រើប្រាស់បណ្តាញទំនាក់ទំនងសង្គមអំពីការស្លៀកពាក់ឈុតប្រពៃណីរបស់អាជីវកររកស៊ីតុបតែងខ្លួនមួយចំនួនដែលបានស្លៀកពាក់ជូនភ្លៀវទេសចរមិនបានត្រឹមត្រូវស្របពេលដែលចំនួនភ្ញៀវដែលគាំទ្រការស្លៀកពាក់បែបនេះមានការកើនឡើង។
លោក ឡុង ប៉ុណ្ណាស៊ីរីវត្ថ អ្នកនាំពាក្យក្រសួងវប្បធម៌និងវិចិត្រសិល្បៈបានប្រាប់ ភ្នំពេញ ប៉ុស្តិ៍ នៅថ្ងៃទី ១០ មីនាថាបច្ចុប្បន្ននេះ អ្នកប្រកបមុខរបរតែងសម្លៀកបំពាក់ខ្មែរបុរាណនៅក្នុងខេត្តសៀមរាម គឺមានចំនួនច្រើន ស្របពេលចំនួនភ្ញៀវទេសចរមានការកើនឡើងដែលពេលខ្លះធ្វើឲ្យអាជីវកម្មទាំងនោះស្លៀកពាក់មិនបានត្រឹមត្រូវស្របតាមប្រពៃណីខ្មែរឬក្បួនខ្នាតខ្មែរជូនភ្ញៀវនោះទេ។
លោកបានបន្តថា កំហុសដែលអាជ្ញាធរបានមើលឃើញគឺដូចជាអាជីវករខ្លះបានប្រើប្រាស់នូវសម្លៀកបំពាក់មិនមែនជារបស់ខ្មែរជាដើម សម្រាប់តុបតែងជូនភ្ញៀវទេសចរដែលបង្កឲ្យមានការយល់ច្រឡំនិងរងការរិះគន់។
លោកបានបញ្ជាក់ថា៖ «ក្រសួងមិនបានហាមឬផ្អាកធ្វើអាជីវកម្មអីទេហើយអ្វីដែលមានកន្លងមកគឺមានជាប្រក្រតី។ ប៉ុន្តែយើងគ្រាន់តែស្នើឲ្យមានការកែតម្រូវមុននឹងយកសម្លៀកបំពាក់ទាំងនោះមកស្លៀកពាក់ជូនភ្ញៀវគឺត្រូវដឹងច្បាស់ថា សម្លៀកបំពាក់ទាំងនោះត្រូវក្បួនខ្នាតអត់? ព្រោះបើមិនត្រឹមត្រូវទេយើងមិនអនុញ្ញាតឲ្យពួកគាត់ថតបង្ហាញឲ្យភ្ញៀវទេសចរនោះទេ»។
ជាមួយនឹងការអំពាវនាវនេះលោក ឡុង ប៉ុណ្ណាស៊ីរីវត្ថ ក៏បានអះអាងថាក្រសួងនឹងចេញសេចក្តីណែនាំមួយដើម្បីឲ្យគ្រប់អាជីវកម្មតុបតែងបែបបុរាណសម្រាប់ភ្ញៀវទេសចរនៅតំបន់អង្គរគោរពឲ្យបានត្រឹមត្រូវខណៈមន្ត្រីរបស់ក្រសួងក៏កំពុងពិភាក្សាជាមួយមន្ត្រីជំនាញផ្នែកវប្បធម៌ដើម្បីសិក្សាពីបញ្ហាការស្លៀកពាក់នេះ។
លោកបានរៀបរាប់ថា៖ «យើងស្លៀកពាក់ប្រពៃណីឲ្យបានសមរម្យ តែអ្នកខ្លះគាត់យកពីប្រទេសជិតខាងមកប្រើដូច្នេះមហាជនគាត់មានការយល់ដឹងដែរ ដែលថាអាជ្ញាធរម៉េចមិនណែនាំ។អ៊ីចឹងយើងមានតែណែនាំហើយមិនថាតែខ្មែរទេ សូម្បីតែបរទេសក៏ដោយ បើគាត់ស្លៀកពាក់មិនសមរម្យចូលអង្គរក៏យើងមិនអនុញ្ញាតដែរ ព្រោះនេះក្រមសីលធម៌អង្គរ»។
លោក ឡុង កុសល អ្នកនាំពាក្យអាជ្ញាធរជាតិអប្សរាបានប្រាប់ភ្នំពេញប៉ុស្តិ៍ដែរថា អ្វីដែលអាជ្ញាធរអប្សរាចង់បាននោះគឺចង់ឲ្យគ្រប់អាជីវកម្មដែលទទួលតុបតែងខ្លួនជូនភ្ញៀវទេសចរគឺគោរពឲ្យបានត្រឹមត្រូវតាមការស្លៀកពាក់តាមបែបទំនៀមទម្លាប់ខ្មែរឲ្យបានត្រឹមត្រូវ ហើយអ្វីដែលលើលពីនេះលោកអះអាងថា អាជ្ញាធរជាតិអប្សរាគឺមានតែលើកទឹកចិត្តឲ្យពលរដ្ឋក៏ដូចជាភ្ញៀវទេសចរស្លៀកពាក់បែបនេះដើម្បីលើកបង្ហាញពីវប្បធម៌ល្អខ្មែរដោយគ្រាន់តែសុំឲ្យធ្វើការកែតម្រូវនូវអ្វីដែលមិនត្រឹមត្រូវឬមិនមែនជារបស់ខ្មែរតែប៉ុណ្ណោះ។
លោកបានរៀបរាប់ថា៖ «យើងសុំតែរបៀបរបបនៃការស្លៀកពាក់នេះឲ្យសមស្របតាមបែបប្រពៃណីបុរាណខ្មែរកុំឲ្យចេះតែប្រហាក់ប្រហែលៗដែលអាចនាំឲ្យមានការយល់ច្រឡំ ព្រោះយើងដឹងហើយលក្ខណៈបែបវប្បធម៌ប្រពៃណីយើងរស់នៅជិតខាងគ្នាគឺមានទៅមានមកដែលជះឥទ្ធពលឲ្យគ្នាទៅវិញទៅមក។ដូច្នេះយើងមិនចង់ឲ្យមានការយល់ច្រឡំ ព្រោះជួនកាលមានការយល់ច្រឡំថាលក្ខណៈបែបនេះជារបស់យើង ប៉ុន្តែការពិតមិនមែនសោះ»។
អាជីវករជួលសម្លៀកបំពាក់បុរាណខ្មែរនៅខេត្តសៀមរាបម្នាក់ដែលសុំមិនបញ្ចេញឈ្មោះបានប្រាប់ ភ្នំពេញ ប៉ុស្តិ៍ នៅថ្ងៃទី ១០ មីនាថា អ្នកស្រីគាំទ្រចំពោះចំណាក់ការរបស់ក្រសួង និងអាជ្ញាធរជាតិអប្សរាដែលតម្រូវឲ្យគ្រប់អាជីវករទាំងអស់ដែលប្រកបរបរនេះពិនិត្យឡើងវិញឲ្យបានត្រឹមត្រូវនូវការសម្លៀកបំពាក់ដែលបានតុបតែងជូនភ្ញៀវ។
ទន្ទឹមនឹងនេះ អ្នកស្រីក៏ស្នើឲ្យក្រសួងក៏ដូចជាមន្ត្រីពាក់ព័ន្ធមេត្តាផ្សព្វផ្សាយនិងបង្កើនការអប់រំបណ្តុះបណ្តាលដល់គ្រប់អាជីវកម្មទាំងអស់នៅក្នុងខេត្តដើម្បីទទួលបានចំណេះដឹងបន្ថែមពីវប្បធម៌និងប្រពៃណីដែលក្រសួងបានអនុញ្ញាតសម្រាប់ជាការកែតម្រូវទាំងអស់គ្នា។
អ្នកស្រីបានបញ្ជាក់ថា៖ «ខ្ញុំទទួលស្គាល់ថាមានខ្លះគាត់លាយ (តុបតែងមិនត្រូវមិនត្រូវ) ប៉ុន្តែខ្ញុំមិននិយាយពីកន្លែងគេផ្សេងទេ ទាក់ទងនឹងកន្លែងខ្ញុំ គឺយើងព្យាយាមតែងជាខ្មែរជូនភ្ញៀវគ្រាន់តែទាក់ទងនឹងការយល់ដឹងទូទៅ គឺនៅមានកម្រិត។ដូច្នេះប្រសិនបើមានជំនាញខាងក្រសួងគាត់ចុះមកណែនាំបន្ថែមពីការស្លៀកពាក់ឲ្យចំជាខ្មែរយើងតែម្តងក៏ល្អសម្រាប់ពួកយើងដែរ»។
បើតាមអាជីវករជួលសម្លៀកបំពាក់បុរាណខ្មែរនៅខេត្តសៀមរាបរូបនេះ សម្លៀកបំពាក់ដែលកំពុងពេញនិយមសម្រាប់ភ្ញៀវទេសចរដែលតែងតែចូលចិត្តជួលស្លៀកពាក់ដើម្បីចូលទស្សនាអង្គរវត្តគឺភាគច្រើនសម្លៀកបំពាក់ក្នុងសម័យឧដុងនិងសម័យលង្វែក៕
វីដេអូ៖