The Phnom Penh Post Search

Search form




Logo of Phnom Penh Post newspaper Phnom Penh Post - លោកនាយក​រដ្ឋ​មន្ត្រី​ ហ៊ុន​ សែន ​នឹង​អញ្ជើញ​ទៅ​សម្ពោធ​ដាក់​ឲ្យប្រើប្រាស់​ផ្លូវ ៣៨ ​ខ្សែ ​ក្នុង​ក្រុង​សៀមរាប​ ខេត្តសៀមរាប​ ក្នុង​ពេលឆាប់ៗ​

លោកនាយក​រដ្ឋ​មន្ត្រី​ ហ៊ុន​ សែន ​នឹង​អញ្ជើញ​ទៅ​សម្ពោធ​ដាក់​ឲ្យប្រើប្រាស់​ផ្លូវ ៣៨ ​ខ្សែ ​ក្នុង​ក្រុង​សៀមរាប​ ខេត្តសៀមរាប​ ក្នុង​ពេលឆាប់ៗ​

Content image - Phnom Penh Post
ទិដ្ឋភាពផ្លូវនៅក្នុងខេត្តសៀមរាប។ រូបថត MPWT

លោកនាយក​រដ្ឋ​មន្ត្រី​ ហ៊ុន​ សែន ​នឹង​អញ្ជើញ​ទៅ​សម្ពោធ​ដាក់​ឲ្យប្រើប្រាស់​ផ្លូវ ៣៨ ​ខ្សែ ​ក្នុង​ក្រុង​សៀមរាប​ ខេត្តសៀមរាប​ ក្នុង​ពេលឆាប់ៗ​

សៀមរាបៈ​ លោកនាយក​រដ្ឋ​មន្ត្រី ​ហ៊ុន​ សែន ​នឹង​អញ្ជើញ​ទៅ​សម្ពោធ​ដាក់​ឲ្យប្រើប្រាស់​ផ្លូវ ៣៨​ ខ្សែ ​ក្នុង​ក្រុង​សៀមរាប​ ខេត្តសៀមរាប​ ក្នុង​ពេលឆាប់ៗ​ខាងមុខនេះ ​ក្រោយ​ផ្លូវ​នេះ​បាន​កែលម្អ​រ​រួច​រាល់​ជាស្ថាពរ​។​ នេះ​បើតាម​ការ​ឲ្យដឹង​ពីអ្នក​នាំពាក្យ​រដ្ឋ​បាល​ខេត្ត​សៀមរាប​ ​នៅថ្ងៃទី​ ១០​ ខែមីនា​នេះ​។​

លោក​ ​លី ​សំរិទ្ធ ​អភិបាល​រង​ ​និង​ជា​អ្នកនាំ​ពាក្យ​រដ្ឋ​បាល​ខេត្តសៀមរាប​ បាន​ឲ្យដឹង​នៅថ្ងៃទី ​១០​ ខែមីនាថា​ ​ផ្លូវ៣៨​ ខ្សែ​ក្នុង​ក្រុង​សៀមរាប​ ខេត្ត​សៀម​រាប នឹង​ត្រូវ​សម្ពោធ​ដាក់​ឲ្យ​ប្រើប្រាស់​ក្នុង​ពេលឆាប់ៗ​ខាងមុខ​នេះ ​ប៉ុន្តែ​លោក​បញ្ជាក់​ថា​មិន​បាន​ដឹង​ច្បាស់​ថា​ថ្ងៃ​ណាប្រាកដ​នោះ​ទេ ​អាច​ក្នុង​អំឡុង​ខែមីនា​នេះ ​ឬ​ដើម​ខែមេសា​ខា​ង​មុខ​។​

​លោក​ថ្លែង​ថា​៖​«​ ខ្ញុំ​គ្រាន់​តែ​ដឹង​ថា​ សម្តេច​តេជោនាយករដ្ឋ​មន្ត្រី​នឹង​អញ្ចើញ​មក​សម្ពោធ​ដាក់​ឲ្យ​ប្រើប្រាស់​ផ្លូវ ៣៨​ខ្សែនេះ​ ប៉ុន្តែ​ខ្ញុំមិ​ន​បាន​ដឹង​ច្បាស់​ថា នៅថ្ងៃ​ណាប្រាក​ដ​នោះ​ទេ»​។

អ្នក​នាំពាក្យ​រដ្ឋបាល​ខេត្តសៀមរាប​​ប្រាប់​ថា ​ពលរដ្ឋ​បាន​នឹង​កំពុ​ង​ប្រើ​ប្រាស់​ផ្លូវ ៣៨ ​ខ្សែ​ ​ក្នុង​ការ​ធ្វើ​ដំណើរ​ទៅ​មក​ដោយ​រលូន​ ​បន្ទាប់​ពីផ្លូវ​នេះ​បាន​ធ្វើ​រួចរាល់​ជា​ស្ថាពរ​ ​ទោះ​ជា​ផ្លូវនេះ ​នៅ​មិនទាន់​មាន​ការ​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​ក៏​ដោយ ។​ ​លោក​បន្តថា​ ​ក្រោយ​ផ្លូវ​៣៨​ខ្សែធ្វើ​រួច​រាល់ អ្វីដែ​ល​អាជ្ញាធរ​ខេត្ត​ត្រូវគិត​គូ​បន្ត​នោះគឺ​ ​អនាម័យ ​និង​សណ្តាប់​ធ្នាប់​សាធារណៈ។​

លោក​ ​លី​ សំរិទ្ធ​ បាន​ឲ្យដឹង​ទៀតថា ​អាជ្ញាធរ​កំពុង​ផ្តោត​សំខាន់​ទៅ​លើការ ណែនាំ​ប្រជាពលរដ្ឋ​ឲ្យ​មាន​ការ​ប្រើ​ប្រាស់​ផ្លូវ​ត្រូវ​តាម​មុខងារ​ និង​អំពាវ​នាវ​ឲ្យប្រ​ជា​ពលរដ្ឋ​គោរព​បទដ្ឋាន​ក្នុង​ការ​ប្រើប្រាស់​ផ្លូវ​ ​និង​ចិញ្ចើម​ផ្លូវ ​ដែល​មាន​ការ​ចត ការ​ដាក់​ទំនិញ​តាំង​លក់ ​ព្រម​ទាំង​ការ​ទុក​ដាក់​សំរាម​ ​ផង​ដែរ​។​ ក្នុង​ការ​លំអរ​ដង​ផ្លូវ​នោះ ​ក៏​មាន​ការ​ធ្វើ​សួន​តាម​បណ្តោយ​ខឿន​ពុះ​ចែក​ទ្រូង​ផ្លូវ ដោយ​ដាំ​ស្មៅ ​និង​ផ្កា​ចម្រុះ​ពណ៍​ ​ព្រម​ទាំង​ដាំ​ដើម​ឈើ​ផង​ដែរ​។​

យ៉ាង​ណា​ក៏ដោយ ​សួន​ធំៗ​នៅ​តាម​បណ្តោយ​ផ្លូវ​នោះ​មិនទាន់​បាន​រៀបចំ​នៅ​ឡើយ​ទេ ​ព្រោះក្នុ​ង​ក្រុង​មានសួ​ន​ធំ​រួច​ហើយ​ដែល​ស្ថិត​នៅ​ក្បែរព្រះរាជ​ដំណាក់ ​។ ​លោក​លី សំ​រិ​ទ្ធ​ ថា​ ប្រជា​ពលរដ្ឋ​ភាគ​ច្រើន​​បាន​យល់​ដឹង​ពីការ​ប្រើ​ប្រាស់​ផ្លូវ និង​ចូល​រួម​គោរព​ច្បាប់​ចរាចរណ៍ ​និង​សម្តែង​ការ​សប្បាយ​រីករាយ​ជា​មួយ​សមិទ្ធ​ផល​ថ្មី​នេះ​។​

លោក​ថ្លែង​ថា​៖​ «​ទី​ក្រុង​នេះ​ប្រហាក់​ប្រហែល​នឹង​ទីក្រុង​របស់​ប្រទេស​ផ្សេងៗ​ទៀត​ដែល​នៅជិត​ខាង​យើង​ដែរ​។​ អ៊ីចឹង​យើង​មិន​អន់​ដូច​ពីមុន​ពេកទេ។​ អ្វី​ដែល​យើង​ប្រាថ្នា​គឺ​បាន​ហើយ ​ប៉ុន្តែ​ការ​ថែទាំង​និង​សម្អាត​ក្នុង​ការ​ប្រើប្រាស់​ហ្នឹង​វា​ត្រូវមាន​ការចាំ​បាច់​មួយ​ទៀត ​អ៊ីចឹង​មាន​តែ​អំពាវនាវ​ពលរដ្ឋ​ទាំងអស់​គ្នាខិត​ខំយក​ចិត្ត​ទុកដាក់​ថែរក្សា​អនាម័យ​ឲ្យស្អាត​ដូច​នៅ​ផ្ទះរ​បសខ្លួន​»​។​

លោក​អភិបាល​រងខេត្ត​នេះ​បញ្ជាក់​ថា​ ការ​រួមគ្នា​ថែរ​ក្សា​បាន​ស្អាត​នៅ​តាម​ដង​ផ្លូវ​ ​ធ្វើ​ឲ្យភ្ញៀវ​ទេសចរណ៍​ជាតិ​ ​និង​អន្តរជាតិ​ ​មាន​ភាព​សប្បាយ​រីករាយ ជា​មួយ​និង​ភាព​ងាយ​ស្រួល​ក្នុង​ការ​ធ្វើ​ដំណើរ​មិន​កកស្ទះ​ចរាចរណ៍ ​គ្មានភាព​ស្មុគស្មាញ ​មិន​មាន​ភាព​កខ្វក់ ​និង​មាន​របៀប​រៀបរយ​ មាន​ភ្លើង​សញ្ញា​ចរាចរណ៍ ​មាន​ភ្លើង​បំភ្លឺ​តាម​ផ្លូវ​ មាន​គំនូស​ចរាចរណ៍ ​ហើយ​ផ្លូវ​ស្អាត​មិន​មាន​គ្រលុក​ដក់​ទឹក​។​

លោក​ថ្លែង​ថា៖​«​ផ្លូវ​ដើរ​ក៏​មាន​ល្អ ​ផ្លូវ​សម្រាប់​ជន​ពិការ​ក៏​មាន ផ្លាក​សញ្ញាច​រាចរណ៍​ក៏​មាន​អ៊ីចឹង​រចនា​សម្ព័ន្ធ​ទាំង​អស់​ហ្នឹង​បម្រើ​ឲ្យ​សុខុមាល​ភាព​សម្រាប់​ការ​ស្នាក់​នៅ​និង​ការ​ធ្វើដំណើរ​ របស់​អ្នក​ទី​ក្រុង​សៀម​រាប​ក៏​ដូច​ជា​ភ្ញៀវ​ទេសចរណ៍​ដែល​មក​លេង​»​។​

បើ​តាម​ ​លោក​ ​លី ​សំរិទ្ធ ​ផ្លូវ​ទាំង​៣៨ខ្សែនេះ​ បាន​ធ្វើ​ឲ្យ​ទីក្រុង​សៀមរាប​ ប្រែក្លាយ​រូប​រាង​ជា​ទី​ក្រុង​ទំនើប​ ​និង​ទេស​ចរណ៍​ ដ៏មាន​សក្តា​​នុពល ​ដែល​រាជរដ្ឋាភិ​បាល​កម្ពុជា​បាន​កំណត់​ជា​តំបន់​ស្នូល​នៃប៉ូល​អភិ​វឌ្ឍ​ជាតិ​ ជា​គោលដៅ​​ទេសចរណ៍​វប្បធម៌​ប្រវត្តិ​សាស្រ្ត ​និង​ធម្មជាតិ​ ស្រប​តាម​រូបសាស្ត្រ​ទី​ក្រុង​ ​រួម​ជា​មួយ​ការ​គិតគូរ​ដល់​ការការពារ ​និង​កែលម្អបរិស្ថាន​ ផាសុក​ភាព​របស់​ប្រជា​ពលរដ្ឋ​ ​និង​ការរៀបចំ​​អភិវឌ្ឍ​ទីក្រុងឆ្លាតវៃ​ ​(Smart City)​ផងដែរ​។

លោក​ថា ​ជា​ហេដ្ឋា​រចនាសម្ព័ន្ធ​ ​ផ្លូវ​ ៣៨​ខ្សែរ​ មាន​ការ​ប្រទាក់​ក្រឡា​គ្នា​ តភ្ជាប់​ទីប្រ​ជុំជន​ ទៅ​ជាយ​ក្រុង ​និង​តភ្ជាប់​ទៅ​កាន់​តំបន់​ទេសចរណ៍​សំខាន់ៗ​ និង​បណ្តាញ​ខ្សែផ្លូ​វ​ជាតិ​នានា ​ជំរុញ​កំណើន​ដឹក​ជញ្ជូន​ ​ទាក់​ទាញ​វិនិយោគិន​ ធុរជន​ ​និង​ភ្ញៀវ​ទេសចរ​ជាតិ​-អន្តរជាតិ​ ​ដែល​ជា​ការរួ​ម​ចំណែក​ក្នុង​ការ​​ជំរុញ​កំណើន​​​សេដ្ឋកិច្ច​ជាតិ​ឱ្យ​កាន់​តែរីក​ចម្រើន​ ​ផងដែរ​។​

យោង​តាម​របាយការណ៍​របស់​អគ្គនាយក​ដ្ឋាន​បច្ចេក​ទេស​ នៃ​ក្រសួង​សាធារណ​ការ​ ​និង​ដឹក​ជញ្ជូន​បាន​ឱ្យ ​ដឹង​ថា ​គម្រោង​ស្ថាបនា​ហេដ្ឋា​រចនា​សម្ព័ន្ធ​ផ្លូវ​ចំនួន​ ​៣៨​ខ្សែ ​នៅ​ក្រុងសៀមរាប​ ​ខេត្ត​សៀមរាប​ បាន​បញ្ចប់ ជា​ស្ថាពរ​នៅ​ថ្ងៃទី ២៩ ​ខែ ធ្នូ​ ឆ្នាំ​ ២០២១។ ​គម្រោង​កែ​លម្អ​​ផ្លូវ ​៣៨ ​ខ្សែ ​នេះ មាន​ប្រវែង​សរុប​ ១០៦,៤២ ​គីឡូម៉ែត្រ ​ប្រើប្រាស់​ថវិកាជាតិ​សរុ​ប​ប្រមាណ​ជាង ១៤៩ ២១៦ ៥៩៥ ​ដុល្លារអាមេរិក។​ ​

ក្នុង​នោះ​ចំនួន ៩ លាន​ដុល្លារ​អាមេរិក ​ចំណាយ​លើ​ការងារ​ចាំបាច់​ក្នុង​ការរៀបចំ​ ស្ថាប​នាប្រ​ព័ន្ធ​បង្ហូរ​ទឹក​ភ្លៀង ​និងទឹក​កខ្វក់​ ​ឋិត​ក្រៅ​គម្រោង​សាងសង់​ខ្សែផ្លូ​វ​ទាំង​៣៨នេះ។ ​ផ្លូវ​នេះ ​ចំណាយ ពេល​សាង​សង់​ចំនួន១៣ខែ​ ​ដែល​មាន​ការ ​សម្ពោធ​​បើក​ការដ្ឋាន​សាង​សង់​កាល​ពីថ្ងៃទី ៣០​ ​ខែវិច្ឆិកា ​ឆ្នាំ ២០២០ ​ក្រោម​វត្ត​មាន​លោក​នាយក​រដ្ឋ​មន្ត្រី ​ហ៊ុន​ សែន​៕​ ​

អត្ថបទគួរចាប់អារម្មណ៍