.jpg)
នារីដែលបម្រើការក្នុងវិស័យមីនទទួលបាច់ផ្កាកាលពីថ្ងៃទី ៩ មីនា។ រូបថត CMAC
ភ្នំពេញៈ អាជ្ញាធរមីននៅថ្ងៃទី ១០ មីនាបានប្រកាសផ្សព្វផ្សាយដល់ប្រតិបត្តិករ និងភាគីពាក់ព័ន្ធឱ្យប្រើប្រាស់ជាផ្លូវការនូវផែនការបញ្ជ្រាបយេនឌ័រក្នុងវិស័យសកម្មភាពមីន (GMAP) ២០២១-២០២៥ ដែលជាផ្នែកនៃការរៀបចំផែនការសកម្មភាព និងការប្រើប្រាស់សូចនាករដែលបានកំណត់ជាឧបករណ៍លើការត្រួតពិនិត្យតាមដាន និងវាយតម្លៃលើសកម្មភាពរបស់ខ្លួន។
លោកទេសរដ្ឋមន្ត្រី លី ធុជ អនុប្រធានទី ១ អាជ្ញាធរមីនបានដឹកនាំបើកសិក្ខាសាលាផ្សព្វផ្សាយផែនការបញ្ជ្រាបយេនឌ័រក្នុងវិស័យសកម្មភាពមីន (GMAP) ២០២១-២០២៥ នេះ ដោយមានការចូលរួមពីថ្នាក់ដឹកនាំអាជ្ញាធរមីនតំណាងក្រសួងស្ថាប័នពាក់ព័ន្ធ ក្រុមការងារផែនការសកម្មភាពមីន (ម៉ាពូ) ២៥ រាជធានី-ខេត្ត និងប្រតិបត្តិករបោសសម្អាតមីនផងដែរ។
លោកថ្លែងថា៖ «សិក្ខាសាលានេះគឺដើម្បីប្រកាសផ្សព្វផ្សាយដល់ប្រតិបត្តិករ និងភាគីពាក់ព័ន្ធឱ្យប្រើប្រាស់ជាផ្លូវការនូវ GMAP និងជំរុញឱ្យគ្រប់ភាគីចូលរួមអនុវត្តការបញ្ជ្រាបយេនឌ័រក្នុងវិស័យមីនដោយប្រើប្រាស់ GMAP នេះជាឯកសារគោលក្នុងការរៀបចំផែនការសកម្មភាព និងការប្រើប្រាស់សូចនាករដែលបានកំណត់ជាឧបករណ៍ដើម្បីត្រួតពិនិត្យតាមដាន និងវាយតម្លៃលើសកម្មភាពរបស់ខ្លួន»។
លោកលើកឡើងថា រាជរដ្ឋាភិបាលកម្ពុជាបានប្តេជ្ញាចិត្តពង្រឹងសមភាពយេនឌ័រនៅគ្រប់កម្រិត និងគ្រប់វិស័យ និងពង្រឹងតួនាទីស្ត្រីដែលជាឆ្អឹងខ្នងនៃសេដ្ឋកិច្ច និងសង្គមជាតិដោយដាក់បញ្ចូលការបញ្ជ្រាបយេនឌ័រទៅក្នុងគោលនយោបាយជាតិ និងផែនការយុទ្ធសាស្ត្រជាតិសំខាន់ៗ។
ការបញ្ជ្រាបយេនឌ័រក្នុងវិស័យសកម្មភាពមីនត្រូវបានកំណត់ជាគោលដៅដ៏សំខាន់មួយនៅក្នុងផែនការយុទ្ធសាស្ត្រជាតិសកម្មភាពមីន ២០១៨-២០២៥ ដែលជាផែនទីបង្ហាញផ្លូវដល់គ្រប់ប្រតិបត្តិករសកម្មភាពមីនជាតិ-អន្តរជាតិរួមទាំងក្រសួងស្ថាប័ន ដៃគូអភិវឌ្ឍន៍ និងភាគីពាក់ព័ន្ធផ្សេងទៀត។
លោក លី ធុជ បញ្ជាក់ថា អាជ្ញាធរមីន ដែលជាសេនាធិការឱ្យរាជរដ្ឋាភិបាលក្នុងការសម្របសម្រួលវិស័យសកម្មភាពមីននៅកម្ពុជាបានសហការជាមួយគ្រប់ភាគីពាក់ព័ន្ធធ្វើបច្ចុប្បន្នភាព និងកសាងផែនការបញ្ជ្រាបយេនឌ័រក្នុងវិស័យសកម្មភាពមីន (GMAP) ២០២១-២០២៥ ស្របតាមអាណត្តិរបស់ផែនការយុទ្ធសាស្ត្រជាតិសកម្មភាពមីន។
លោកបានឱ្យដឹងថា ការធ្វើបច្ចុប្បន្នភាព និងកសាងផែនការបញ្ជ្រាបយេនឌ័រ គឺដើម្បីធានាថា សេចក្តីកង្វល់ បទពិសោធ និងតម្រូវការរបស់ស្ត្រី បុរស កុមារី កុមារា និងជនមានពិការភាពត្រូវបានយកចិត្តទុកដាក់។
លោក លី ធុជ បានថ្លែងអំណរគុណចំពោះកិច្ចសហការល្អពីគ្រប់ក្រសួងស្ថាប័នដៃគូអភិវឌ្ឍន៍ប្រតិបត្តិករសកម្មភាពមីនជាតិ-អន្តរជាតិ និងភាគីពាក់ព័ន្ធក្នុងការផ្តល់ធាតុចូល និងអនុសាសន៍ដ៏មានតម្លៃមកកាន់អាជ្ញាធរមីន ជាពិសេស UNDP ដែលបានផ្តល់ការគាំទ្រទាំងផ្នែកបច្ចេកទេស និងហិរញ្ញវត្ថុសម្រាប់ការកសាងផែនការនេះ។
លោកជឿជាក់ថា គ្រប់ភាគីពាក់ព័ន្ធនឹងបន្តចូលរួមអនុវត្តផែនការបញ្ជ្រាបយេនឌ័រក្នុងវិស័យសកម្មភាពមីន ២០២១-២០២៥ នេះប្រកបដោយជោគជ័យ ប្រសិទ្ធភាព។
បើតាមអាជ្ញាធរមីន ផែនការបញ្ជ្រាបយេនឌ័រក្នុងវិស័យសកម្មភាពមីនរយៈពេល ៥ ឆ្នាំនេះ នឹងត្រូវប្រើប្រាស់ជាផែនទីបង្ហាញផ្លូវសម្រាប់អាជ្ញាធរមីន ប្រតិបត្តិករ និងភាគីពាក់ព័ន្ធដើម្បីជួយដល់ដំណើរការបញ្ជ្រាបយេនឌ័រក្នុងការធ្វើផែនការ ប្រតិបត្តិការ ការត្រួតពិនិត្យ និងការវាយតម្លៃកម្មវិធីសកម្មភាពមីនទាំងអស់។
GMAP ២០២១-២០២៥ ត្រូវបានកំណត់ជាយុទ្ធសាស្ត្រចំនួន ៣ ក្នុងនោះ ទី ១- ធ្វើបច្ចុប្បន្នភាព និងពង្រឹងការអនុវត្ត GMAP និងគោលការណ៍ណែនាំស្តីពីការបញ្ជ្រាបយេនឌ័រក្នុងវិស័យសកម្មភាពមីន។ ទី ២- ពង្រឹងសមត្ថភាពអាជ្ញាធរមីន ម៉ាពូប្រតិបត្តិករ អាជ្ញាធរថ្នាក់ក្រោមជាតិ និងអាជ្ញាធរមូលដ្ឋានក្នុងការអនុវត្តគោលការណ៍ណែនាំស្តីពីការបញ្ជ្រាបយេនឌ័រក្នុងវិស័យសកម្មភាពមីន និងយុទ្ធសាស្ត្រ ទី ៣ លើកកម្ពស់ការចូលរួមដោយស្មើភាពរបស់ស្ត្រីក្នុងដំណើរសកម្មភាពមីនក្នុងសេវាកម្មសម្រាប់អ្នកនៅរស់រានមានជីវិត ការអប់រំអំពីគ្រោះថ្នាក់ដោយសារមីន និងយុទ្ធភណ្ឌគ្រឿងផ្ទុះ និងក្នុងសកម្មភាពស្វែងរកការគាំទ្រមតិ។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានឱ្យដឹងថា អង្គភាពស៊ីម៉ាក់បច្ចុប្បន្នមានកងកម្លាំងជំនាញជាស្ត្រីចំនួនជាង ៣០០ នាក់ស្មើនឹងប្រមាណជាង ១៦ ភាគរយនៃកម្លាំងជំនាញសរុបរបស់ស៊ីម៉ាក់។ លោកថ្លែងថា៖ «អង្គភាពបន្តខិតខំលើកកម្ពស់យេនឌ័រតាមគ្រប់កម្លាំងជំនាញរបស់ខ្លួន»។
បើតាមលោក ហេង រតនា កម្លាំងអង្គភាពស៊ីម៉ាក់ជាស្ដ្រី ១ រូប គឺលោកស្រី គួន សុផល ដែលជាអ្នកជំនាញដោះមីនបានធ្លាក់ខ្លួនពិការដៃម្ខាងដោយសារគ្រោះថ្នាក់ក្នុងការធ្វើដំណើរទៅបោសសម្អាតមីននៅទិសប្រាសាទព្រះវិហារ។
លោកបានបញ្ជាក់ថា សុផល បានរំឭកដោយមានមោទនភាពដែលបានទទួលមេដាយមាសការងារពីលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទលើការងារបោសសម្អាតមីនរបស់គាត់៕
