ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃបានចាត់ទុកគ្រោះថ្នាក់ចរាចរណ៍ថា នៅតែជាបញ្ហាប្រឈមខ្លាំង និងបានអំពាវនាវដល់ប្រជាពលរដ្ឋសូមចូលរួមគោរព និងអនុវត្តច្បាប់ស្ដីពីចរាចរណ៍ផ្លូវគោកឱ្យបានគ្រប់ពេលធ្វើដំណើរ ខណៈក្នុងខែកុម្ភៈមានអ្នកស្លាប់ដោយសារគ្រោះថ្នាក់ចរាចរណ៍ជិត ១៥០ នាក់។
យោងតាមរបាយការណ៍ផ្ដល់ដោយមន្ត្រីជំនាញនៃក្រសួងមហាផ្ទៃ ដែលបង្ហាញនៅលើទំព័រហ្វេសប៊ុករបស់លោក ស ខេង កាលពីថ្ងៃទី ១០ មីនាបានឱ្យដឹងថា នៅក្នុងខែកុម្ភៈ ឆ្នាំ ២០២២ នេះមានគ្រោះថ្នាក់ចរាចរណ៍កើតឡើងទូទាំងប្រទេសចំនួន ២៥៦ លើកបណ្ដាលឱ្យមានអ្នកស្លាប់ ១៤៣ នាក់ និងរបួស ៣៤៩ នាក់ ក្នុងនោះរបួសធ្ងន់ ២១៩ នាក់។
ស្ថានភាពនេះបើប្រៀបធៀបនឹងខែមករា គឺករណីគ្រោះថ្នាក់ចរាចរណ៍បានថយចុះចំនួន ៨៧ លើក ស្លាប់ថយ ៥២ នាក់ និងរបួសថយចុះ ១០៤ នាក់។ ប៉ុន្តែចំនួននេះ បើប្រៀបធៀបនឹងខែកុម្ភៈ ឆ្នាំ ២០២១ វិញ គឺមានការកើនឡើងចំនួន ៥ លើក ស្លាប់កើនឡើង ១៦ នាក់ ឯករណីរងរបួសបានថយចុះ ៦៦ នាក់។
របាយការណ៍បញ្ជាក់ថា៖ «ជារួមស្ថានភាពគ្រោះថ្នាក់ចរាចរណ៍នៅតែស្ថិតក្នុងការប្រឈមខ្ពស់នៅឡើយ ទាំងចំនួនករណីអ្នកស្លាប់ និងអ្នករងរបួស ដែលក៏អាចឱ្យយើងប្រៀបធៀបបានថា មានកម្រិតខ្ពស់ជាងអ្នកស្លាប់ដោយជំងឺកូវីដ ១៩ នៅកម្ពុជានាបច្ចុប្បន្ននេះ និងគ្រោះថ្នាក់សង្គមផ្សេងទៀត»។
ក្នុងចំណោមការប្រឈមនៃស្ថានភាពគ្រោះថ្នាក់ចរាចរណ៍នេះមន្ត្រីជំនាញបានកត់សម្គាល់ឃើញថាបញ្ហាធំជាងគេ គឺការមិនគោរពច្បាប់ ដូចជាការបើកបរធ្វេសប្រហែស ការបើកបរលឿនការបើកបរមិនគោរពសិទ្ធិ មិនប្រកាន់ស្តាំ ការបើកបរជែង បត់ឆ្វេង-ស្តាំមិនប្រយ័ត្ន និងបើកបរពេលស្រវឹងជាដើម។ ជាមួយនឹងបញ្ហាគ្រោះថ្នាក់ចរាចរណ៍នេះលោក ស ខេង រដ្ឋមន្ត្រីក្រសួងមហាផ្ទៃបានជំរុញឱ្យស្ថាប័នពាក់ព័ន្ធបង្កើនការរៀបចំឱ្យមានគំនូសសញ្ញា ភ្លើងសញ្ញា និងស្លាកសញ្ញាចរាចរណ៍ផ្សេងៗឱ្យបានគ្រប់គ្រាន់តាមដងផ្លូវ ដើម្បីក្រើនរំឭក និងពញ្ញាក់អារម្មណ៍អ្នកបើកបរឱ្យគោរពច្បាប់ និងមានការប្រុងប្រយ័ត្ន ព្រមទាំងកាត់បន្ថយគ្រោះថ្នាក់ចរាចរណ៍។
ការជំរុញបែបនេះក៏ព្រោះតែលោកមើលឃើញថា បញ្ហាគ្រោះថ្នាក់ចរាចរណ៍នៅតែជាកត្តាប្រឈមខ្លាំងសម្រាប់កម្ពុជា បើទោះជាស្ថានភាពគ្រោះថ្នាក់ចរាចរណ៍ក្នុងខែកុម្ភៈឆ្នាំ ២០២២ នេះ ចំនួនគ្រោះថ្នាក់មានការថយចុះជាងខែមករា ប៉ុន្តែករណីស្លាប់ បានកើនឡើងធៀបនឹងខែកុម្ភៈ ឆ្នាំ ២០២១ និងចំនួនអ្នករងរបួសបានថយចុះ។
លោកបញ្ជាក់ថា៖ «ជាថ្មីម្ដងទៀត ខ្ញុំសូមអំពាវនាវបងប្អូនជនរួមជាតិ សូមចូលរួមគោរព និងអនុវត្តច្បាប់ស្ដីពីចរាចរណ៍ផ្លូវគោកឱ្យបានគ្រប់ពេលធ្វើដំណើរមានស្មារតីប្រុងប្រយ័ត្ន យោគយល់អធ្យាស្រ័យដើម្បីការពារសេចក្ដីសុខខ្លួនយើង អ្នកដទៃ និងរួមចំណែកកាត់បន្ថយហានិភ័យខ្លាំងដល់ជីវិតពលរដ្ឋយើង»។
លោកបញ្ជាក់បន្តថា៖ «ខ្ញុំក៏សូមក្រើនរំឭកដល់មន្ត្រីមានសមត្ថកិច្ចដឹកនាំ និងប្រតិបត្តិការអនុវត្តច្បាប់ស្ដីពីចរាចរណ៍ផ្លូវគោកទាំងអស់ បង្កើន និងបន្តរឹតបន្តឹងការអនុវត្តច្បាប់ឱ្យបានសកម្ម គ្មានការលើកលែង ឬយោគយល់អ្វីទាំងអស់ ពីព្រោះនេះជាភារកិច្ចការពារសេចក្ដីសុខសុវត្ថិភាព និងអាយុជីវិតប្រជាពលរដ្ឋ»។
ក្រៅពីជំរុញបែបនេះ លោក ស ខេង ក៏បានរំឭកឱ្យប្រជាពលរដ្ឋទាំងអស់ចូលរួមគោរពច្បាប់ចរាចរណ៍ ដើម្បីសុវត្ថិភាព តាមពាក្យស្លោកដែលរដ្ឋាភិបាលបានដាក់ចេញ ដោយធ្វើយ៉ាងណាចូលរួមកាត់បន្ថយ និងទប់ស្កាត់ចំនួនអ្នកស្លាប់ និងអ្នករបួសនៅក្នុងប្រទេស។
លោក គឹម បញ្ញានាយកអង្គការមូលនិធិបង្ការរបួសអាស៊ីប្រចាំនៅកម្ពុជាបានយល់ស្របថា បញ្ហាគ្រោះថ្នាក់ចរាចរណ៍នៅក្នុងប្រទេសបានក្លាយជាបញ្ហាប្រឈមឡើងវិញ និងជាកត្តាភ័យព្រួយបារម្ភជាងជំងឺកូវីដ ១៩ ទៅទៀត ព្រោះចំនួនអ្នកស្លាប់ និងរបួសនៅតែបន្ត រក្សាតួលេខស្លាប់ខ្ពស់ខណៈជំងឺកូវីដស្ទើរតែគ្មានអ្នកស្លាប់ទាល់តែសោះនៅក្នុងថ្ងៃខ្លះ។
លោកបានរៀបរាប់ថា៖ «ការជំរុញរបស់សម្តេចក្រឡាហោម គឺជាចំណុចល្អដើម្បីឱ្យប្រជាពលរដ្ឋរបស់យើងលោកបានទទួលនូវព័ត៌មាន ព្រោះការបំពាក់ស្លាកសញ្ញាចរាចរណ៍ គឺដើម្បីឱ្យអ្នកបើកបរគាត់បានដឹងថា ផ្លូវណាផ្លូវកោងផ្លូវណាត្រូវប្រើល្បឿនប៉ុន្មាន? ផ្លូវណាដែលហាមវ៉ាជែងជាដើម»។
យ៉ាងណាលោក គឹម បញ្ញា យល់ថា ការអនុវត្តការរឹតបន្ដឹងច្បាប់របស់មន្ត្រីឱ្យបានញឹកញាប់គឺនៅតែកត្តាសំខាន់ ខណៈក្នុងដំណាក់កាលនេះ ការបំពាក់ស្លាកសញ្ញាចរាចរណ៍ទាំងនេះគួរតែធ្វើឡើងឱ្យបានគ្រប់ជ្រុងជ្រោយនៅទីតាំងសំខាន់ៗមួយចំនួន ជាពិសេសកន្លែងដែលមានគ្រោះថ្នាក់ចរាចរណ៍ញឹកញាប់៕
វីដេអូ៖