.jpg)
ឡូហ្គោគណបក្ស និងលិខិតអញ្ជើញរបស់មេឃុំ។ រូបថត គណបក្សកម្ពុជានិយម
ភ្នំពេញៈ គណបក្សកម្ពុជានិយមបានចោទលោកស្រី វ៉ា សារឿន មេឃុំកន្សោមអក ស្រុកកំពង់ត្របែក ខេត្តព្រៃវែង ថាបានធ្វើការខុសពីតួនាទីដោយគំរាមកំហែង និងដាក់សម្ពាធតាមរយៈការកោះហៅបេក្ខជនឈរឈ្មោះបោះឆ្នោត ២ រូបឱ្យទៅជួបនៅឯទីស្នាក់ការឃុំ។ ប៉ុន្តែ លោកស្រី បានបដិសេធចំពោះការចោទប្រកាន់នេះថា មិនត្រឹមត្រូវ និងជារឿងមិនពិត ។
លោក សុខ ប៉េងឡុង ប្រធាននាយកដ្ឋានព័ត៌មាននៃគណបក្សកម្ពុជានិយមប្រាប់ភ្នំពេញ-ប៉ុស្តិ៍នៅថ្ងៃទី ១០ ខែមីនា ថា លោកស្រី វ៉ា សារឿន មេឃុំកន្សោមអក រួមជាមួយនឹងអភិបាលរងស្រុក និងអធិការស្រុកផងដែរ បានមកជ្រៀតជ្រែក សម្លុតគំរាមកំហែង ទិញទឹកចិត្តឱ្យចុះចូល និងបានជ្រៀតជ្រែកការងាររបស់គណៈកម្មការឃុំសង្កាត់រៀបចំការបោះឆ្នោតថែមទៀត ហើយមានទាំងចេញលិខិតកោះហៅបេក្ខជនមកពីសមាជិកគណបក្សកម្ពុជានិយមផងដែរ។
លោកបន្តថា ទង្វើនេះបានផ្ទុយពីនីតិវិធីក្នុងកិច្ចការបោះឆ្នោតជាខ្លាំង។ នេះជាសកម្មភាពមួយដែលគណបក្សទទួលយកមិនបាន និងបានស្នើសុំឱ្យមានចំណាត់ការជាបន្ទាន់ចំពោះអាជ្ញាធរ ឃុំ កន្សោមអក ដែលបានប្រើប្រាស់លើសដែនសមត្ថកិច្ចរបស់ខ្លួន។ លោកថ្លែងថា៖ «ប្រសិនបើគ្មានចំណាត់ការណាមួយចំពោះរឿងនេះទេ នោះបញ្ជាក់ថា ការបោះឆ្នោតក្នុងឃុំសង្កាត់នោះមិនមានតម្លាភាព និងយុត្តិធម៌ឡើយ។
បើតាម លោក សុខ ប៉េងឡុង មិនមែនមានតែនៅក្នុងឃុំនេះ មួយទេ ប៉ុន្តែបេក្ខជនឈរឈ្មោះមកពីគណបក្សរបស់លោកនៅក្នុងឃុំ សង្កាត់ផ្សេងទៀតក៏ទទួលរងសម្ពាធពីអាជ្ញាធរដែរ ក្នុងនោះបេក្ខជនរបស់លោកនៅ ឃុំរាម ឃុំអូរឧកញ៉ាហេង និងឃុំបឹងតាព្រហ្ម ខេត្តព្រះសីហនុបានទទួលរងសម្ពាធក៏ស្នើសុំឈប់ ចំណែកឯនៅឃុំបល្ល័ង្ក ខេត្តកំពង់ធំ និងសង្កាត់គោកចក ខេត្តសៀមរាប រងសម្ពាធតាមរយៈការគំរាមដកបណ្ណក្រីក្រ និងមិនដោះស្រាយបញ្ហាជូនជាដើម។
ទោះជាយ៉ាងណា លោកស្រី វ៉ា សារឿន មេឃុំកន្សោមអក បានបដិសេធចំពោះការចោទប្រកាន់ទាំងនេះ។ លោកស្រីថាតាមពិតកាលពីថ្ងៃទី ៣ មីនា ឆ្នាំ ២០២២ មានប្រជាពលរដ្ឋមួយចំនួនបានមកដាក់បណ្តឹងនៅសាលាឃុំ ដើម្បីឱ្យតំណាងគណបក្សកម្ពុជានិយមលុបឈ្មោះពួកគាត់ចេញពីបញ្ជីបេក្ខជនឈរឈ្មោះបោះឆ្នោតរបស់គណបក្សកម្ពុជានិយម។ បន្ទាប់ពីនោះលោកស្រីបានកោះហៅតំណាងគណបក្សកម្ពុជានិយម ឈ្មោះ ស៊ុំ ជុន ឱ្យមកឃុំ ដើម្បីសម្របសម្រួលជាមួយនឹងបេក្ខជនចំនួន ៦ នាក់។
លោកស្រីបន្តថា មុនការដាក់បញ្ជីបេក្ខជនទៅគណៈកម្មការរៀបចំការបោះឆ្នោតឃុំសង្កាត់ លោកស្រីបានហៅតាមទូរស័ព្ទទៅតំណាងគណបក្សកម្ពុជានិយមឈ្មោះ ស៊ុំ ជុន ឱ្យមកដោះស្រាយ ប៉ុន្តែគាត់មិនបានមក និងបានបដិសេធដកឈ្មោះប្រជាពលរដ្ឋដែលបានមកប្ដឹងនោះពីបេក្ខជនវិញទេ។ លុះដល់ថ្ងៃទី ៩ ខែមីនា ក៏មានឈ្មោះប្រជាពលរដ្ឋដែលបានប្តឹងនោះនៅក្នុងបញ្ជីបេក្ខជនឈរឈ្មោះបោះឆ្នោតដដែល។
បើតាម លោកស្រី វ៉ា សារឿន ប្រជាពលរដ្ឋដែលជាបេក្ខជនរបស់គណបក្សកម្ពុជានិយមបានមកឃុំ ដើម្បីប្តឹងតវ៉ាឱ្យលុបឈ្មោះចេញទៀត ប៉ុន្តែលោកស្រីថា នៅពេលដាក់បញ្ជីបេក្ខជនទៅគណៈកម្មការឃុំសង្កាត់រៀបចំការបោះឆ្នោតរួចហើយគឺគេជាអ្នកដោះស្រាយមិនមែនជាដែនសមត្ថកិច្ចរបស់លោកស្រីឡើយ។ ប៉ុន្តែអ្វីដែលលោកស្រីកោះហៅតំណាងគណបក្សកម្ពុជានិយមកាលពីថ្ងៃទី ៩ គឺដើម្បីឱ្យមកដោះស្រាយករណីមុនថ្ងៃទី ៤ ខែមីនា ឆ្នាំ ២០២២ ដែលប្រជាពលរដ្ឋបានប្តឹងតែប៉ុណ្ណោះ។
លោកស្រីថ្លែងថា៖ «ខ្ញុំគ្មានសិទ្ធិកោះអញ្ជើញតំណាងគណបក្សកម្ពុជានិយមទេ។ ខ្ញុំហៅគាត់មកដោះស្រាយកាលពីថ្ងៃទី ៣ ខែមីនា តែគាត់មិនមក ខ្ញុំចង់ឱ្យគាត់សម្របសម្រួលទល់មុខគ្នាជាមួយនឹងភាគីម្ខាងទៀត អ្នកដើមបណ្តឹង និងសម្របសម្រួលគ្នា។ ចំពោះការដកពាក្យវិញ គឺខ្ញុំគ្មានសិទ្ធិទេ មានតែសាមីខ្លួន និងតំណាងគណបក្សប៉ុណ្ណោះដែលមានសិទ្ធិ។
ពួកគេទៅចរចានៅ SEC ទៅ ខ្ញុំហៅគាត់មកហ្នឹងមានតែប៉ុណ្ណឹង។ ខ្ញុំគ្មានគំរាមកំហែងទេ ព្រោះជាពលរដ្ឋដូចតែគ្នាទេ»។
លោក ពុត គីម ប្រធានគណៈកម្មការឃុំសង្កាត់រៀបចំការបោះឆ្នោតនៃឃុំកន្សោមអកបានថ្លែងថា ក្នុងរយៈពេល ៣ ថ្ងៃនៃការប្តឹងតវ៉ា មានបេក្ខ-ជនឈរឈ្មោះរបស់គណបក្សកម្ពុជានិយមចំនួន ២ រូបបានមកប្តឹងឱ្យលុបឈ្មោះចេញពីបញ្ជីបេក្ខជន ប៉ុន្តែលោកមិនមានសិទ្ធិនោះទេ គ្រាន់តែបានណែនាំឱ្យពលរដ្ឋទាំង ២ នាក់នោះទៅជួបតំណាងគណបក្ស ដើម្បីដោះស្រាយ រីឯខាងរូបលោកគឺមានសិទ្ធិត្រឹមតែទទួលទេ។
លោកបន្តថា លុះដល់បាត់ ១ ថ្ងៃមិនឃើញបេក្ខជន ២ នោះត្រឡប់មកវិញ លោកក៏ហៅទូរស័ព្ទទៅតំណាងគណបក្សកម្ពុជានិយមពីករណីបេក្ខជន ២ រូបប្តឹងឱ្យដកឈ្មោះចេញពីបញ្ជីបេក្ខជនបោះឆ្នោត ប៉ុន្តែតំណាងគណបក្សរូបនោះមិនបានទទួលដំណឹងនេះទេ។ ជាមួយគ្នានេះ លោកស្រី វ៉ា សារឿន មេឃុំកន្សោមអក ក៏បានទូរស័ព្ទសួរនាំពីបញ្ហានេះ និងស្នើឱ្យលោកដោះស្រាយ ប៉ុន្តែលោកមិនអាចដោះស្រាយបានទេ ព្រោះពួកគេមិនបានជួបលោកដោះស្រាយទេ។
លោកបញ្ជាក់ទៀតថា ដោយមិនអស់ចិត្ត លោកក៏បានហៅបេក្ខជន ២ នាក់ ដែលបានមកប្តឹងនោះ ប៉ុន្តែលើកនេះ មិនមែនមកតែ ២ នាក់ទេ គឺមករហូតដល់ ៥ នាក់ឯណោះ។
ក្រោយសាកសួរ ទាំងតំណាងគណបក្សកម្ពុជានិយម និងបេក្ខជនទាំងអស់ចប់សព្វគ្រប់ ពួកគេបានឯកភាពថា មិនដកឈ្មោះចេញនោះទេ។
លោកបានបញ្ជាក់ថា៖ «ឥឡូវគេចង់រក្សាឈ្មោះហ្នឹងវិញ ចំពោះមេឃុំហៅពួកគាត់ ទៅជួបអី ខ្ញុំអត់បានដឹងទេ គាត់តេសួរខ្ញុំដែរ ខ្ញុំថា ខាងឃុំផ្សេង ខ្ញុំអត់លូកដៃទេ ខ្ញុំធ្វើតែតាម គជប ប៉ុណ្ណោះ ហើយធ្វើទៅតាមជំហានមួយៗ»។
លោក សោម សូរីដា អ្នកនាំពាក្យគណៈកម្មាធិការជាតិរៀបចំការបោះឆ្នោត (គជប) ថ្លែងថា ចំពោះករណីខាងលើនេះមិនគួរកើតមាននោះទេ ព្រោះវាមិនមែនជាសមត្ថកិច្ចរបស់មេឃុំ ឬចៅសង្កាត់ ក្នុងការអញ្ជើញ ឬហៅបេក្ខជនឱ្យមកដោះស្រាយលើបញ្ហានេះ៕
