បន្ទាយមានជ័យៈ នគរបាលនៃនាយកដ្ឋានព្រហ្មទណ្ឌក្រសួងមហាផ្ទៃ និងនគរបាលព្រហ្មទណ្ឌខេត្តបន្ទាយមានជ័យសហការជាមួយអង្គភាពការពារកុមារ CPU របស់ប្រទេសអូស្ត្រាលីនៅថ្ងៃទី ១០ មីនា កំពុងបើកការស្រាវជ្រាវជុំវិញអំពើឃាតកម្មលើក្មេងស្រីម្នាក់អាយុ ៨ ឆ្នាំដែលត្រូវសម្លាប់ហើយត្រូវគេប្រទះឃើញកាលពីថ្ងៃទី ៩ មីនានៅក្នុងដីឡូត៍មួយកន្លែងក្នុងសង្កាត់-ក្រុង ប៉ោយប៉ែត ខេត្តបន្ទាយមានជ័យ។
លោក នូ ជីវ័ន្ត ស្នងការរងទទួលផែនការងារនគរបាលព្រហ្មទណ្ឌ ខេត្តបន្ទាយមានជ័យឱ្យដឹងនៅថ្ងៃទី ១០ មីនាថា ក្មេងស្រីរងគ្រោះឈ្មោះ ល. ល. អាយុ ៨ ឆ្នាំជាសិស្សរៀនថ្នាក់ទី ២ នៃសាលាបឋមសិក្សាទំនប់ក ៥ ក្នុងសង្កាត់-ក្រុង ប៉ោយប៉ែត។ ក្មេងរងគ្រោះត្រូវបានគេសម្លាប់តែមិនមែនជាអំពើរំលោភសេពសន្ថវៈទេ។
លោកថ្លែងថា៖ «ករណីនេះជាអំពើឃាតកម្មមិនមែនអំពើរំលោភសេពសន្ថវៈទេ។ សមត្ថកិច្ចរបស់យើងកំពុងតែបង្កើតគណៈកម្មការ ដើម្បីធ្វើរឿងនេះ។ យើងមានខាងនាយកដ្ឋានព្រហ្មទណ្ឌចុះមក និងខាងអង្គភាពការពារកុមារ CPU ដែរ»។
លោកស្នងការរង នូ ជីវ័ន្ត មិនបានប្រាប់លម្អិតជុំវិញហេតុការណ៍នេះទេ ប៉ុន្តែបើតាមមន្ត្រីនគរបាលក្រុងប៉ោយប៉ែត ១ រូបស្នើសុំមិនឱ្យបញ្ចេញឈ្មោះបានប្រាប់ភ្នំពេញប៉ុស្តិ៍នៅថ្ងៃទី ១០ មីនាថា តាមសម្តីរបស់ម្តាយក្មេងស្រីរងគ្រោះថា ក្មេងស្រីរងគ្រោះមានបងប្អូន ២ នាក់ហើយនាងជាកូនច្បងរៀននៅថ្នាក់ទី ២ នៃ សាលាបឋមសិក្សាទំនប់ក ៥ ក្នុងសង្កាត់-ក្រុង ប៉ោយប៉ែត ខេត្តបន្ទាយមានជ័យ។ កាលពីព្រឹកថ្ងៃទី ៩ មីនា ឆ្នាំ ២០២២ ក្មេងរងគ្រោះបានចេញពីផ្ទះទៅសាលារៀនដូចសព្វមួយដង ប៉ុន្តែពេលថ្ងៃត្រង់ម្តាយមិនឃើញក្មេងរងគ្រោះមកផ្ទះក៏សួរលោកគ្រូនៅថ្នាក់រៀនរបស់នាងហើយត្រូវបានលោកគ្រូរូបនោះប្រាប់ម្តាយក្មេងរងគ្រោះថា នៅថ្ងៃទី ៩ មីនា គាត់មិនបានឃើញក្មេងរងគ្រោះចូលថ្នាក់រៀនទេ។ ដោយមានការបញ្ជាក់ប្រាប់ពីខាងសាលារៀនបែបនេះ ម្តាយក្មេងស្រីរងគ្រោះ និងសាច់ញាតិនាំគ្នាដើររកតែមិនឃើញ។ លុះរហូតដល់យប់ថ្ងៃទី ៩ មីនាស្រាប់តែមានបុរសម្នាក់ប្រទះឃើញសពក្មេងរងគ្រោះត្រូវបានគេកប់ដីជម្រៅរាក់ៗចេញដងខ្លួនមកក្រៅនៅក្នុងដីឡូត៍ ១ កន្លែងឆ្ងាយពីផ្ទះប្រមាណជាង ១០០ ម៉ែត្រស្ថិតក្នុងភូមិទំនប់ក ៥។ ដំណឹងនេះបានដឹងដល់ឪពុកម្តាយរបស់ក្មេងរងគ្រោះហើយបានរាយការណ៍ទៅនគរបាលមូលដ្ឋាន។
មន្ត្រីនគរបាលរូបនោះថា៖ «ខាងនគរបាលជំនាញបានធ្វើកោសល្យវិច័យលើសពក្មេងរងគ្រោះ ប៉ុន្តែសមត្ថកិច្ចមិនបានរកឃើញថា ជាអំពើរំលោភសេពសន្ថវៈឡើយព្រោះនៅប្រដាប់ភេទក្មេងគ្មានអ្វីប៉ះពាល់ទេ។ សមត្ថកិច្ចបានដាក់ការសន្និដ្ឋាន បឋមថា រឿងនេះជាអំពើឃាតកម្ម»៕
វីដេអូ៖