សិប្បកម្មកាត់ដេរខោអាវមួយកន្លែង ស្ថិតនៅខណ្ឌពោធិ៍សែនជ័យរាជធានីភ្នំពេញ ត្រូវបានអគ្គិភ័យឆាបឆេះ ដោយសារធ្លាយហ្គាស នៅព្រឹកថ្ងៃសៅរ៍នេះ ដោយបានបំផ្លាញសម្ភារអស់មួយចំនួន ប៉ុន្តែមិនបង្កគ្រោះថ្នាក់ដល់មនុស្សនោះទេ។
អគ្គស្នងការដ្ឋាននគរបាលជាតិបានឱ្យដឹងថា ហេតុការណ៍នេះបានកើតឡើង នៅវេលា ម៉ោង ៧ និង ៣០ នាទី ព្រឹកថ្ងៃទី ១២ ខែមីនានេះស្ថិតនៅចំណុចសិប្បកម្មកាត់ដេរខោអាវក្នុងភូមិថ្មគោល ១ សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ។
លោកវរសេនីយ៍ឯក ព្រហ្ម យ៉ន នាយការិយាល័យ ប្រាប់ឱ្យដឹងថា ក្រោយពីទទួលបានព័ត៌មានពីប្រជាពលរដ្ឋភ្លាម លោកក៏បានបញ្ជាទៅកម្លាំងសមត្ថកិច្ចជំនាញពន្លត់អគ្គិភ័យ ដែលប្រចាំការនៅទីតាំងសាលាខណ្ឌពោធិ៍សែនជ័យ ដើម្បីចេញរថយន្តពន្លត់អគ្គិភ័យជួយអន្តរាគមន៍។
លោកឱ្យដឹងថា នៅក្នុងរង្វង់ប្រតិបត្តិការអន្តរាគមន៍ជួយសង្គ្រោះនេះ គឺកម្លាំងជំនាញបានប្រើប្រាស់រថយន្តពន្លត់អគ្គិភ័យរបស់ការិយាល័យចំនួន ៣ គ្រឿង ប្រើប្រាស់ទឹកអស់ ៣ ឡាន ស្មើនឹង ១២ ម៉ែត្រគុប ទើបរលត់ទាំងស្រុង។
លោកបានបញ្ជាក់ថា ចំពោះអគ្គិភ័យខាងលើនេះបានឆេះបំផ្លាញអគារសិប្បកម្មថ្មប្រក់សង្ក័សី ដែលមានទំហំ ៦ គុណ ១៦ ម៉ែត្រ និងបណ្តាលឱ្យឆេះខូចខាតសម្ភារ រួមមាន ម៉ាស៊ីនដេរចំនួន ១០ គ្រឿង ទូរទស្សន៍ ១ គ្រឿង ទូទឹកកក ១ គ្រឿង ធុងហ្គាស ១ ធុង ក្រណាត់មួយចំនួន និងពុំបណ្តាលឱ្យឆេះរាលដាលដល់ផ្ទះអ្នកជិតខាងឡើយ។
យ៉ាងណាមិញ លោក ព្រហ្ម យ៉ន ឱ្យដឹងថា សម្រាប់ប្រតិបត្តិការនេះ គឺសមត្ថកិច្ចជំនាញបានធ្វើការគ្រប់គ្រង់បាននៅវេលាម៉ោង ៨ ព្រឹកនៅថ្ងៃដដែល ហើយមិនបានបណ្តាលឱ្យមនុស្សរងរបួសឡើយ៕