.jpg)
ជនសង្ស័យដែលជាព្រះរាជអាជ្ញារងក្នុងករណីអំពើហិង្សាក្នុងគ្រួសារ។ រូបថត FN
ភ្នំពេញៈ កម្លាំងសមត្ថកិច្ចនៃអធិការដ្ឋាននគរបាលខណ្ឌទួលគោក បានបើកការស៊ើបអង្កេត លើករណីប្រើប្រាស់អំពើហិង្សាក្នុងគ្រួសារមួយ កាលពីយប់ថ្ងៃទី ១២ ខែ មីនា ឆ្នាំ ២០២២ ស្ថិតនៅចំណុចផ្លូវ ១៥០ ផ្ទះ ៨៩ សង្កាត់ទឹកល្អក់ទី២ ខណ្ឌទួលគោក។
លោក សុខ ហេង អធិការខណ្ឌទួលគោកបានប្រាប់ ភ្នំពេញ ប៉ុស្តិ៍ថា យោងតាមរបាយការណ៍នៃពាក្យបណ្ដឹងរបស់ស្ត្រីរងគ្រោះឈ្មោះ ហេង មួយគា ជនបង្កអំពើហិង្សាក្នុងគ្រួសារ គឺជាស្វាមីរបស់គាត់ឈ្មោះ ម៉ុត ដារ៉ា មានតួនាទីជាព្រះរាជអាជ្ញារង អមសាលាដំបូងរាជធានីភ្នំពេញ។ នៅក្នុងបណ្ដឹងនោះ ស្ត្រីរងគ្រោះបានរៀបរាប់ថា ប្ដីរបស់គាត់បានប្រើហិង្សាវាយមកលើគាត់ និងឈ្នួលបម្រើស្រីនៅក្នុងផ្ទះ ព្រមទាំងបានយកកាំភ្លើងភ្ជង់គំរាមបាញ់ប្រហារពួកគាត់ថែមទៀត។
លោកបានបញ្ជាក់ថា៖ «ករណីនេះ សមត្ថកិច្ចយើងកំពុងបើកការស៊ើបអង្កេតស្រាវជ្រាវទៅតាមនីតិវិធីច្បាប់»។
កាលពីយប់ថ្ងៃទី ១២ ខែមីនា អ្នកស្រី ហេង មួយគា បានប្រាប់អ្នកសារព័ត៌មានថា មុនពេលបុរសជាប្ដី ឈ្មោះ ម៉ុត ដារ៉ា ប្រើហិង្សាមកលើគាត់ និងអ្នកបម្រើនៅក្នុងផ្ទះនោះ បុរសជាប្ដីបានបិទកាមេរ៉ាសុវត្ថិភាពដែលនៅក្នុងផ្ទះ ហើយរករឿងចោទប្រកាន់គាត់ថា បានលួចលុយ។ បន្ទាប់ពីគាត់ប្រកែកថា មិនបានលួច បុរសជាប្ដីបានខឹងសម្បាយ៉ាងខ្លាំង ហើយក៏បានប្រើហិង្សាវាយមកលើគាត់ ព្រមទាំងយកកាំភ្លើងខ្លីមកភ្ជង់គំរាមបាញ់សម្លាប់ចោលថែមទៀត។
អ្នកស្រី មួយគា បានបញ្ជាក់ថា៖ «នៅពេលនោះខ្ញុំភ័យតក់ស្លុតខ្លាំងណាស់ ហើយក៏ស្រែកហៅអ្នកបម្រើនៅក្នុងផ្ទះមកជួយ ប៉ុន្តែនៅពេលអ្នកបម្រើស្រីម្នាក់មកដល់ ប្ដីរបស់ខ្ញុំ ក៏បានវាយនាង និងយកកាំភ្លើងភ្ជង់នាងថែមទៀត។ បន្ទាប់មកគាត់ក៏រុញនាងចូលទៅក្នុងបន្ទប់ ហើយចាក់សោពីខាងក្រៅជាប់»។
អ្នកស្រីបានបន្តថា ដោយឃើញសភាពការណ៍មិនស្រួលយ៉ាងដូច្នេះ គាត់ក៏បានសម្រេចចិត្តទូរស័ព្ទ ហៅឪពុកម្ដាយរបស់គាត់នៅខេត្តកំពង់ឆ្នាំងឱ្យមកជួយសម្របសម្រួលដំណោះស្រាយ។ អ្នកស្រីបានឱ្យដឹងផងដែរថា អ្នកស្រីបានរៀបការរស់នៅជាមួយបុរសជាប្ដី អស់រយៈពេល ១៣ ឆ្នាំមកហើយ និងមានកូន ៣ នាក់ ប្រុស ១ ស្រី ២ ជាចំណងអាពាហ៍ពិពាហ៍របស់ពួកគាត់។ ដោយក្ដីបារម្ភពីសុវត្ថិ-ភាពរបស់កូនស្រី ឪពុកម្ដាយរបស់គាត់ ក៏បានបើករថយន្តមកភ្នំពេញទាំងយប់។
នៅពេលមកដល់ ស្ត្រីជាម្ដាយរបស់អ្នកស្រី ហេង មួយគា បានប្រាប់អ្នកសារព័ត៌មានថា៖ «កូនស្រីខ្ញុំបានរងការវាយធ្វើបាបពីប្ដីនាងឈ្មោះ ម៉ុត ដារ៉ា ព្រះរាជអាជ្ញារងអមសាលាដំបូងរាជធានីភ្នំពេញ មិនមែនតែថ្ងៃនេះទេ គឺច្រើនដងរាប់ភ្លេចទៅហើយ។ ប៉ុន្តែលើកនេះ គឺធ្ងន់ធ្ងរណាស់ ដោយបានប្រើកាំភ្លើងភ្ជង់គំរាមសម្លាប់កូនស្រីខ្ញុំទៀត ដែលករណីនេះ មិនអាចអត់ទ្រាំបានតទៅទៀតទេ គឺចាំបាច់ត្រូវប្ដឹងសមត្ថកិច្ច ដើម្បីមានវិធានការទៅតាមផ្លូវច្បាប់»។ ទោះយ៉ាងណាក៏ដោយ កាលពីថ្ងៃទី ១៣ ខែ មីនា ឆ្នាំ ២០២២ ភ្នំពេញ ប៉ុស្តិ៍ បានព្យាយាមទាក់ទង ដើម្បីស្វែងរកការបំភ្លឺ ពីលោក ម៉ុត ដារ៉ា ជុំវិញការចោទប្រកាន់នេះ ប៉ុន្តែទូរស័ព្ទមិនចូល៕
វីដេអូ៖
