.jpg)
ឱសថព្យាបាលជំងឺកូវីដ ១៩ ដែលក្រសួងប្រៃសណីយ៍នឹងបញ្ចុះថ្លៃចាប់ពីថ្ងៃទី ១៤ មីនាតទៅ។ រូបថត ហ្វេសប៊ុក
ភ្នំពេញៈ ចាប់ពីថ្ងៃចន្ទ ទី ១៤ ខែមីនា នេះតទៅ ក្រសួងប្រៃសណីយ៍ និងទូរគមនាគមន៍ នឹងបញ្ចុះតម្លៃចែកចាយឱសថព្យាបាលជំងឺកូវីដ ១៩ MOLNATRIS (Molnupiravir Capsules 200mg) ពី ៥៥ ដុល្លារមកនៅត្រឹម ៥០ ដុល្លារ ក្នុង ១ ដូស ខណៈក្រសួងព្រមានចាត់វិធានការចំពោះអ្នកលក់ដែលលក់បន្តឱសថនេះ លើសតម្លៃកំណត់។
ជាមួយគ្នានោះដែរ លោកនាយករដ្ឋមន្ត្រី ហ៊ុន សែន ក៏បានសម្រេចឱ្យមានការផលិតឱសថនេះ ដើម្បីសម្រាលសម្រួលដល់ចរាចរណ៍ឱសថផង និងក៏ដូចជាធ្វើឱ្យឱសថនេះមានវត្តមាននៅក្នុងប្រទេសកម្ពុជាបានទូលំទូលាយផងដែរ។
ក្រសួងប្រៃសណីយ៍ និងទូរគមនាគមន៍ បញ្ជាក់នៅក្នុងសេចក្តីជូនដំណឹងដែលផ្សព្វផ្សាយនៅថ្ងៃទី ១២ ខែមីនាថា កន្លងមកក្រសួងបាននាំចូលឱសថ Molnatris (Molnupiravir Capsules 200mg) ដើម្បីចែកចាយបន្តក្នុងតម្លៃ ៥៥ ដុល្លារ ក្នុង ១ ដូសសម្រាប់ព្យាបាលជំងឺកូវីដ ១៩ ចាប់ពីកម្រិតស្រាលទៅមធ្យមចំពោះមនុស្សពេញវ័យ។
សេចក្តីជូនដំណឹងបញ្ជាក់ថា៖ «ដើម្បីឆ្លើយតបទៅនឹងតម្រូវការឱសថនេះ និងចូលរួមលើកកម្ពស់សុខុមាលភាព និងជីវភាពប្រជាពលរដ្ឋរាជរដ្ឋាភិបាលបានផ្តល់ថវិកាបដិភាគ។ ដូចនេះ ក្រុមការងារនឹងចែកចាយឱសថ ម៉ូលណាទ្រីស ក្នុងតម្លៃ ៥០ ដុល្លារអាមេរិក ក្នុង ១ ដូសចាប់ពីថ្ងៃចន្ទ ទី ១៤ ខែ មីនា ឆ្នាំ ២០២២ នេះតទៅជូនមន្ទីរពេទ្យឯកជន គ្លីនិក ឱសថស្ថាន ឱសថស្ថានរង និងសាធារណជន»។
ក្រសួងបានឱ្យដឹងទៀតថា បុគ្គលម្នាក់មានសិទ្ធិបញ្ជាទិញពី ១ ដល់ ១០ ដូស ខណៈមន្ទីរពេទ្យឯកជន គ្លីនិក ឱសថស្ថាន និងឱសថស្ថានរង មានសិទ្ធិបញ្ជាទិញពី ១០ ដល់ ១០០ ដូស ហើយអាចលក់បន្តមិនលើសពី ៦០ ដុល្លារ ក្នុង ១ ដូស។ អ្នកបញ្ជាទិញ អាចបញ្ជាទិញសាជាថ្មីយ៉ាងតិច ១ សប្តាហ៍ ក្រោយបញ្ជាទិញលើកចុងក្រោយ នៅទីស្តីការក្រសួងប្រៃសណីយ៍ និងទូរគមនាគមន៍ និងសាខាប្រៃសណីយ៍នៅតាមខេត្ត។ ក្រសួងប្រៃសណីយ៍ និងទូរគមនាគមន៍ បានបញ្ជាក់ថា៖ «ករណីមន្ទីរពេទ្យឯកជន គ្លីនិក ឱសថស្ថាន ឱសថស្ថានរង ឬអ្នកលក់យកទៅលក់បន្តលើសពីតម្លៃកំណត់ខាងលើ ក្រុមការងារនឹងសហការជាមួយអាជ្ញាធរមានសមត្ថកិច្ច ដើម្បីចាត់វិធានការ តាមនីតិវិធីជាធរមាន»។
ទន្ទឹមនឹងនេះដែរ នាយករដ្ឋមន្ត្រីបានអនុញ្ញាតឱ្យរោងចក្រក្នុងស្រុកមានសិទ្ធិផលិតឱសថសម្រាប់ព្យាបាលជំងឺកូវីដ ១៩ ប្រភេទម៉ូលនូពីរ៉ាវា (Molnupiravir) នៅក្នុងស្រុកដើម្បីសម្រួលដល់ចរាចរណ៍នៃឱសថនេះ និងឱ្យឱសថនេះមានវត្តមានទូលំទូលាយនៅក្នុងប្រទេសកម្ពុជា។
រដ្ឋលេខាធិការក្រសួងសុខាភិបាល លោកស្រី ឱ វណ្ណឌីន បានថ្លែងប្រាប់អ្នកសារព័ត៌មានដូចនេះ ក្នុងពិធីប្រគល់ទទួលរថយន្តដឹកវ៉ាក់សាំងចំនួន ២០ គ្រឿង ទៅដល់មន្ទីរសុខាភិបាលរាជធានី-ខេត្ត កាលពីថ្ងៃទី ១០ ខែ មីនា ឆ្នាំ ២០២២ កន្លងទៅ។
ជាមួយគ្នានេះ លោកស្រីបានឱ្យដឹងថា ប្រភេទឱសថម៉ូលនូពីរ៉ាវានេះ ទទួលបានការសម្រេចអនុញ្ញាតដ៏ខ្ពង់ខ្ពស់ពីលោក ហ៊ុន សែន ឱ្យរោងចក្រនៅក្នុងប្រទេសកម្ពុជា មានសិទ្ធិផលិតឱសថនេះ ដើម្បីសម្រាលសម្រួលដល់ការចរាចរណ៍ឱសថផង និងក៏ដូចជាធ្វើឱ្យឱសថនេះ មានវត្តមាននៅក្នុងប្រទេសកម្ពុជា យើងបានទូលំទូលាយផងដែរ។
លោកស្រី ឱ វណ្ណឌីន បានមានប្រសាសន៍ថា៖ «គោលបំណងទី២ គឺក្នុងទិសដៅមួយឱ្យតម្លៃនៃឱសថនេះ មានការធ្លាក់ចុះមួយកម្រិតផងដែរ។ អ៊ីចឹង! បច្ចុប្បន្ននេះ មិនត្រឹមតែមានការផលិតក្នុងស្រុកទេដែលក្រសួងសុខាភិបាល មានការសម្រេចពីសម្តេចតេជោរួចហើយ យើងក៏មានការផ្តល់នូវបញ្ជិកាដល់ឱសថមួយចំនួនទៀតដែលនាំចូលមកពីប្រទេសក្រៅ ដែលបងប្អូនយើងអាចរកបាននៅលើទីផ្សារតាមឱសថស្ថាននានា ដែលមានច្បាប់អនុញ្ញាតត្រឹមត្រូវផងដែរ»។
លោកស្រីបានធ្វើការបញ្ជាក់ទៅដល់ប្រជាពលរដ្ឋទាំងអស់ កុំឱ្យមានការព្រួយបារម្ភពីការខ្វះឱសថប្រភេទម៉ូលនូពីរ៉ាវានេះ ហើយប្រសិនបើមិនមានឱសថនេះ ក៏មានឱសថផ្សេងទៀតផងដែរ ពិសេសឱសថបុរាណចិនក៏នៅតែមានប្រសិទ្ធភាពក្នុងការព្យាបាលជំងឺកូវីដ ១៩ ដូចគ្នាដែរ។
លោកស្រី ឱ វណ្ណឌីន មានប្រសាសន៍ថា៖ «យើងបានផលិតរួចហើយ នូវឱសថនេះ និងក៏បានចរាចរណ៍រួចហើយដែរ ហើយយើងក៏មានគម្រោងនាំចេញទៅលក់នៅប្រទេសក្រៅផងដែរ»៕
វីដេអូ៖
