.jpg)
ម៉ូតូច្នៃបំពង់ស៊ីម៉ាំងពេលសមត្ថកិច្ចឱ្យកែឡើងវិញកាលពីថ្ងៃ ១២ មីនា។ រូបថត ប៉ូលិស
បាត់ដំបង/កំពង់ឆ្នាំងៈ នគរបាលក្នុងខេត្តបាត់ដំបង និងកំពង់ឆ្នាំងកំពុងបន្តអនុវត្តវិធានការផាកពិន័យ និងផ្សព្វផ្សាយអប់រំដល់ក្រុមប្រើម៉ូតូកែច្នៃបំពង់ស៊ីម៉ាំងសំឡេង ឮខ្លាំង ស្របពេលសកម្មភាពនេះបានស្ងប់ស្ងាត់ បន្ទាប់ពីសមត្ថកិច្ចខេត្តទាំង ២ នេះ បានផាកពិន័យម្ចាស់ម៉ូតូជាបន្តបន្ទាប់ ខណៈនៅខណ្ឌដូនពេញរាជធានីភ្នំពេញទើបឃាត់ម៉ូតូច្នៃបាន ៥ គ្រឿងកាលពីថ្ងៃទី ១២ មីនា។
លោកឧត្តមសេនីយ៍ត្រី អ៊ៀរ ប៊ុនធឿន ស្នងការរង និងជាអ្នកនាំពាក្យនៃស្នងការដ្ឋាននគរបាលខេត្តកំពង់ឆ្នាំងឱ្យដឹងនៅថ្ងៃទី ១៤ មីនាថា ករណីក្មេងទំនើងប្រើប្រាស់ម៉ូតូកែច្នៃបំពង់ស៊ីម៉ាំង ឮនេះ បច្ចុប្បន្នហាក់មិនសូវមានប៉ុន្មានទេ នៅតាមស្រុកទូទាំងខេត្តកំពង់ឆ្នាំង។ ប៉ុន្តែបើមានក៏ត្រូវសមត្ថកិច្ចនគរបាលនៅគ្រប់ប៉ុស្តិ៍ក្នុងស្រុកនីមួយៗចាប់ផាកពិន័យដែរ។
លោកបន្តថា ការងារនេះ មិនត្រឹមតែសមត្ថកិច្ចមានចំណាត់ការទៅលើម៉ូតូកែច្នៃបំពង់ស៊ីម៉ាំងសំឡេងឮទេ សូម្បីតែរថយន្តដែលបំពាក់ភ្លើងខុសបច្ចេកទេស ក៏ត្រូវសមត្ថកិច្ចជំនាញផ្នែកចរាចរណ៍ផ្លូវគោកខេត្តកំពង់ឆ្នាំងចាប់ផាកពិន័យដែរ។ នៅឆ្នាំ ២០២១ កន្លងមក សមត្ថកិច្ចខេត្តអនុវត្តស្ទើរតែអស់នូវម៉ូតូកែច្នៃបំពង់ស៊ីម៉ាំង ខណៈបច្ចុប្បន្ន សមត្ថកិច្ចជំនាញបានចុះតាមគោលដៅត្រួតពិនិត្យអាវុធជាតិផ្ទុះជារៀងរាល់យប់ តាមបទបញ្ជាពីលោក ខូវ លី ស្នងការនគរបាលខេត្ត។
លោក ប៊ុនធឿន ថ្លែងថា៖ «នៅខេត្តកំពង់ឆ្នាំង ឥឡូវហាក់គ្មានម៉ូតូកែច្នៃបំពង់ស៊ីម៉ាំងទៀតទេ។ ការងារនេះដោយសារយើងបានផ្សព្វផ្សាយអប់រំស្តីពីច្បាប់ចរាចរណ៍ដល់អ្នកបំពានច្បាប់ស្របពេលគ្នានេះយើងក៏ផាកពិន័យតាមច្បាប់ដែរ។ យើងឃើញថាប្រជាពលរដ្ឋលោកយល់ដឹងច្រើន»។
លោកបញ្ជាក់ថា សមត្ថកិច្ចជំនាញចរាចរណ៍តែងតែអប់រំដល់បុគ្គលប្រព្រឹត្តល្មើសច្បាប់ ហើយបើថ្ងៃក្រោយបុគ្គលនោះនៅតែមិនព្រមស្ដាប់តាមការណែនាំទៀតនោះគឺសមត្ថកិច្ចនឹងដោះបំពង់ស៊ីម៉ាំងម៉ូតូនោះរក្សាទុកតែម្តង។ ចំពោះម៉ូតូកែច្នៃបំពង់ស៊ីម៉ាំងសំឡេងឮនេះ មិនមានច្រើនទេនៅក្នុងខេត្តកំពង់ឆ្នាំង តែច្រើនមានរថយន្តបំពាក់ភ្លើងខុសលក្ខណៈបច្ចេកទេសទៅវិញ។
ដោយឡែក លោក ចាន់ សុធី នាយការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តបាត់ដំបងបានប្រាប់នៅថ្ងៃទី ១៤ មីនាថា ករណីម៉ូតូកែច្នៃបំពង់ស៊ីម៉ាំងនេះ ហាក់ដូចមិនឃើញមានទៀតទេ នៅក្នុងខេត្តបាត់ដំបង ជាពិសេសគឺនៅក្នុងក្រុងបាត់ដំបងតែម្តង។ តែបើមានក៏មិនអាចគេចផុតពីសមត្ថកិច្ចជំនាញចរាចរណ៍របស់លោកឡើយ។ តែទោះយ៉ាងណាក៏នៅតែមិនទាន់អស់ដែរ។
លោកថ្លែងថា៖ «កាលណាយើងកំពុងត្រួតពិនិត្យតាមគោលដៅក្នុងក្រុងបាត់ដំបង ហើយបើជួបអ្នកប្រើម៉ូតូកែច្នៃបំពង់ស៊ីម៉ាំង យើងនឹងហៅគាត់ទៅអប់រំ និងផាកពិន័យតាមអនុក្រឹត្យស្តីពីការពិន័យអន្តរការណ៍គឺ ១០ ម៉ឺនរៀលម៉ូតូ ១ គ្រឿងតាមមាត្រា ៦ នៃច្បាប់ចរាចរណ៍ផ្លូវគោក»។
ទាក់ទងនឹងករណីនេះដែរ កាលពីថ្ងៃទី ១២ មីនា នគរបាលជំនាញចរាចរណ៍ខណ្ឌដូនពេញ រាជធានីភ្នំពេញបានឃាត់ម៉ូតូកែច្នៃបំពង់ស៊ីម៉ាំងបានចំនួន ៥ គ្រឿងយកមកផាកពិន័យ និងអប់រំមុនពេលអនុញ្ញាតឱ្យវិលត្រឡប់ទៅវិញ។ នេះបើតាមលោក ទៀង ច័ន្ទសារ អធិការនគរបាលខណ្ឌដូនពេញប្រាប់នៅថ្ងៃទី ១៤ មីនា។
លោកបានថ្លែងថា ការឃាត់ម៉ូតូនេះគឺសមត្ថកិច្ចមានបំណងឱ្យម្ចាស់ម៉ូតូធ្វើការបំពាក់បំពង់ស៊ីម៉ាំងដូចដើមវិញ និងធ្វើការណែនាំដល់ម្ចាស់ម៉ូតូឱ្យមានការយល់ដឹងពីច្បាប់ចរាចរណ៍ប៉ុណ្ណោះ។
លោកបានបញ្ជាក់ថា៖ «នេះជាវិធានការរបស់អាជ្ញាធរមានសមត្ថកិច្ច អ៊ីចឹង ហើយបើពលរដ្ឋគាត់បានធ្វើខុសដែលជាបទល្មើសលហុគឺសមត្ថកិច្ចធ្វើការអប់រំណែនាំដល់ពួកគាត់ហើយពួកគាត់យល់នៅចំពោះមុខអាជ្ញាធរមានសមត្ថកិច្ច។ យើងតម្រូវឱ្យគាត់ប្តូរពីបំពង់ស៊ីម៉ាំងកែច្នៃមកបំពង់ស៊ីម៉ាំងដើមវិញ»៕
