.jpg)
កិច្ចប្រជុំរបស់មន្ត្រីពាក់ព័ន្ធតាមប្រព័ន្ធអនឡាញនៅថ្ងៃទី ១៤ មីនា។ រូបថត ហ្វេសប៊ុក
ភ្នំពេញៈ ក្រសួងមហាផ្ទៃបើកកិច្ចប្រជុំក្រើនរំឭកដល់បណ្តារាជធានី-ខេត្តនៅទូទាំងប្រទេសឱ្យបង្កលក្ខណៈងាយស្រួលដល់គ្រប់គណបក្សនយោបាយដែលបានចុះបញ្ជីតាមការណែនាំពីលោក ស ខេង ឧបនាយករដ្ឋមន្ត្រី ក្រោយពីឃើញមានភាពមិនប្រក្រតីកើតឡើងក្នុងរាជធានីខេត្តមួយចំនួន។
កិច្ចប្រជុំស្តីពីការបង្កលក្ខណៈងាយស្រួលដល់គ្រប់គណបក្សនយោបាយដែលបានចុះបញ្ជីនៅក្រសួងមហាផ្ទៃនេះត្រូវបានធ្វើឡើងនៅថ្ងៃទី ១៤ ខែមីនា ឆ្នាំ ២០២២ តាមប្រព័ន្ធវីដេអូ Zoom ដឹកនាំដោយ លោក ប៊ុន ហុន រដ្ឋលេខាធិការ ក្រសួងមហាផ្ទៃ និងមានការចូលរួមពីថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានរដ្ឋបាលក្រសួងមហាផ្ទៃ,អភិបាលរងរាជធានីខេត្ត និងនាយកទីចាត់ការអន្តរវិស័យរាជធានី ខេត្ត សរុបប្រមាណ ៦០ រូប។
ក្រោយកិច្ចប្រជុំនេះ លោក ឈឹម កាន អគ្គនាយករងនៃអគ្គនាយកដ្ឋានរដ្ឋបាលក្រសួងមហាផ្ទៃប្រាប់ភ្នំពេញ-ប៉ុស្តិ៍ថា កិច្ចប្រជុំនេះបានធ្វើឡើងដើម្បីសម្របសម្រួលជាមួយអាជ្ញាធររាជធានីខេត្ត និងសមត្ថកិច្ចពាក់ព័ន្ធថ្នាក់ក្រោមជាតិ ដើម្បីបង្កលក្ខណៈងាយស្រួលដល់គ្រប់គណបក្សនយោបាយដែលបានចុះបញ្ជីធ្វើសកម្មភាពបោះឆ្នោតជ្រើសរើសក្រុមប្រឹក្សាឃុំ សង្កាត់នៅឆ្នាំនេះ និងបោះឆ្នោតជ្រើសរើសតំណាងរាស្ត្រនៅឆ្នាំក្រោយ។
លោកថ្លែងថា៖ «គោលដៅរបស់យើងគឺឱ្យគាត់យកចិត្តទុកដាក់ក្នុងការអនុញ្ញាតឱ្យគណបក្សធ្វើសកម្មភាព នយោបាយស្របតាមច្បាប់លិខិតបទដ្ឋាន និងការណែនាំរបស់ក្រសួងមហាផ្ទៃទាំងអស់ដែលមានសេចក្តីណែនាំរបស់សម្តេចក្រហោមជាដើម។ ជារួមយើងរំឭកខេត្តថែមទៀត»។
បើតាមលោក ឈឹម កាន ដោយមើលឃើញពីការមិនយកចិត្តទុកដាក់ពីអាជ្ញាធរថ្នាក់ក្រោមជាតិមួយចំនួនលើសេចក្តីណែនាំរបស់លោក ស ខេង ទើបមានកិច្ចប្រជុំរំឭកបន្ថែម ដើម្បីធ្វើឱ្យមានគោលការណ៍ឯកភាពគ្នា និងឱ្យរដ្ឋបាលរាជធានីខេត្តផ្សព្វផ្សាយបន្តដល់រដ្ឋបាលស្រុក ឃុំសង្កាត់ និងសមត្ថកិច្ចពាក់ព័ន្ធឱ្យយកចិត្តទុកដាក់បន្ថែម។
លោក សោម សូរីដា អ្នកនាំពាក្យ គ.ជ.ប ប្រាប់ភ្នំពេញប៉ុស្តិ៍នៅថ្ងៃទី ១៤ មីនា ២០២២ ដោយបានស្វាគមន៍ចំពោះការបើកកិច្ចប្រជុំនេះ ដើម្បីបង្កលក្ខណៈងាយស្រួលដល់គណបក្សនយោបាយក្នុងការធ្វើសកម្មភាពនយោបាយរបស់ខ្លួន។
លោកបន្តថា តាមរយៈការណែនាំនេះបានធ្វើឱ្យដំណើរការនៃការចុះបញ្ជីគណបក្សនយោបាយកន្លងមកនេះ ប្រព្រឹត្តទៅដោយរលូន ប៉ុន្តែក៏មានបញ្ហាតិចតួចនៅតាមឃុំសង្កាត់ខ្លះដែរដោយសារអាជ្ញាធរឃុំសង្កាត់នោះមិនទាន់យល់ច្បាស់ពីតួនាទី និងភារកិច្ច របស់រដ្ឋបាលឃុំ និងគណៈកម្មការឃុំ-សង្កាត់រៀបចំការបោះឆ្នោតដែរ។
ទោះជាយ៉ាងណា បើតាម លោក សោម សូរីដា តាមរយៈកិច្ចទំនាក់ទំនងរវាងអាជ្ញាធររៀបចំការបោះឆ្នោតជាមួយនឹងអាជ្ញាធរដែនដីបានធ្វើឱ្យកិច្ចការនេះមានការយល់គ្នា។
លោកថ្លែងថា៖ «គ.ជ.ប សូមសម្តែងនូវការអរគុណចំពោះអាជ្ញាធរ ជាពិសេសគឺក្រសួងមហាផ្ទៃ ដែលបានចេញជាគោលការណ៍ណែនាំដល់អាជ្ញាធរថ្នាក់ក្រោមជាតិ ដើម្បីបង្កលក្ខណៈងាយស្រួលដល់គណបក្សនយោបាយ ដើម្បីធ្វើសកម្មភាពរបស់ខ្លួននៅមុនដំណើរការបោះឆ្នោតមកដល់»។
កាលពីថ្ងៃទី ៧ ខែកុម្ភៈ ឆ្នាំ ២០២២ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានចេញលិខិតមួយច្បាប់ ស្នើឱ្យអភិបាលនៃគណៈអភិបាលរាជធានីខេត្តទូទាំងប្រទេសបង្កលក្ខណៈងាយស្រួលដល់គ្រប់គណបក្សនយោបាយដែលបានចុះឈ្មោះក្នុងបញ្ជីនៅក្រសួងមហាផ្ទៃ ធ្វើសកម្មភាព ដើម្បីចូលរួមក្នុងការបោះឆ្នោតជ្រើសរើសក្រុមប្រឹក្សាឃុំ- សង្កាត់ អាណត្តិទី ៥ ឆ្នាំ ២០២២ និងការបោះឆ្នោតជ្រើសតាំងតំណាងរាស្ត្រអាណត្តិទី ៧ ឆ្នាំ ២០២៣ ដើម្បីធ្វើយ៉ាងណាឱ្យមានលក្ខណៈ សេរី ត្រឹមត្រូវ និងយុត្តិធម៌ ស្របទៅតាមគោលការណ៍លទ្ធិប្រជាធិបតេយ្យ សេរីពហុបក្ស៕
