.jpg)
ជនរងគ្រោះត្រូវគ្រាប់ស្លាប់ នៅស្រុកវ៉ារិន ខេត្តសៀមរាប។ រូបថត ប៉ូលិស
សៀមរាបៈ នគរបាលព្រហ្មទណ្ឌស្រុកវ៉ារិន ខេត្តសៀមរាបនៅថ្ងៃទី ១៤ មីនា កំពុងសាកសួរបុរស ២ នាក់ នៅអធិការដ្ឋាននគរបាលស្រុកពាក់ព័ន្ធការស្លាប់បុរសម្នាក់ដោយត្រូវគ្រាប់កាំភ្លើងច្នៃចំទ្រូង ខណៈពួកគេទាំង ៣ នាក់ ដើររកឃ្មុំលើភ្នំចង្ក្រានរយ ក្នុងឃុំស្វាយស ក្នុងភូមិសាស្ត្រស្រុកវ៉ារិន ខេត្តសៀមរាប។
លោក ហុង បូហេង អធិការរងទទួលផែនការងារនគរបាលព្រហ្មទណ្ឌស្រុកវ៉ារិន ឱ្យដឹងនៅថ្ងៃទី ១៤ ខែមីនា ថា បុរសម្នាក់ស្លាប់ឈ្មោះ វឿន វ៉ុន អាយុ ៣៧ ឆ្នាំ រស់នៅភូមិ ពាក់ស្នែងថ្មី ឃុំ ពាក់ស្នែងក្នុងស្រុកវ៉ារិន។ រីឯបុរសឈ្មោះ ណែម ស៊ី អាយុ ៣២ ឆ្នាំ និងឈ្មោះ អឿម អិត អាយុ ៣៥ ឆ្នាំរស់នៅក្នុងភូមិលៀប ឃុំពាក់ស្នែង ដែលស្ថិតនៅក្នុងហេតុការណ៍នោះកំពុងត្រូវសមត្ថកិច្ចរបស់លោកហៅសាកសួរនៅអធិការដ្ឋាននគរបាលស្រុកវ៉ារិន។
លោកថា៖ «នៅ (ថ្ងៃទី ១៤ មីនា) ខ្ញុំកំពុងសាកសួរបុរស ២ នាក់ នៅអធិការដ្ឋាននគរបាលស្រុកវ៉ារិន ព្រោះពួកគាត់ថា បានដឹងហេតុការណ៍ ហើយយកដំណឹងនេះមកប្រាប់អ្នកភូមិ។ ករណីនេះយើងកំពុងសាកសួរពួកគាត់»។
លោកថា សមត្ថកិច្ចជំនាញកំពុងចុះទៅពិនិត្យស្រាវជ្រាវនៅកន្លែងកើតហេតុបន្ថែមទៀត ដើម្បីប្រមូលព័ត៌មានជុំវិញហេតុការណ៍នេះ។
លោក ឆន ខុន នាយនគរបាលប៉ុស្តិ៍ពាក់ស្នែងបានប្រាប់ថា មុនកើតហេតុនៅព្រឹកថ្ងៃទី ១៤ ខែមីនា បុរសទាំង ៣ នាក់ ដែលជាមិត្តភក្តិនឹងគ្នានោះបាននាំគ្នាឡើងភ្នំដើម្បីរកសត្វឃ្មុំដូចសព្វមួយដងនៅលើភ្នំចង្ក្រានរយ ស្រាប់តែឮសូរសំឡេងផ្ទុះកាំភ្លើង និងឮសំឡេងជនរងគ្រោះស្រែកឱ្យជួយ។ បុរសទាំង ២ នាក់នោះ បានរត់ទៅកន្លែងជនរងគ្រោះក៏ឃើញជនរងគ្រោះត្រូវគ្រាប់កាំភ្លើងកែច្នៃ ១ គ្រាប់ចំដើមទ្រូង ហើយបានដាច់ខ្យល់ស្លាប់នឹងកន្លែង ហើយពួកគេក៏នាំគ្នាសែងសពជនរងគ្រោះមកផ្ទះប្រគល់ឱ្យក្រុមគ្រួសារ៕
