ក្រចេះ: មន្ត្រីក្រសួងសាធារណការ និងដឹកជញ្ជូននឹងចុះស៊ើបអង្កេត ករណីស្ថានីយថ្លឹងទម្ងន់រថយន្តចំនួន ២ ទីតាំងនៅខេត្តក្រចេះ ដែលរងការចោទ ប្រកាន់ថា បានយកលុយពីអ្នកបើកបររថយន្តដឹកទំនិញធំៗ ដើម្បីអាចដឹកលើសទម្ងន់តាមចិត្តបានដោយមិនចាំបាច់ចូលត្រួតពិនិត្យនោះឡើយ។
កាលពីពេលថ្មីៗនេះ មានការផ្សព្វផ្សាយនូវព័ត៌មានមួយចំនួន ដែលពាក់ព័ន្ធនឹងមន្ត្រីនៅស្ថានីយថ្លឹងរថយន្តកាំពីស្ថិតក្នុងស្រុកចិត្របុរី និងស្ថានីយថ្លឹងរថយន្តមានជ័យស្ថិតក្នុងស្រុកស្នួល បានបណ្តែតបណ្តោយឱ្យរថយន្តដឹកលើសទម្ងន់កំណត់ក្នុងច្បាប់ ដោយអាចឆ្លងកាត់បានដោយមិនបាច់ចូលត្រួតពិនិត្យ។
ការផ្សព្វផ្សាយនេះ អះអាងថា ការមិនចូលត្រួតពិនិត្យត្រឹមត្រូវនេះគឺម្ចាស់រថយន្តធំៗទាំងនោះត្រូវចំណាយថវិកាប្រមាណ ១៥ ម៉ឺនរៀល ទៅឱ្យមន្ត្រីនៅតាមស្ថានីយទាំងនោះ ដើម្បីអាចដឹកទំនិញលើសទម្ងន់បានតាមចិត្ត។ នេះបើយោងតាមការចុះផ្សាយរបស់សារព័ត៌មានក្នុងស្រុកដែលបានដកស្រង់សម្តីអ្នកបើកឡានធំៗ ឆ្លងកាត់ស្ថានីយថ្លឹងរថយន្តទាំង ២ ទីតាំងនេះ។
លោក តាំង ពៅ ប្រធានលេខាធិការដ្ឋាននៃក្រសួងសាធារណការ ប្រាប់ភ្នំពេញប៉ុស្តិ៍នៅថ្ងៃទី ១៤ មីនាថា លោកមិនទាន់ទទួលបានព័ត៌មានទាំងនោះទេ។ យ៉ាងណាក្តីលោកបញ្ជាក់ថា ក្រសួងនឹងចុះស៊ើបអង្កេតករណីនេះហើយបើរកឃើញដូចការចោទប្រកាន់មែន ក្រសួងនឹងមានវិធានការទៅតាមផ្លូវច្បាប់។
លោក តាំង ពៅ លើកឡើងថា៖ «ខ្ញុំនឹងសាកសួរ ហើយធ្វើការស្រាវជ្រាវសិន ព្រោះខ្ញុំក៏កំពុងតាមដានការងារទាំងអស់នេះដែរ ចាំមើលសិន»។
លោក វា ថន អភិបាលខេត្តក្រចេះក៏បានថ្លែងដែរថា លោក នឹងចាត់មន្ត្រីឱ្យពិនិត្យមើលលើករណីនេះ។ លោកថា៖ «គ្រាន់តែថាពាក់ព័ន្ធនឹងអំពើពុករលួយ នោះទាល់តែ ACU បានអាចវាយតម្លៃបានថា ជាអំពើពុករលួយ។ យ៉ាងណា ខ្ញុំមិនច្បាស់ទេ ចំពោះបញ្ហានេះព្រោះភាគច្រើនក្រសួងសាធារណការជាអ្នកគ្រប់គ្រង គេមានកន្លែងថ្លឹង មានអី? តែបើបានព័ត៌មាននេះ ខ្ញុំក៏អរគុណដែរខ្ញុំនឹងឱ្យគេស្រាវជ្រាវបន្ថែមទៀត ដើម្បីពិនិត្យមើលរឿងហ្នឹង»។
លោក សាំង ប៊ុនថេង ប្រធានមន្ទីរសាធារណការ និងដឹកជញ្ជូនខេត្តក្រចេះ កាលពីថ្ងៃទី ១៤ មីនាមិនអាចទាក់ទងសុំការអត្ថាធិប្បាយជុំវិញករណីនេះបានទេ ដោយទូរស័ព្ទចូលជាច្រើនដង ប៉ុន្តែមិនមានអ្នកទទួល។
កាលពីពាក់កណ្តាលខែកុម្ភៈ មន្ត្រីសាធារណការ និងដឹកជញ្ជូនខេត្តកណ្តាលបានស្នើសុំផ្លាស់ប្ដូរមន្ត្រីរដ្ឋបាលនៅតាមស្ថានីយជញ្ជីងថ្លឹងរថយន្តចំនួន ៥ កន្លែង បន្ទាប់ពីមានការបែកធ្លាយ ជុំវិញអំពើពុករលួយពាក់ព័ន្ធនឹងវិធានការបង្ក្រាបរថយន្តដឹកលើសទម្ងន់កំណត់ តាមស្ថា-នីយទាំងនោះ។ សូមជម្រាបថា គិតចាប់ពីខែតុលា ឆ្នាំ ២០២១ មកទល់ចុងខែកុម្ភៈ ឆ្នាំ ២០២២ ក្រុមការងារនៃក្រសួងសាធារណការបានបន្តចាប់រថយន្តដែលដឹកលើសទម្ងន់លើសពី ២០ ភាគរយ បានចំនួន ១៣៦ គ្រឿង។ រថយន្តទាំងនេះត្រូវបានឃាត់ជាបន្តបន្ទាប់ពីតាមស្ថានីយថ្លឹងរថយន្តទូទាំងប្រទេស ក្រោយពីលោកនាយករដ្ឋមន្ត្រី ហ៊ុន សែន សម្រេចប្រគល់រថយន្ត ២៤៩ គ្រឿងទៅម្ចាស់វិញ ក្នុងអំឡុងពេលទទួលរងការពិន័យដោយការរក្សាទុករយៈពេល ១ ឆ្នាំ៕