.jpg)
ជនសង្ស័យ និងគ្រឿងញៀន ព្រមទាំងសារធាតុគីមីសម្រាប់ផលិតគ្រឿងញៀនដែលសមត្ថកិច្ចបង្ក្រាបបាន។ ហេង ជីវ័ន
ភ្នំពេញៈ អាជ្ញាធរជាតិប្រយុទ្ធប្រឆាំងគ្រឿងញៀន (NACD) បាននិងកំពុងបន្តបើកវគ្គបណ្តុះបណ្តាលមន្ត្រីពាក់ព័ន្ធនឹងការហាមឃាត់សារធាតុគីមីគ្រោះថ្នាក់ (GRIDS) ដោយសារនិន្នាការថ្មីរបស់ពិភពលោក មានការប្រែប្រួល គឺការផ្លាស់ប្តូរ របៀបរបប និងឥរិយាបថពាក់ព័ន្ធនឹងការផលិតគ្រឿងញៀនពីធម្មជាតិ និងពាក់កណ្តាលសំយោគ ប្តូរមកជាការផលិតគ្រឿងញៀនសំយោគវិញ។ នេះបើតាមលោក មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន។
លោកបានប្រាប់ភ្នំពេញប៉ុស្តិ៍នៅថ្ងៃទី ១៣ ខែមីនាថា ការប្តូរមកជាការផលិតគ្រឿងញៀនសំយោគ គឺមានភាពងាយស្រួលក្នុងការផលិត មិនរើសទីតាំង ហើយប្រើរយៈពេលខ្លីដោយសារតែការផលិតរបស់វា គឺធ្វើឡើងដោយសារការប្រើប្រាស់សារធាតុគីមីផ្សំគឺថ្នាំញៀនសំយោគដែលផលិតចេញពីសារធាតុគីមីផ្សំ។
ជាមួយគ្នានេះ លោកឧត្តមសេនីយ៍ឯក ឡាយ គឹមលី នាយកខុទ្ទកាល័យ លោកឧបនាយករដ្ឋមន្ត្រី កែ គឹមយ៉ាន និងជាអគ្គលេខាធិការរង អាជ្ញាធរជាតិប្រយុទ្ធប្រឆាំងគ្រឿងញៀនបានស្នើឱ្យមានការសហការផ្តល់ទទួលព័ត៌មានច្បាស់លាស់ទាន់ពេលវេលា ដើម្បីធ្វើឱ្យការបង្ការ ទប់ស្កាត់បង្ក្រាបបទល្មើសបង្វែរសារធាតុគីមីផ្សំ យកទៅផលិតគ្រឿងញៀនឱ្យមានប្រសិទ្ធភាព។
ការស្នើនេះត្រូវបានធ្វើឡើងកាលពីថ្ងៃទី ១០ មីនា ក្នុងពេលដែលលោកធ្វើជាអធិបតីក្នុងការបិទវគ្គបណ្តុះបណ្តាលស្តីពីការគ្រប់គ្រងត្រួតពិនិត្យសារធាតុគីមីផ្សំ តាមប្រព័ន្ធទំនាក់ទំនង ឧបទ្ទវហេតុ SINCB។
លោក ហ្វឺណង់ដូ រ៉ូម៉េរ៉ូ កុងត្រឺរ៉ាស (Fernando Romero Contreras) ជាអ្នកសម្របសម្រួល កម្មវិធីគំនិតផ្ដួចផ្ដើមប្រតិបត្តិការរបស់កម្មវិធីសកលស្ដីពីការហាមឃាត់សារធាតុគ្រោះថ្នាក់ (GRIDS ) ថ្លែងថា វគ្គបណ្តុះបណ្តាលនេះ គឺចូលរួមជួយពង្រឹងនូវសមត្ថភាព ប្រសិទ្ធភាព ក្នុងការត្រួតពិនិត្យសារធាតុគីមីផ្សំដល់មន្ត្រីអនុវត្តច្បាប់កម្ពុជា។ នេះបើយោងតាមអគ្គលេខាធិការដ្ឋាន NACD។
លោក ឡាយ គឹមលី បានសាទរដល់សិក្ខាកាម ដែលចូលរួមវគ្គបណ្តុះបណ្តាលទាំងអស់ ដែលទើបទទួលបាននូវចំណេះដឹង បទពិសោធល្អៗយកទៅបម្រើការងារ តាមវិស័យរបស់ខ្លួន ដើម្បីបង្ការទប់ស្កាត់នូវការចរាចរសារធាតុគីមីផ្សំខុសច្បាប់។
លោកបានបញ្ជាក់ថា៖ «ការសហការផ្តល់ទទួលព័ត៌មានច្បាស់ ទាន់ពេលវេលា ធ្វើឱ្យការបង្ការ ទប់ស្កាត់បង្ក្រាបបទល្មើសការបង្វែរសារធាតុគីមីផ្សំ យកទៅផលិតគ្រឿងញៀន មានប្រសិទ្ធភាព ជាពិសេសសមត្ថកិច្ចជួរមុខនៅតាមច្រកព្រំដែនត្រូវតែជួយសង្កេត តាមដាន ផ្តល់ព័ត៌មាន ពីករណីសង្ស័យនានា ពាក់ព័ន្ធនឹងការនាំចូលសារធាតុគីមីផ្សំយកទៅប្រើប្រាស់ទាំងក្នុងវិស័យឧស្សាហកម្ម និងវិស័យវេជ្ជសាស្ត្រ»។
លោក ឡាយ គឹមលី ក៏បានសំណូមពរដល់ក្រសួងស្ថាប័នមានសមត្ថកិច្ចពាក់ព័ន្ធ សូមសហការចូលរួមប្រើប្រាស់ប្រព័ន្ធគ្រប់គ្រងទំនាក់ទំនងឧបទ្ទវហេតុសារធាតុគីមី ឱ្យទទួលផលប្រយោជន៍ខ្ពស់ក្នុងការងាររបស់ខ្លួន លើកកម្ពស់ការផ្លាស់ប្តូរព័ត៌មានស្តីអំពីការចរាចរជួញដូរសារធាតុគីមីផ្សំ ឆ្លងកាត់ព្រំដែនជាមួយប្រទេសដៃគូក្នុងតំបន់។
ក្រៅពីនោះលោកក៏សំណូមពរឱ្យបន្តពង្រឹង និងពង្រីកកិច្ចសហការល្អរវាងមន្ត្រីអនុវត្តច្បាប់ជួរមុខ បម្រើការងារនៅតាមព្រំដែន និងកំពង់ផែ ក្នុងការចែករំលែកព័ត៌មានអំពីសកម្មភាព និងទិសដៅនៃការដឹកជញ្ជូនសារធាតុគីមីក្នុងប្រទេសកម្ពុជា លើកកម្ពស់កិច្ចសហប្រតិបតិ្តការក្នុងការតាមដានត្រួតពិនិត្យការប្រើប្រាស់ សារធាតុគីមីផ្សំគ្រឿងញៀន តាមរយៈការធ្វើជាសេនាធិការដល់ស្ថាប័ន អង្គភាពរបស់ខ្លួន ទាំងនៅថ្នាក់ជាតិ និងក្រោមជាតិ និងគ្រប់មន្ត្រីអនុវត្តច្បាប់គ្រឿងញៀន ត្រូវបន្តយកចិត្តទុកដាក់លើកកម្ពស់ ការកសាងសមត្ថភាព ចំណេះដឹង ជំនាញបន្ថែមទៀត ដើម្បីបម្រើដល់សកម្មភាពការងារ តាមដាន ស៊ើបអង្កេត ស្រាវជ្រាវ និងបង្ក្រាបបទល្មើសគ្រឿងញៀន និងបទល្មើសដទៃទៀតឱ្យកាន់តែមានប្រសិទ្ធភាពខ្ពស់។
លោក មាស វិរិទ្ធ បានលើកឡើងទៀតថា បច្ចុប្បន្ននេះទាំងអាស៊ាន និងពិភពលោកបានកំណត់ មិនឱ្យមានសារធាតុគីមីផ្សំនៅក្នុងគ្រឿងញៀន ។ ដូច្នេះ កម្ពុជាមានការខិតខំយកចិត្តទុកដាក់ក្នុងការបង្កើត និងរៀបចំឱ្យមានយន្តការប្រកបដោយគុណភាពក្នុងការរួមចំណែកធ្វើសកម្មភាពដើម្បីទប់ស្កាត់ការប្រើប្រាស់សារធាតុគីមីផ្សំ រាប់ទាំងការជួញដូ និងការប្រើប្រាស់ និងដឹកជញ្ជូន និងទប់ស្កាត់កុំឱ្យមានការបង្វែរពីជំនួញសារធាតុគីមីផ្សំស្របច្បាប់យកទៅផលិតគ្រឿងញៀនខុសច្បាប់។ «យើងត្រូវមានយន្តការនេះ ដែលជាយន្តការចាំបាច់បំផុត។ យើងនឹងបង្រៀនសមាជិកនូវយន្តការនោះឱ្យគាត់កំណត់ឱ្យបាននូវអត្តសញ្ញាណនៃសារធាតុគីមីផ្សំ និងរបៀបរបបពាក់ព័ន្ធទៅនឹងការបញ្ជាទិញ និងការស្តុកទុក ការប្រើប្រាស់ ហើយនឹងការកាត់ស្តុក (សន្និធិសារធាតុគីមីផ្សំ)»៕
