.jpg)
ក្រសួងទេសចរណ៍ ក្រុមហ៊ុន Everwave និងអង្គការ River Ocean Cleanup ក្នុងកិច្ចប្រជុំកាលពីម្សិលមិញ។ រូបថត ក្រសួងទេសចរណ៍
ភ្នំពេញៈ ក្រសួងទេសចរណ៍ ក្រុមហ៊ុន Everwave និងអង្គការ River Ocean Cleanup គ្រោងរៀបចំធ្វើយុទ្ធនាការសម្អាតទន្លេមេគង្គ ទន្លេសាប និងទន្លេបាសាក់ក្នុងភូមិសាស្ត្ររាជធានីភ្នំពេញ តាមរយៈការប្រមូលសំរាមចេញពីក្នុងទឹក និងនៅតាមបណ្តោយច្រាំងទន្លេចាប់ពីខែមីនា ដល់ខែមិថុនា ឆ្នាំ ២០២២ ដើម្បីជួយទ្រទ្រង់ដល់ចលនាទីក្រុងស្អាត។
ក្នុងជំនួបរវាង លោក ថោង ខុន រដ្ឋមន្ត្រីក្រសួងទេសចរណ៍ និងថ្នាក់ដឹកនាំក្រុមហ៊ុន everwave និងអង្គការ River Ocean Cleanup កាលពីថ្ងៃទី ១៤ ខែមីនា ឆ្នាំ ២០២២ បានពិភាក្សាអំពីយុទ្ធនាការសម្អាតទន្លេមេគង្គនេះ ដោយប្រើប្រាស់ទូកប្រមូលសំរាមបំពាក់បច្ចេកវិទ្យាថ្មីរបស់អាល្លឺម៉ង់មានឈ្មោះថា «Moringa by Landmarken» ដែលមានសមត្ថភាពអាចប្រមូលទិន្នន័យទីតាំងដែលមានសំរាមបានរហ័សតាមរយៈដ្រូន និងកាមេរ៉ា និងមានសមត្ថភាពប្រមូលសំរាមក្នុងទឹកបានប្រមាណ ២០ តោនក្នុង ១ ថ្ងៃ។
លោក Clemens Nepomuk Feigl ប្រធាន និងជាសហស្ថាបនិកក្រុមហ៊ុន Everwave GmbH ថ្លែងថា យុទ្ធនាការនេះក៏នឹងប្រើប្រាស់ទូក CollectiX ប្រមូលសំរាមចេញពីក្នុងទឹក និងមានការប្រមូលសំរាមនៅតាមបណ្តោយច្រាំងទន្លេចាប់ពី ខែមីនា ដល់ខែមិថុនា ឆ្នាំ ២០២២។ សំរាមដែលប្រមូលបាននឹងត្រូវយកទៅបែងចែកនៅទីតាំងបែងចែកសំរាមនៅក្នុងរាជធានីភ្នំពេញ ដែលបានរៀបចំដោយ everwave និងអង្គការ River Ocean Cleanup រួចសំរាមដែលពុំអាចកែច្នៃបាននឹងត្រូវបញ្ជូនទៅក្រុមហ៊ុន ជីប ម៉ុង Ecocycle យកទៅបំប្លែងទៅជាថាមពលក្នុងរោងចក្រស៊ីម៉ងត៍។
លោក ថោង ខុន បានសម្តែងការស្វាគមន៍ចំពោះសហគ្រាសសង្គម Everwave និងអង្គការ River Ocean Cleanup ដែលបានរៀបចំយុទ្ធនាការ សម្អាតទន្លេនេះឡើង ដែលជាបេសកកម្មជាប្រវតិ្តសាស្ត្រដំបូងដ៏សំខាន់មួយសម្រាប់កម្ពុជាចូលរួមចំណែកក្នុងការធ្វើឱ្យទន្លេស្អាត ទីក្រុងស្អាត ពិសេសចូលរួមក្នុងយុទ្ធនាការប្រឡងប្រណាំង ទីក្រុងស្អាតនៅកម្ពុជា។
លោកថ្លែងថា៖ «យន្តការប្រឡងប្រណាំងទីក្រុងស្អាត គឺត្រូវបានបង្កើត និងដាកឱ្យអនុវត្តចាប់ពីឆ្នាំ ២០១១ មកដល់បច្ចុប្បន្នទទួលបានការគាំទ្រ និងមានភាពរីកចម្រើនច្រើនគួរជាទីមោទនៈ ដែលពីមុនយុទ្ធនាការគ្រប់គ្រងសំណល់ភាគច្រើនគឺនៅលើគោក តែឥឡូវនេះបានសហការជាមួយ Everwave និង River and Ocean Cleanup ធ្វើការសម្អាតសំរាមក្នុងទឹកតាមដងទន្លេបន្ថែមទៀត ដែលទាំងនេះមិនត្រឹមតែជាការសម្រេចបានក្តីសុបិនមួយ ក្នុងការពារបរិស្ថានក្នុងទឹក និងលើផ្ទៃទឹកដ៏មានសារៈសំខាន់ប៉ុណ្ណោះទេ តែក៏ជាសារមួយបញ្ជាក់ពីកិច្ចខិតខំប្រឹងប្រែងពីគ្រប់ភាគីពាក់ព័ន្ធទាំងអស់ក្នុងការចូលរួមកាត់បន្ថយផលប៉ះពាល់នៃសំរាម ទាំងលើគោក និងផ្ទៃទឹកផងដែរ»។
ជាមួយគ្នានោះដែរ លោករដ្ឋមន្ត្រី ថោង ខុន ក៏បានអំពាវនាវឱ្យក្រុមការងារបន្តបេសកកម្មសម្អាតទន្លេនេះរយៈពេលវែង និងមិនត្រឹមតែនៅក្នុងភូមិសាស្ត្ររាជធានីភ្នំពេញ គឺត្រូវបន្តទៅខេត្ត ឬតំបន់ដែលមានទេសចរណ៍ប្រមូលផ្តុំ ដូចជាតំបន់ចុងឃ្នាស ខេត្តសៀមរាប និងខេត្តជាប់ទន្លេ និងសមុទ្រផ្សេងៗទៀត ដើម្បីចូលរួមជំរុញភាពស្អាត និងបៃតងនៅតាមដងទន្លេ និងសមុទ្រដែលអាចទាក់ទាញភ្ញៀវទេសចរជាតិ និងអន្តរជាតិឱ្យជិះទូក ឬធ្វើសកម្មភាពទេសចរណ៍តាមទន្លេ និង សមុទ្រឱ្យកាន់តែច្រើនថែមទៀតផងដែរ។
លោក គល់ វឌ្ឍនា អគ្គលេខាធិការរងនៃគណៈកម្មាធិការជាតិទន្លេមេគង្គកម្ពុជា ប្រាប់ភ្នំពេញប៉ុស្តិ៍នៅថ្ងៃទី ១៥ មីនា ឆ្នាំ ២០២២ នេះ បានសម្តែងការគាំទ្រចំពោះ យុទ្ធនាការសម្អាតទន្លេមេគង្គ ទន្លេសាប និងទន្លេបាសាក់ក្នុងភូមិសាស្ត្ររាជធានីភ្នំពេញ ព្រោះវាជាសកម្មភាពដ៏ល្អ និងជួយថែរក្សាបរិស្ថាននៅក្នុងទន្លេ និងមិនតែប៉ុណ្ណោះ វាជាសកម្មភាពមួយក្នុងការបណ្តុះនូវទស្សនៈ និងគំនិតដល់សង្គមជាតិទាំងមូលឱ្យចូលរួមថែទាំទន្លេ។
លោកថ្លែងថា៖ «យុទ្ធនាការនេះ វាដូចជាទិវាដាំកូនឈើ លែងមច្ឆជាតិរបស់យើងដែរ ព្រោះវាបង្ហាញពីការអប់រំ និងផ្នត់គំនិតរបស់ប្រជាពលរដ្ឋ និងសង្គមទាំងមូលឱ្យមើលឃើញថា រឿងទាំងអស់នេះសំខាន់ បើយើងមិនបានរួមចំណែក កុំទៅបំផ្លាញវា។ ទី ១ ជួយឱ្យបានស្អាត និងមួយទៀត គឺជាការអប់រំដោយប្រយោលដល់មហាជន និងប្រជាពលរដ្ឋទាំងអស់ឱ្យបានដឹងថា យើងមិនគួរចោលសំរាមផ្តេសផ្តាសទេ ព្រោះរាជរដ្ឋាភិបាលយកចិត្តទុកដាក់សម្អាត យើងគួរតែទុកដាក់សំរាមឱ្យបានស្អាត»។
លោក គល់ វឌ្ឍនា បានថ្លែងដោយអះអាងថា នៅពេលដែលមានការសម្អាតទន្លេ ឱ្យបានស្អាត វានឹងរួមចំណែកដល់ការអភិរក្ស និងការរស់នៅរបស់ជីវចម្រុះនិងធនធានធម្មជាតិឱ្យបានកាន់តែល្អថែមមួយកម្រិតទៀត៕
