.jpg)
ការដាក់ជញ្ជីងគំរូតាមផ្សារក្នុងខេត្តកំពង់ស្ពឺកាលពីថ្ងៃទី ១០ មីនា ឆ្នាំនេះ។ រូបថត មន្ទីរឧស្សាហកម្មខេត្ត
កំពង់ស្ពឺៈ ខេត្តកំពង់ស្ពឺគ្រោងដាក់ជញ្ជីងគំរូចំនួន ៥ ទីតាំងនៅតាមផ្សារនានាតាមបណ្តាក្រុង-ស្រុក ខណៈបច្ចុប្បន្នទើបដាក់បានចំនួន ២ ទីតាំង ដើម្បីឱ្យមានសុក្រឹតភាពច្បាស់លាស់ជូនដល់ប្រជាពលរដ្ឋដែលទិញទំនិញបន្លែ ផ្លែឈើ ត្រី សាច់ នៅក្នុងផ្សារសម្រាប់ប្រើប្រាស់ក្នុងការថ្លឹងផ្ទៀងផ្ទាត់គីឡូជាមួយភ្នែកជញ្ជីងរបស់អ្នកលក់ ចៀសវាងការខាតបង់ដោយសារការបន្លំភ្នែកជញ្ជីង។
លោក នួន សុភ័ណ្ឌ ប្រធានមន្ទីរឧស្សាហកម្មវិទ្យាសាស្ត្របច្ចេកវិទ្យា និងនវានុវត្តន៍ខេត្តកំពង់ស្ពឺថ្លែងកាលពីថ្ងៃទី ១៤ ខែមីនាថា មន្ទីរឧស្សាហកម្មសហការជាមួយអាជ្ញាធរក្រុងច្បារមន បានចុះបំពាក់ជញ្ជីងគំរូចំនួន ២ ទីតាំងផ្សេងគ្នារួចរាល់ក្នុងផ្សារកំពង់ស្ពឺកាលពីអាទិត្យមុន។ ដោយឡែកជញ្ជីងចំនួន ៣ ទីតាំងទៀតនឹងត្រូវដាក់បន្ថែមនៅសប្តាហ៍ក្រោយ នៅក្នុងផ្សារថ្នល់ទទឹងផ្សារ នៅទីរួមស្រុកភ្នំស្រួច និងផ្សារត្រែងត្រយឹង។
លោកប្រធានមន្ទីរបានឱ្យដឹងថា ការដំឡើងជញ្ជីងគំរូនេះ ដើម្បីមានភាពសុក្រឹតច្បាស់លាស់ដល់ប្រជាពលរដ្ឋដែលទិញទំនិញនៅក្នុងផ្សារប្រចាំថ្ងៃដូចជា បន្លែ ផ្លែឈើ ត្រី សាច់ ជាដើម ប្រើប្រាស់ក្នុងការថ្លឹងផ្ទៀងផ្ទាត់គីឡូជាមួយភ្នែកជញ្ជីងរបស់អ្នកលក់ចៀសវាងការបន្លំភ្នែកជញ្ជីង។ លោកថ្លែងថា៖ «ជញ្ជីងហ្នឹងជាជញ្ជីងគំរូឱ្យត្រូវភ្នែកគីឡូ វាជាគំរូគេមួយកុំឱ្យមានអ្នកធ្វើពាណិជ្ជកម្មនៅក្នុងផ្សារហ្នឹងគាត់កេងបន្លំគីឡូ ឬខាំទំនិញគេ»។
លោក នួន សុភ័ណ្ឌ បានបញ្ជាក់ថា ការដាក់ជញ្ជីងនេះ គឺចាំបាច់ត្រូវសហការគ្នាជាមួយអាជ្ញាធរមូលដ្ឋានតាមក្រុង ស្រុក ដើម្បីចាត់តាំងឱ្យប្រធានផ្សារ ឬអ្នកសណ្តាប់ធ្នាប់ក្នុងផ្សារទទួលមើលការខុសត្រូវដើម្បីថែទាំ និងផ្ទៀងផ្ទាត់កូនជញ្ជីងតាមស្តង់ដាជារៀងរាល់ឆ្នាំ ពីព្រោះនៅពេលត្រូវខ្យល់ ឬត្រូវថ្ងៃ ជញ្ជីងនឹងអាចមានភាពលម្អៀង។ លោកបានឱ្យដឹងថា ជញ្ជីងដែលដាក់ជូនប្រជាពលរដ្ឋប្រើប្រាស់នេះអាចថ្លឹងបានកម្រិតទម្ងន់ត្រឹម ១០ គីឡូ ហើយជញ្ជីងនេះគឺទទួលបានមកពីមជ្ឈមណ្ឌលមាត្រាសាស្ត្រជាតិចំនួន ៤ និងទិញបន្ថែមចំនួន ១ ដោយមន្ទីរឧស្សាហកម្ម។
លោកប្រធានមន្ទីរបានបញ្ជាក់ទៀតថា ការទិញជញ្ជីងដាក់ថែមនេះ មិនមែនទិញពីកន្លែងអ្នកលក់រួចយកមកដាក់ឱ្យប្រើប្រាស់ភ្លាមនោះទេ គឺមានការធ្វើព្យាសកម្ម(វិធីសាស្ត្រ និងបទប្បញ្ញត្តិការងារក្រិតខ្នាតឧបករណ៍មាត្រាសាស្ត្រសម្រាប់ដាក់ឱ្យប្រើប្រាស់...) ត្រឹមត្រូវជាមួយមជ្ឈមណ្ឌលមាត្រាសាស្ត្រជាតិ។
លោកបានថ្លែងថា៖ «មុននឹងយកទៅដាក់ គឺមានការធ្វើព្យាសកម្មផ្ទៀងផ្ទាត់ពីមជ្ឈមណ្ឌលមាត្រាសាស្ត្រកឹបសៀលអីត្រឹមត្រូវទើបយើងយកមកដាក់បាន យើងមិនអាចទិញជញ្ជីងពីផ្សារ ឬពីកន្លែងអ្នកលក់យកមកដាក់តែម្តងទេ»។
លោក ហុក ម៉ារ៉ាឌី អភិបាលក្រុងច្បារមនថ្លែងនៅថ្ងៃទី ១៤ ខែមីនាថា ការបន្លំភ្នែកជញ្ជីងច្រើនកើតឡើងនៅកន្លែងលក់សាច់ជ្រូក សាច់គោ ត្រី និងបន្លែ ហេតុនេះការដាក់ជញ្ជីងនេះគឺអាចដាក់នៅជិតទីតាំងទាំងនោះ។ លោកបានឱ្យដឹងថា ជញ្ជីងរបស់ក្រុមអាជីវករធ្លាប់មានបញ្ហាចោទរបស់អ្នកទិញ ហើយកន្លងមក បញ្ហានេះក៏ធ្លាប់បានកើតមានភាពថ្នាំងថ្នាក់រហូតក្លាយជាទំនាស់ពាក្យសម្ដី ហើយពេលខ្លះស្ទើរក្លាយជាហិង្សាផងដែរ។
លោកថ្លែងថា៖ «ការដាក់ជញ្ជីងនេះខាងមន្ទីរជាអ្នកផ្តល់ជញ្ជីង ហើយខាងអាជ្ញាធរក្រុងជាអ្នករកទីតាំងដាក់ និងរកដាក់អ្នកមើលថែ ព្រោះយើងដាក់អាហ្នឹងបើអត់មានអ្នកមើលថែក៏មិនបានដែរ តែមិនស្រួលមានជនខិលខូចលួចយកទៅចោលបាត់»។
ជាមួយនេះដែរ លោកអភិបាលក្រុងច្បារមនបានសំណូមពរដល់ប្រជាពលរដ្ឋទាំងអស់ទាំងអាជីវករ និងអ្នកទិញត្រូវចូលរួមថែរក្សាជញ្ជីងគំរូឱ្យបានល្អយូរអង្វែង ដើម្បីជាប្រយោជន៍រួមទាំងអស់គ្នា។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាថ្លែងនៅថ្ងៃទី ១៥ ខែមីនាថា ការដាក់ជញ្ជីងគំរូនេះជាដំណើរល្អមួយសម្រាប់ធានាបាននូវសុក្រឹតភាព និងសុចរិតភាពនៃការជួញដូរការផ្លាស់ប្តូរទំនិញទៅដល់សាធារណជន ព្រោះការខាតបង់ដែលចេញពីការកេងប្រវ័ញ្ច ឬការលក់ដូរដោយគ្មានសុចរិតភាពគឺបានប៉ះពាល់ធ្ងន់ធ្ងរដល់ថវិកាប្រជាពលរដ្ឋ និងគុណភាពនៃអីវ៉ាន់ផងដែរ។
លោកថ្លែងថា៖ «ជាពិសេសគឺការខាតបង់នូវបរិមាណមានន័យថា ការកុហកហ្នឹង។ ឧទាហរណ៍ថា យើងលក់តម្លៃ ១ គីឡូ ១ ម៉ឺនរៀល ប៉ុន្តែតាមពិត ១ ម៉ឺនហ្នឹង យើងបានត្រឹមតែ ៨ ខាំកន្លះ ឬ ៩ ខាំ អ៊ីចឹងយើងគុណគូរច្រើនឆ្នាំ ច្រើនខែទៅគឺមានន័យថា ប្រជាពលរដ្ឋ និងសាធារណជនគាត់ខាតបង់ច្រើនណាស់»។
អ្នកស្រី ស៊ីម ស្រីណាវ ប្រជាពលរដ្ឋនៅក្បែរផ្សារត្រែងត្រយឹង ថ្លែងកាលពីថ្ងៃទី ១៤ ខែមីនាថា អ្នកស្រីមានការសប្បាយរីករាយនៅពេលដែលបានដឹងថា មានការដាក់ជញ្ជីងគំរូនៅក្នុងផ្សារដើម្បីផ្ទៀងផ្ទាត់គីឡូ។ តាមរយៈការដាក់ជញ្ជីងនេះ អាចនឹងធ្វើឱ្យអាជីវករមួយចំនួនដែលប្រកបរបរមិនសុចរិតលួចបន្លំភ្នែកជញ្ជីងនោះភ្ញាក់រឭកកាត់បន្ថយទម្លាប់ខូចរបស់ខ្លួនចេញ ព្រោះនៅពេលមានជញ្ជីងគំរូហើយនៅតែលក់បន្លំទៀតគឺអាចនឹងលក់មិនដាច់។
អ្នកស្រីថ្លែងថា៖ «ខ្ញុំសប្បាយចិត្តប្រសិនបើមានការដាក់ជញ្ជីងហ្នឹងមែន វាជួយឱ្យការទិញទំនិញបានគ្រប់គីឡូ លែងសូវបារម្ភរឿងបន្លំភ្នែកជញ្ជីងទៀត ហើយវាក៏ជួយមិនឱ្យខាតបង់លុយមួយចំនួនពីការទិញទំនិញមិនគ្រប់គីឡូនោះផង»៕
វីដេអូ៖
