.jpg)
ក្រុមក្មេងទំនើង ក្រោយពេលសមត្ថកិច្ចចាប់ខ្លួនកាលពីថ្ងៃទី ១៥ មីនា ។ រូបថត ប៉ូលិស
កំពតៈ នគរបាលព្រហ្មទណ្ឌខេត្តកំពត បានកសាងសំណុំរឿងបញ្ជូនក្រុមក្មេងទំនើង ៩ នាក់ ទៅសាលាដំបូងខេត្តនៅរសៀលថ្ងៃទី ១៦ មីនា បន្ទាប់ពីឃាត់ខ្លួនបាន ១ ថ្ងៃករណីណាត់គ្នាកាប់ចាក់តាមដងផ្លូវ នៅភូមិផ្សារដំបង ឃុំដើមដូង ស្រុកអង្គរជ័យខេត្តកំពត។
លោក លក ញ៉ាវ ស្នងការរងផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្តកំពតឱ្យដឹងនៅថ្ងៃទី ១៦ មីនាថា ករណីក្រុមក្មេងទំនើងចំនួន ៩ នាក់ ដែលនគរបាលស្រុកអង្គរជ័យឃាត់ខ្លួននោះ គឺសមត្ថកិច្ចរបស់លោកកសាងសំណុំរឿងបញ្ជូនបន្តទៅសាលាដំបូងខេត្តកំពត នៅរសៀលថ្ងៃទី ១៦ មីនា ដើម្បីបន្តនីតិវិធីផ្លូវច្បាប់ហើយ។
លោកថ្លែងថា៖ «យើងត្រូវតែកសាងសំណុំរឿងបញ្ជូនពួកគេទៅតុលាការពាក់ព័ន្ធប្រើហិង្សាកាប់ចាក់គ្នា។ ខ្ញុំយកពួកគេទៅតុលាការខេត្តនៅរសៀលថ្ងៃនេះ (ថ្ងៃទី ១៦ មីនា)»។
ពាក់ព័ន្ធការឃាត់ខ្លួនក្រុមក្មេងទំនើងខាងលើនេះលោក ហួរ វ៉ាន់ថុល អធិការស្តីទីស្រុកអង្គរជ័យបានប្រាប់ ភ្នំពេញ ប៉ុស្តិ៍ នៅថ្ងៃទី ១៦ មីនាថា ក្រុមយុវជនជាក្មេងទំនើងទាំង៩នាក់នោះមានអាយុពី១៥-១៦ឆ្នាំ ហើយក្នុងចំណោមពួកគេទាំង ៩ នាក់ គឺមាន ៧ នាក់ជាសិស្សសាលា និងជាអ្នករស់នៅក្នុងស្រុកបន្ទាយមាស ខេត្តកំពត។
លោកប្រាប់ថា៖ «ក្រុមក្មេងទំនើងនេះពួកគាត់មានជាបក្ខជាពួកហើយណាត់កាប់គ្នានៅតាមដងផ្លូវពួកគេដើរបង្កបញ្ហានៅក្នុងមូលដ្ឋាន។សមត្ថកិច្ចខ្ញុំបានបញ្ជូនពួកគេទៅស្នងការដ្ឋាននគរបាលព្រឹកមិញហ្នឹង (ថ្ងៃទី១៦មីនា»។
លោករៀបរាប់ប្រាប់ថា កាលពីវេលាម៉ោងជាង៤រសៀលថ្ងៃទី១៥ ខែមីនា ឆ្នាំ២០២២ កម្លាំងនគរបាលប៉ុស្តិ៍រដ្ឋបាលឃុំដើមដូង ក្នុងស្រុកអង្គរជ័យបានទទួលព័ត៌មានពីប្រជាពលរដ្ឋមកថា មានក្រុមក្មេងទំនើង១ក្រុមបានវាយកាប់ចាក់គ្នាតាមដងស្ថិតនៅភូមិ ផ្សារដំបងឃុំ ដើមដូង ស្រុកអង្គរជ័យ។ បន្ទាប់ពីនគរបាលប៉ុស្តិ៍ទទួលបានព័ត៌មាននេះក៏បានរាយការណ៍បន្តមកអធិការដ្ឋាននគរបាលស្រុកអង្គរជ័យហើយនគរបាលប៉ុស្តិ៍បានចុះឃាត់ខ្លួនពួកគេនៅថ្ងៃដដែលនោះតែម្តង។
ជុំវិញបញ្ហាក្រុមក្មេងទំនើងនេះ លោក សេក សុជាតិនាយកប្រតិបត្តិអង្គការអភិវឌ្ឍន៍ផ្នត់គំនិតបានថ្លែងនៅថ្ងៃទី១៦មីនាថា ករណីនេះ យុវជន គួរតែសិក្សាពីតួនាទី ភារកិច្ច និងការទទួលខុសត្រូវខ្លួនឯងឱ្យបានច្រើនក្នុងនាមខ្លួនជាអ្នកស្នងការដឹកនាំប្រទេសជាតិទៅថ្ងៃអនាគតនិងគួររៀនឲ្យបានច្រើននិងធ្វើសកម្មភាពទាំងឡាយណាដែលមានប្រយោជន៍សម្រាប់អនាគតខ្លួនឯង គ្រួសារ និងសង្គមជាតិ។
លោកថា៖«ស្ដាប់ឲ្យច្រើន អានឲ្យច្រើន ត្រិះរិះ និងពិចារណាឲ្យបានសព្វជ្រុងជ្រោយនៅមុនសម្រេចចិត្តធ្វើទង្វើអវិជ្ជមានណាមួយ។រក្សាខ្លួនឲ្យក្លាយជាក្មេងល្អ យុវជនល្អ មានសីលធម៌ល្អ និងវិន័យល្អ ស័ក្តិសមជាអ្នកបន្ត
វេនគ្រួសារ និងសង្គមជាតិ»៕
