ភ្នំពេញៈ មន្ត្រីអង្គភាពប្រឆាំងអំពើពុករលួយ ACU ចំនួន ៤ នាក់បានចូលរួមវគ្គបណ្តុះបណ្តាលសមត្ថភាពដែលរៀបចំឡើងដោយស្ថាប័នប្រឆាំងអំពើពុករលួយអាស៊ាន (ASEAN-PAC) ដែល ACU ចាត់ទុកថា វគ្គបណ្តុះបណ្តាលនេះបានចូលរួមពង្រឹង និងពង្រីកសមត្ថភាពរបស់មន្ត្រីអនុវត្តន៍ច្បាប់មកពីប្រទេសសមាជិកអាស៊ាន ១០។
សេចក្តីប្រកាសព័ត៌មាន ACU ឱ្យដឹងថា ចាប់ពីថ្ងៃទី ១ ដល់ថ្ងៃទី ៣ ខែមីនា ឆ្នាំ ២០២២ មន្ត្រី ACU ដែលដឹកនាំដោយលោក នួន សូរិមន្ត ឧបការីនៃ ACU និងសមាជិកចំនួន ៣ រូបទៀត បានចូលរួមក្នុងវគ្គបណ្តុះបណ្តាលសមត្ថភាពរបស់ស្ថាប័នប្រឆាំងអំពើពុករលួយអាស៊ាន (ASEAN-PAC)។
សេចក្តីប្រកាសព័ត៌មានដដែលបានឱ្យដឹងបន្តថា សិក្ខាសាលានេះត្រូវបានសហការរៀបចំឡើងដោយ ការិយាល័យប្រឆាំងអំពើពុករលួយប្រ៊ុយណេក្នុងអាណត្តិជាប្រធាន ASEAN-PAC និងទីភ្នាក់ងារឧក្រិដ្ឋកម្មជាតិពីចក្រភពអង់គ្លេស (UK-NCA) ដែលមានការចូលរួមពីសំណាក់សិក្ខាកាមរបស់ AS-EAN-PAC ទាំង ១០ ប្រទេស។
សេចក្តីប្រកាសបានបញ្ជាក់ថា៖ «គោលបំណងចម្បងនៃការរៀបចំសិក្ខាសាលានេះគឺដើម្បីពង្រឹង និងពង្រីកសមត្ថភាពរបស់មន្ត្រីអនុវត្តន៍ច្បាប់ មកពីប្រទេសសមាជិកអាស៊ាន តាមរយៈបទបង្ហាញរៀបចំដោយអ្នកជំនាញប្រកបដោយចំណេះដឹង និងបទពិសោធលើប្រធានបទជាច្រើន»។
តាមសេចក្តីប្រកាសព័ត៌មាននេះក៏បានដឹងទៀតថា ក្នុងសិក្ខាសាលានេះ បានផ្តល់ជាវេទិកាសម្រាប់មជ្ឈមណ្ឌល ACCC អង្គភាពទទួលបន្ទុកលើបទល្មើសពុករលួយរបស់អាំងទែរប៉ូល (Interpal Corruption Unit), មជ្ឈមណ្ឌលវិទ្យាស្ថានខ្នាតគោលអន្តរជាតិ សម្រាប់កិច្ចការ ប្រមូលផលបទល្មើសមកវិញ វិទ្យាស្ថានបាសែលអន្តរជាតិសម្រាប់កិច្ចការប្រមូលផលបទល្មើសត្រឡប់មកវិញ (ICAR) និងបណ្តាញសកលនៃការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC GlobE Network) ដើម្បីបង្ហាញនូវប្រវត្តិបេសកកម្ម បទពិសោធ និងការចូលរួមរបស់ខ្លួនក្នុងការប្រយុទ្ធប្រឆាំងអំពើពុករលួយ ដែលទាំងនេះជាការផ្តល់នូវពុទ្ធិ បន្ថែមដល់សិក្ខាកាមទាំងអស់អំពីការវិវឌ្ឍនៃយុទ្ធនាការប្រឆាំង អំពើពុករលួយជុំវិញពិភពលោក។
លោក នួន សូរិមន្ត ដែលបានដឹកនាំចូលរួមក្នុងវគ្គបណ្តុះបណ្តាលនេះបានលើកឡើងថា វគ្គបណ្តុះបណ្តាលនេះបានផ្តល់ចំណេះដឹងជាច្រើនពាក់ព័ន្ធនឹងការកំណត់និយមន័យនៃសំណូកវិសាលភាព ប្រភេទ និងប្រភពនៃសំណូក។
លោកបានបន្តថា សិក្ខាកាមទាំងអស់ក៏បានស្វែងយល់អំពីការសម្អាតប្រាក់ ដែលបង្ហាញអំពីដំណើរនៃការសម្អាតប្រាក់ បញ្ហាប្រឈមដែលមានចំពោះអ្នកស៊ើបអង្កេតការសម្អាតប្រាក់ និងការចូលរួមរបស់អង្គការអន្តរជាតិក្នុងការប្រឆាំងការសម្អាតប្រាក់។ លោកថា៖ «រចនាសម្ព័ន្ធសាជីវកម្ម និងប្រព័ន្ធធនាគារក្រៅប្រទេស ការគ្រប់គ្រងការស៊ើបអង្កេតអំពើក្លែងបន្លំស្មុគស្មាញ អំពើក្លែងបន្លំក្នុងលទ្ធកម្ម ការចែករំលែកព័ត៌មាន និងចារកម្ម និងការប្រមូលភ័ស្តុតាងពីក្រៅប្រទេសក៏ត្រូវបានបណ្តុះបណ្តាលក្នុងវគ្គនេះផងដែរ»។ លោក នួន សូរិមន្ត បន្ថែមថា វគ្គបណ្តុះបណ្តាលនេះគឺបានបង្ហាញពីរបៀបដែលជនឧក្រិដ្ឋប្រើប្រាស់ក្រុមហ៊ុនខ្យល់ និងឥទ្ធិពលប្រព័ន្ធធនាគារ និងហិរញ្ញវត្ថុលើសកម្មភាពឧក្រិដ្ឋក៏ដូចជាបង្ហាញវិធីសាស្ត្រនៃការប្រមូលភ័ស្តុតាង ដែលមានការសហការតាមរយៈកិច្ចព្រមព្រៀងជំនួយផ្នែកច្បាប់ទៅវិញទៅមក (MLA) និងសំណេរលាយលក្ខណ៍អក្សរជាអន្តរជាតិ (ILOR)៕